Davart il diever da l'intelligenza artifiziala
L'intelligenza artifiziala (IA) è ina tecnologia che sa sviluppa vinavant a moda rasanta e che influenzescha gia oz fermamain il mintgadi da lavur. Per la SRG SSR èsi central da tegnair pass cun il svilup tecnic e da represchentar in diever cler e responsabel en quest connex. Il diever da l'IA è regulà a moda unitara e lianta per tut las collavuraturas e tut ils collavuraturs.
Per concepir il diever da l'intelligenza artifiziala a moda responsabla ed orientada al futur ha la SRG SSR elavurà in reglament naziunal davart l'IA che vala dapi il 1. da zercladur 2026. Quel vegn examinà regularmain ed actualisà en cas da basegn. Il reglament definescha standards liants per tut ils secturs da l'interpresa e procura per consistenza e transparenza en il diever da l'IA.
Central è: L'IA na vegn mai duvrada per atgnas finamiras, mabain mo là, nua ch'ella sustegna nossa incumbensa publica – en vista a la qualitad schurnalistica, a l'accessibladad, a la relevanza per il public ubain a l'augment da l'effizienza.
La responsabladad ha adina l'uman. Nossas directivas publicisticas e noss mecanissems da controlla schurnalistics restan en funcziun senza restricziuns. I dat reglas precisas per marcar cuntegns creads per part u cumplainamain cun l'IA. La protecziun da datas sensiblas è garantida da tut temp.
