Public Value: sentir e rinforzar la plivalur
La SRG SSR presta di per di ina contribuziun essenziala per la societad. Il team Public Value (per rumantsch «plivalur per la societad») s'occupa da questa plivalur. En il barat cun la societad vul il team savair co che la SRG SSR po sa meglierar vinavant e communitgescha tge che la SRG SSR fa gia.
La finamira è da rinforzar la conscienza per quai che l'interpresa da service public presta di per di per la societad. Sin la pagina-web da Public Value vegn mussada la plivalur a maun d'exempels concrets da la SRG SSR. Plinavant tematisescha la newsletter regularmain best practices en il sectur dal Public Value naziunal ed internaziunal.
Interess? Alura abunai qua nossa newsletter.
Sa barattar e sa sviluppar vinavant
Nus na vulain dentant betg mo rinforzar la conscienza, mabain era metter en dumonda ed optimar questa plivalur sociala. Ils inputs da la societad gidan perquai la SRG SSR da rinforzar sia plivalur per la societad. La SRG SSR rapportescha regularmain a ses persunal, a la publicitad ed a las gruppas en mira davart sia contribuziun al Public Value ed examinescha eventualas mesiras.
Dialog 2025: «La Svizra tegna ensemen»
Quatter linguas naziunalas, numerus dialects, differentas culturas, cuntradas e zonas climaticas: la Svizra è in pajais fitg multifar. Ma tge tegna ensemen nossa societad? E tge rolla gioga la SRG SSR en quest connex? Passa 2'300 persunas da tut las regiuns linguisticas da la Svizra èn sa participadas la primavaira 2025 ad in'enquista online davart quest tema (dapli). Silsuenter ha la SRG SSR organisà en il rom d'ina seria da dialogs barats al lieu cun 670 participantas e participants, nua ch'ins ha discurrì davart las spetgas concretas.
Public Value en connex cun l'ESC 2025
Ina gronda finamira da l'ESC 2025 è stà da cuntanscher cun differents projects uschè bleras persunas en Svizra sco pussaivel per che l'ESC 2025 daventia ina festa per tuttas e tuts. L'ESC 2025 è uschia stà dapli che las shows en l'arena ed ha stgaffì ina plivalur per la populaziun svizra. Qua chattais Vus ina survista da tut ils projects cun plivalur en connex cun l'ESC.
Dialog 2023: «Quant impurtanta è per tai la cultura?»
Dal settember fin il december 2023 ha gì lieu en collavuraziun cun las purtadras ed ils purtaders da la SRG SSR in ulteriur dialog davart il tema da focus «cultura». 3'013 persunas èn sa participadas ad in'enquista online. Il medem mument han ins fatg discurs persunals cun 48 represchentant:as da las branschas da tut las quatter parts dal pajais. Las dumondas èn s'orientadas a l'incumbensa culturala da la SRG SSR determinada en la concessiun da la Confederaziun. Dapli infurmaziuns chattais Vus qua.
Dialog 2022: «La giuventetgna e la SRG SSR»
Dal zercladur 2022 fin il mars 2023 èn passa 3'100 persunas sa participadas al tema da focus «giuventetgna». Ina survista da las spetgas las pli impurtantas ch'èn resultadas dal dialog chattais Vus qua.
Actualisà l'ultima giada: schaner 2026