Rom politic e mandat

La SSR vegn magari considerada sco interpresa dal stadi – correct è: la SSR è in’uniun privata manada tenor il dretg d’aczias che creescha cun agid d’ina interpresa ina purschida da medias per l’entira Svizra, finanziada cun daners publics. Per ademplir ses mandat survegn la SSR daners da las entradas da la taxa da radio e televisiun ed in’incumbensa definida politicamain. La politica è centrala per la SSR sco chasa da medias publica. Ils Affars publics stattan en barat cuntinuant cun las gruppas politicas participadas e represchentan ils interess da la SSR e dal service public medial en ils process politics.

La SSR – integrada en in rom politic

Acturs politics determineschan las cundiziuns da basa da la SSR: cun concepir la Constituziun federala, las basas legalas, las ordinaziuns correspundentas e la concessiun da la SSR. Entaifer questas cundiziuns generalas è la SSR autonoma en dumondas da l’organisaziun e dal program; la lavur redacziunala da la SSR è neutrala ed independenta.

La basa constituziunala per l’activitad da la SSR è l’artitgel 93 «Radio e televisiun» da la Constituziun federala. El surdat a la Confederaziun la cumpetenza da s’occupar da la legislaziun davart radio e televisiun e davart autras furmas da la telediffusiun publica. Il radio e la televisiun duain contribuir a la furmaziun ed al svilup cultural, a la furmaziun libra da l’opiniun ed al divertiment, resguardar las atgnadads dal pajais ed ils basegns dals chantuns, preschentar ils eveniments a moda correcta e reflectar adequatamain la diversitad da las opiniuns. Ultra da quai garantescha la Constituziun federala l’independenza dal radio e da la televisiun sco era l’autonomia en la furmaziun dals programs.

La basa constituziunala da la SSR è vegnida confermada democraticamain l’ultima giada a chaschun da l’iniziativa No Billag: suenter ina debatta intensiva davart il service public medial han las votantas ed ils votants svizzers refusà l’iniziativa cun 71,2 pertschient da las vuschs. Il pli cler votum encunter l'iniziativa è vegnì da la gruppa en mira la pli giuvna, quella dals giuvens creschids tranter 18 e 29 onns. 

La Lescha federala davart radio e televisiun LRTV skizzescha pli detagliadamain il mandat da prestaziun constituziunal da la SSR e cuntegna directivas davart la realisaziun da l’incumbensa da program, la diffusiun dal program sco era l’organisaziun e la finanziaziun da la SSR. 

Da quel fan part:

  • la structura organisatorica (per exempel la cumposiziun dal cussegl d’administraziun)
  • l’utilisaziun dals meds finanzials
  • la surveglianza da las finanzas tras il DATEC 
  • la collavuraziun cun tschertas branschas (film, musica, archivs, etc.)

La SSR sto vegnir manada a moda economica ed esser organisada uschia che sia autonomia ed independenza èn garantidas, ch’ils giavischs da las regiuns linguisticas vegnan resguardads e ch’il public è represchentà en l’organisaziun. La concepziun da la lescha è chaussa dal parlament, l’ordinaziun vegn definida dal Cussegl federal. 

La concessiun ch’il Cussegl federal dat mintgamai per plirs onns concretisescha anc pli fitg il mandat dal service public. Ella

  • determinescha ils princips e las valurs da basa (l’obligaziun da resguardar l’interess public, l’acceptanza, la qualitad, il dialog cun il public);
  • definescha las incumbensas interdisciplinaras en ils secturs innovaziun, barat cultural, purschidas per giuvnas gruppas en mira, umans cun biografia da migraziun ed umans cun senns restrenschids;
  • concretisescha la purschida publicistica en ils secturs infurmaziun, cultura, furmaziun, divertiment e sport. Quella è circa tuttina vasta en las trais grondas regiuns linguisticas ed adattada per la Svizra rumantscha. Las Svizras ed ils Svizzers a l’exteriur survegnan ina purschida online; 
  • fa prescripziuns areguard la producziun e la derasaziun da ses programs al radio, en la televisiun ed en l'internet sco er areguard las purschidas online (per exempel èn las contribuziuns da text senza in connex cun in’emissiun limitadas a max. 1000 segns per contribuziun en las spartas novitads, sport e regiun. 
  • determinescha che la SSR sa differenziescha da purschiders commerzials era tras las pretensiuns qualitativas ed eticas particularas a ses programs.
  • fa prescripziuns davart l'organisaziun, la collavuraziun cun autras medias, auters organisaturs ed autras branschas sco era davart l’obligaziun da rapportar da la SSR.

Al radio porscha la SSR:

  • mintgamai trais programs per la regiun linguistica tudestga, franzosa e taliana
    Radio SRF 1, Radio SRF 2 Kultur, Radio SRF 3, La Première, Espace 2, Couleur 3, Rete Uno, Rete Due, Rete Tre
  • in program rumantsch
    Radio RTR
  • in program da giuventetgna per la Svizra tudestga
    Radio SRF Virus
  • in program d'infurmaziun tudestg
    SRF 4 News
  • mintgamai in program per la regiun linguistica tudestga e franzosa che dat blera plazza a la cultura da musica populara
    Radio SRF Musikwelle, Option Musique
  • per tut las regiuns linguisticas mintgamai in program da musica per classica, jazz e pop cun ina cumpart da musica svizra dad almain 50 pertschient
    Radio Swiss Classic, Radio Swiss Jazz

En la televisiun porscha la SSR:

  • mintgamai dus programs per la regiun linguistica tudestga, franzosa e taliana en qualitad da HDTV
    SRF 1, SRF zwei, RTS 1, RTS 2, RSI LA 1, RSI LA 2
  • emissiuns rumantschas
    sin SRF 1, SRF info, RTS 1, RSI LA 1, RSI LA 2
  • in program da repetiziun tudestg
    SRF info
  • en tut las regiuns linguisticas in program da televisiun via internet cun infurmaziuns ed avis da program actualisads currentamain e senza reclama e sponsoring
    SRF Play, RTS Play, RSI Play, RTR Play, SWI Play

Da l’ulteriura purschida publicistica fan part:

  • purschidas online cun accent sin cuntegns auditivs ed audiovisuals 
    per exempel srf.ch, rts.ch, rsi.ch, rtr.ch, swi.ch, apps e chanals da las medias socialas.
  • teletext
    Il teletext porscha infurmaziuns curtas plurilinguas sin ils emetturs da SRF, RTS e RSI. El è disponibel en la televisiun, en l’internet u via app.
  • HbbTV (Hybrid broadcast broadband TV)
    HbbTV ubain Smart TV è ina tecnologia che collia la televisiun digitala cun l'internet. Sumegliant sco il teletext porscha il program da televisiun correspundent via HbbTV infurmaziuns supplementaras. Ultra da quai lubescha HbbTV l'access ad emissiuns gia mussadas, a livestreams ed a tut ils programs da radio da la SSR. En pli cuntegna el ulteriurs servetschs per umans cun senns restrenschids, per exempel suttitels ch'ins po configurar. 
  • ina purschida publicistica per l’exteriur
    La purschida publicistica per l’exteriur cumpiglia: swissinfo.ch – la plattafurma online da la SSR per Svizras e Svizzers a l'exteriur, emissiuns franzosas sin TV5Monde, emissiuns tudestgas sin 3Sat e contribuziuns talianas sin la plattafurma online tvsvizzera.it. 

La SSR en il dialog cun la politica

La politica determinescha las cundiziuns da basa da la SSR. Perquai èn il dialog cun ils acturs politics e la chapientscha vicendaivla puncts centrals. Ils Affars publics han cuntinuadamain contact cun ils acturs politics e represchentan ils interess da la SSR e dal service public medial en process politics. 

La SSR sa finanziescha per gronda part cun entradas da la taxa da medias pajada da las chasadas e da las interpresas che han ina tscherta summa da svieuta. La SSR tutga damai per uschè da dir a la populaziun svizra – a nus tuts. Numerusas gruppas participadas han in interess legitimà a las activitads da la SSR ed accumpognan quellas a moda premurusa e sche necessari era critica. In barat regular furma la basa per la chapientscha vicendaivla. 

Il Cussegl federal ed il parlament defineschan las cundiziuns da basa dal service public medial ed èn partenaris da dialog centrals da la SSR. La SSR è dependenta da bunas cundiziuns da basa politicas per ademplir ses mandat da prestaziun oz e damaun. Ils Affars publics observan attentivamain ils svilups politics, accumpognan ils process da legislaziun en Chasa federala e procuran ch’ils interess dal service public medial chattian suatientscha tar ils purtaders da decisiuns politics e tar las gruppas da pretensiun politicas sin plaun naziunal e regiunal.