Democrazia per tuts

La SSR rapporta a moda independenta da la politica e da l'economia. Sia purschida contribuescha essenzialmain a la furmaziun libra da l'opiniun. E la furmaziun libra da l'opiniun è in element fundamental da la democrazia. La democrazia è service public.

Las fermezzas da la SSR dal punct da vista dal public:
Professiunalitad
Credibladad
Cuntegn d'infurmaziun
Equiliber

Studi da l'Uffizi federal da communicaziun davart la qualitad

Nus ans engaschain per ina ferma plazza da medias svizra. La digitalisaziun mida noss mund da viver e revoluziunescha er il martgà da medias. En plazza da lavurs da retschertga pretensiusas e prestaziuns da classificaziun preziusas vegnan algoritmus che offreschan als umans cuntegns adattads a lur cumportament da consum. Sco chasa da medias che contribuescha a la furmaziun libra da l'opiniun purschain nus percunter in schurnalissem independent ed equilibrà. Empè da commerzi purschain nus infurmaziun ed orientaziun.

Il studi da l'Uffizi federal da communicaziun davart la qualitad da program da medias privatas e publicas demussa: il public stima nossas reportaschas independentas ed objectivas. Nossas purschidas sustegnan ils umans da furmar libramain l'opiniun ed han in effect positiv sin la qualitad da la debatta publica.

Furmaziun da l'opiniun

In sistem da medias independent che funcziuna bain contribuescha essenzialmain al bainstar public dal pajais. Democrazias che funcziunan bain disponan per il solit da fermas medias publicas. En pajais, nua che emetturs publics han in'auta quota da participaziun al martgà ha la populaziun savens era gronda confidenza en las medias.

Nus essan averts per las novas pussaivladads en in mund digital e connectà. Nus faschain diever dad ellas là, nua ch'ellas servan a la qualitad ed a la furmaziun da l'opiniun. Il medem mument mettain nus cunfins per resguardar la sfera privata da las utilisadras e dals utilisaders.

La furmaziun libra da l'opiniun surlaschain nus, nus ans concentrain er en il temp da la digitalisaziun sin in schurnalissem equilibrà. Nus promovain la diversitad d'opiniuns ed il barat tranter las gruppas d'interess. Uschia garantin nus che la discussiun politica restia democratica.