La transfurmaziun da la SRG SSR progredescha. Cun il project da transfurmaziun Enavant garantescha la SRG SSR la persistenza da l'interpresa e daventa pli digitala, flexibla ed effizienta. A medem temp sto ella spargnar 270 milliuns francs fin il 2029, tranter auter perquai ch'il Cussegl federal ha decidì da reducir la taxa da medias. Ussa ha la SRG SSR concretisà las mesiras da spargn necessarias per l'onn 2027. La gronda part dals 80 milliuns che la SRG SSR sto gia spargnar fin il 2027 succeda cun adattar las structuras, ils process, las modas da producziun ed ils partenadis. Quai permetta ad ella da proteger il meglier pussaivel il program – en l'interess dal public. Consequenzas a media ed a lunga vista per il program èn dentant inevitablas en vista a questas autas summas da spargn.
