Audits da qualitad externs 2022

L'artitgel 4 da la concessiun pretenda che la SRG SSR laschia exequir regularmain expertas ed experts externs – che han la qualificaziun e l'experientscha correspundenta – controllas da qualitad. Ils onns 2020 fin 2022 è stà inaricà cun questa incumbensa il team d'audit enturn professer Vinzenz Wyss da la Scola auta turitgaisa per scienzas applitgadas (ZHAW). Il team d'audit dat in fitg bun attestat a la SRG SSR per l'onn 2022.

L'onn 2022 ha il team d'audit da la ZHAW examinà in sectur redacziunal en quatter unitads d'interpresa da la SRG SSR. Concretamain èsi ì per la show da quiz da RSI «Zerovero», l'emissiun televisiva da novitads da RTR «Telesguard», la purschida da novitads da RTS per in public giuven e per il podcast da SRF «News Plus». Da SWI swissinfo.ch è vegnida examinada tut la purschida.

Il team da l'audit ha examnià cun egl critic quatter domenas: «Normas da qualitad, finamiras da qualitad e reglas communitgadas», «Perfecziunament, persunal ed organisaziun», «Process da garantir la qualitad» e «Concept dal public, integraziun dal public». En tut las domenas han ins cuntanschì buns fin fitg buns resultats.

En sia valitaziun vegn il team d'audit da professer Vinzenz Wyss a la conclusiun ch'il sistem da garantir la qualitad funcziunia fitg bain tar la SRG SSR e che las pretensiuns vegnian accumplidas per gronda part. El prenda enconuschientscha che las persunas responsablas per la qualitad da la gruppa da lavur naziunala han realisà bain ils duairs dals anteriurs audits e ch'ellas han cuntinuà a sviluppar il sistem da garantir la qualitad en las tschintg unitads d'interpresa. En total dat il team d'audit in fitg bun attestat al sistem da garantir la qualitad da la SRG SSR.

Recumandaziuns per optimar il sistem

Garantir la qualitad è in process cuntinuant che sto vegnir adattà d'in cuntin a las novas cundiziuns. Potenzial d'optimar vesa il team d'audit cunzunt en ils suandants secturs:

  • Las collavuraturas ed ils collavuraturs duain vegnir integrads explicitamain, sche documents vegnan adattads cun finamiras da qualitad u cun process da garantir la qualitad.
  • En il rom dal svilup dal persunal exista en tschertas unitads d'interpresa il potenzial d'orientar il discurs da persunal al schema SMART (SMART: Specific, Measurable, Assignable, Realistic, Time-related).
  • En la fasa «Act» dal ciclus PDCA (PDCA: Plan, Do, Check, Act) duai vegnir applitgà in proceder sistematic, a maun dal qual ins po definir mesiras a moda suandabla e sin fundament da controllas ed enconuschientschas.
  • Il monitoring da reacziuns dal public sin las plattafurmas da las medias socialas duai far part da la garanzia da qualitad, era sche la redacziun u l'unitad d'organisaziun n'ha betg in profil sin il chanal correspundent.

Las persunas responsablas per la qualitad han prendì enconuschientscha da questas recumandaziuns e planisà mesiras per realisar ellas.

Perspectiva

Suenter avair terminà l'emprima retscha d'audit èn vegnidas publitgadas la stad 2022 las proximas controllas da qualitad externas. Ils audits han lieu en il futur mo pli mintga dus onns. Plirs purschiders èn s'annunziads per las controllas da qualitad 2024, 2026 e 2028. Il team sut la direcziun dallas professuressas Ulla Autenrieth e Franziska Oehmer-Pedrazzi e dals professers Matthias Künzlered ed Edzard Schade da la Scola auta spezialisada dal Grischun (SAS Grischun) è ì cun la plima. La SAS Grischun ha persvas las persunas responsablas per la qualitad da la gruppa da lavur da la SRG SSR cun sias cumpetenzas e cun las propostas areguard il porceder planisà. Surdar da nov ils audits è ina fitg buna chaschun per verifitgar, sch'ils resultats dals emprims trais audits vegnan confermads.