La SSR, la pli gronda chasa da medias da la Svizra
La SSR è ina chasa da medias independenta che presta in service public multimedial en tut las parts dal pajais ed en tut las linguas naziunalas. Ella è er in'uniun ed uschia francada fermamain en la societad.
La SSR metta a disposiziun a l'entira populaziun da la Svizra ina purschida attractiva e multifara da tv, radio ed online en las spartas infurmaziun, cultura, furmaziun, divertiment e sport. Quella promova la furmaziun da l'opiniun e la diversitad da las opiniuns en Svizra ed è in servetsch impurtant per la societad.
La Lescha federala davart radio e televisiun (LRTV) e la concessiun dal Cussegl federal obligheschan la SSR d'ademplir sia incumbensa da service public en favur da la societad.
Organisaziun
La SSR cumpiglia las tschintg unitads d'interpresa RTR, SRF, RSI, RTS e SWI sco era la direcziun generala a Berna.
Cun var 7194 persunas engaschadas, ina svieuta annuala da circa 1,54 milliardas francs, 17 programs da radio e 7 programs da televisiun sco era websites e servetschs da teletext cumplettants è la SSR la pli gronda interpresa per medias electronicas en Svizra.
Collavuratur:as
Tar la SSR lavuran var 7194 collavuraturas e collavuraturs.
Cifras e fatgs davart nossas collavuraturas e noss collavuraturs (tudestg)
Basas legalas
La SSR è in'interpresa da medias organisada tenor il dretg privat e tenor ils princips dal dretg d'ina societad anonima. Sia incumbensa sa basa sin la Constituziun federala, la Lescha federala davart radio e televisiun, l'Ordinaziun davart radio e televisiun e la concessiun. Ella è obligada al service public.
Finanziaziun
La SSR è in'interpresa senza intenziun da far profit. Ella sa finanziescha per 82 pertschient cun las entradas da la taxa da medias, per 13 pertschient cun entradas commerzialas e per 5 pertschient cun ulteriurs retgavs. La SSR dispona d'entradas da var 1,54 milliardas francs ad onn. Da quest import investescha ella 41 pertschient en l'infurmaziun, 22 pertschient en il divertiment ed il film, 18 pertschient en la cultura, la societad e la furmaziun, 12 pertschient en il sport e 7 pertschient en la musica e la giuventetgna (cifras dal 2023).
La SSR en in'egliada
- uniun cun ca. 23 532 commembras e commembers
- interpresa cun 7194 collavuratur:as
- 5 unitads d'interpresa
- 2 societads affiliadas
- 17 programs da radio, 7 programs da televisiun, ina vasta purschida en l'internet
- finanziada per 82 pertschient cun entradas da la taxa da medias
