Infurmaziun per tuts

L'infurmaziun è la funtauna da la furmaziun libra da l'opiniun e da la democrazia. Emissiuns d'infurmaziun retschertgadas bain tematiseschan las relaziuns sociopoliticas da differents puncts da vista. Ellas dattan infurmaziuns supplementaras ed orientaziun ed animeschan da discussiunar. Infurmaziun è service public.

Passa 50 pertschient da las entradas da la taxa da medias
vegnan investids en l'infurmaziun.

Infurmaziun per l'entira Svizra

Las emissiuns d'infurmaziun e da novitads da la SSR rapportan davart eveniments actuals da la Svizra e dal mund. Ellas porschan ina vista independenta or da la perspectiva svizra sin la vita politica, economica e sociala.

Sulettamain infurmaziuns e rapports retschertgads bain ed intermediads a moda vardaivla pussibiliteschan als umans da furmar libramain in'opiniun. Nossas reportaschas independentas prestan ina contribuziun essenziala e promovan uschia la cultura politica en Svizra.

Infurmaziun da tuttas uras

Infurmaziun – quai èn:
38 pertschient da noss temp d'emissiun a la televisiun, 14 pertschient da noss temp d'emissiun al radio.

Infurmaziun è integraziun

SWI swissinfo.ch rapporta mintga di en diesch linguas davart la politica, l'economia, la cultura, la societad e la scienza svizra. Questa purschida sa drizza ad in public internaziunal. Cun quai presta SWI ina contribuziun a l'integraziun dad estras ed esters. Era per Svizras e Svizzers a l'exteriur è la purschida online da SWI multifara e preziusa. Ad els stattan a disposiziun tranter auter infurmaziuns davart votaziuns ed elecziuns federalas.

Infurmaziun d'emprim maun

Correspundent:as da la SSR rapportan en Svizra ed en il mund da funtaunas directas – ina prestaziun che mo paucas interpresas da service public europeicas porschan. Nus ans obligain ad autas pretensiuns da qualitad, quai che noss public stima: el attestescha gronda credibladad ed in aut cuntegn d'infurmaziun a nossas purschidas, sco quai che enquistas mussan adina puspè.

Correspundents da la SSR rapportan da tut il mund.

Correspundent Pascal Weber a Cairo.