L'istorgia da la SSR
En paucs onns po la Societad Svizra da Radio e Televisiun SSR festivar ses tschientavel anniversari. En quest temp ha la Societad svizra da radiodiffusiun, sco quai ch'ella sa numnava, cura ch'ella è vegnida fundada il 1931 sco organisaziun tetgala da tut las societads da radio regiunalas, fatg tras massa midadas e surmuntà numerusas sfidas. La Cronica da la SSR dat ina survista dals pli impurtants eveniments dapi la fundaziun da la SSR.
In term impurtant èn segir stads ils emprims programs da televisiun l'onn 1951. Quella giada hai però dà gronda opposiziun, pertge ch'ins temeva che la televisiun possia disfar las structuras da famiglia. L'onn 1968 è vegnida introducida la televisiun da colur e cun il start da HD suisse il 2007 ha la televisiun fatg in grond pass areguard la qualitad. Oz na pon ins betg pli s'imaginar il mintgadi senza il maletg animà.
L'onn 1956 ha er il radio fatg in grond svilup: cun l'introducziun da las undas ultracurtas è sa meglierada la qualitad da recepziun dal radio ed igl è daventà pussaivel d'emetter in segund program. Oz va la vita da las undas ultracurtas plaunsieu a fin. En in pèr onns vegnan ellas remplazzadas cumplettamain da tecnologias da derasaziun digitalas sco DAB+ ed IP (online).
Il service public audiovisual è ditg vegnì finanzià sulettamain cun las taxas dal public. Cun l'introducziun da la reclama en la televisiun (1965) ha la finanziaziun survegnì ina nova basa. Ina gronda midada per la SSR hai era dà il 1983, cura che la lescha da medias è vegnida liberalisada e radios locals privats han cumenzà a far concurrenza a la SSR. Diesch onns pli tard è quai stà il cas era tar la televisiun.
Duas da las pli grondas sfidas che la SSR ha gì dar dumogn en sia istorgia n'èn anc betg ditg enavos: il mars 2018 ha gì lieu la votaziun davart l'iniziativa No Billag. Cun 71,6 pertschient è la populaziun stada en cleramain per il service public audiovisual. Il suveran svizzer ha refusà il mars 2026 cun 61,9 pertschient da las vuschs l'iniziativa «200 francs bastan!». L'iniziativa vuleva reducir la taxa per las chasadas da 335 sin 200 francs e deliberar las interpresas da la taxa.
Ils onns passads èn la Svizra sco er la SSR sa midadas. Sia rolla sco service public e la garanzia d'ina purschida da medias plurilingua en l'entira Svizra èn dentant dapi prest in tschientaner ina part fixa da sia DNA.
L'istorgia da la SSR s'exprima en ses archivs
En connex cun l'istorgia da la SSR giogan ses gronds archivs da radio e televisiun ina rolla impurtanta. En ils Archivs da la SSR sa chattan emissiuns da radio e televisiun d'ina durada da passa dus milliuns uras. La SSR renda accessibel quest vast fundus a la publicitad.
