Strategia d'interpresa e da purschida 2023-2025

Purschida

Nus accentuain nossa plivalur e promovain ina societad svizra averta e multifara.

 

Noss service public pluriling metta en il center il public. Nus persvadain cun qualitad, relevanza ed independenza, tant en l'infurmaziun sco er en la cultura, il sport ed il divertiment. Ils cuntegns da nossa purschida correspundan ad auts standards quai che reguarda l'originalitad ed il storytelling. Uschia pussibilitain nus er la debatta a la societad svizra.

Nus investin en in schurnalissem objectiv, ferm, critic ed independent e rapportain a moda equilibrada. Cun far la differenza tranter infurmaziuns objectivas ed opiniuns e cun porscher dossiers tematics fundads e contextualisants essan nus la pli impurtanta partenaria da la populaziun svizra en il cumbat cunter «fake news». Uschia sustegnain nus la participaziun politica da la populaziun e contribuin ad ina plivalur evidenta per la democrazia svizra.

Er en situaziuns da crisa garantin nus ina infurmaziun adequata per la populaziun.

Grazia a diversas vias da distribuziun e formats dal cuntegn multifars che mettan adina en il center las utilisadras ed ils utilisaders cuntanschain nus las differentas gruppas dal public en lur mintgadi.

 

Nus ans vesain sco interpresa da service public transmediala che proveda l'entira populaziun. Cun agid da purschidas digitalas cuntanschain nus dapli umans, en spezial quels che consumeschan adina pli pauc u che na consumeschan insumma nagin radio linear e nagina televisiun lineara. Nossas purschidas digitalas mettan il focus sin audio e video, èn facilas da chattar e disponiblas sin las plattafurmas relevantas, tranter las qualas nossas atgnas plattafurmas vegnan priorisadas. Noss cuntegns han ina gronda relevanza subjectiva (Personal Value) per ils differents interess e las differentas furmas d'utilisaziun. Lur plivalur sociala è visibla e vegn attribuida a nossas marcas d'interpresa. L'experientscha d'utilisaziun (UX) dals products da nossas atgnas plattafurmas vegn meglierada cuntinuadamain, er areguard la persunalisaziun.

Nus ans sviluppain ad in'organisaziun che sa basa sin datas e prendain decisiuns orientadas a quellas, entant che nus tractain il medem mument cun gronda responsabladad las datas da las utilisadras e dals utilisaders.

En nossa purschida dain nus paisa a l'enragischaziun regiunala, tranter auter cun investir en producziuns svizras regiunalas e naziunalas. 

 

Sco interpresa da service public svizra avain nus in'optica svizra sin temas tant regiunals, naziunals sco er internaziunals.

Grazia a nossa enragischaziun regiunala dain nus in'invista en tratgs cuminaivels e particularitads regiunalas e promovain uschia la percepziun d'ina identitad svizra ed in'attaschadadad regiunala. Nus faschain attenziun da pledentar e reunir cun nossas purschidas tut ils umans en Svizra cun lur pli differents ambients da viver.

Nus investin dapli en atgnas producziuns svizras, cunzunt en il sectur ficziun e films documentars. Nus promovain il barat interregiunal sin tut ils vecturs ed en tut ils geners.

Relaziun

Nossa purschida da program unescha la populaziun svizra.

 

Nus stgaffin eveniments communabels per las differentas gruppas da la societad svizra – en il rom da gronds eveniments naziunals, en ils secturs cultura, sport, infurmaziun e divertiment. Uschia contribuin nus activamain a la coesiun.

Pajataxas che na tiran betg a niz nossa purschida renconuschan la legitimitad da nossa purschida.

Nus augmentain la purschida ed eliminain obstachels per umans cun impediments dals senns.

Nus gidain a stgaffir ed a mantegnair la memoria audiovisuala da la Svizra.

Nus promovain il dialog cun ed en la societad.

 

Nus ans engaschain ensemen cun l'uniun purtadra per la plivalur sociala dal service public medial. En il dialog cun il public e cun las gruppas socialas relevantas sclerin e discutain nus spetgas e basegns en connex cun il service public medial en il temp digital. Ensemen cun l'uniun purtadra ans barattain nus regularmain cun persunas da diversas realitads da viver. Uschia vegnin nus pli datiers a la societad svizra e meglierain sia chapientscha per e la confidenza en la chasa da medias publica SSR.

Nus contribuin essenzialmain a l'ecosistem svizzer: en ils secturs medias, furmaziun e cultura.

 

Nus tschertgain e tgirain la collavuraziun cun acturas ed acturs en la cuntrada mediala naziunala ed internaziunala sco era cun autras interpresas ed instituziuns da service public. Uschia creain nus ulteriura plivalur per las utilisadras ed ils utilisaders. En ils secturs dal cuntegn e da la distribuziun empruvain nus d'entrar en tut ils partenadis pussaivels ch'èn d'avantatg per omaduas varts.

Nus tgirain la collavuraziun cun auturas ed auturs sco era producentas e producents independents e cun l'industria audiovisuala.

Sin il champ da la perscrutaziun ed innovaziun da medias, da tecnologia e da communicaziun intensivain nus nossa cooperaziun cun start-ups, universitads e scolas autas.

Resursas

Sco patruna promovain nus la diversitad ed inclusiun e procurain activamain per la protecziun da l'integritad persunala da tut las collavuraturas e tut ils collavuraturs.

 

Il persunal è nossa pli impurtanta resursa. Nus profitain da ses potenzial e sia savida che nus sviluppain vinavant communablamain. Cun agid da purschidas da perfecziunament interessantas e sistematicas promovain nus ina cultura d'emprender e sustegnain la mobilitad professiunala. Nus augmentain en general nossa attractivitad per talents e persunas qualifitgadas.

Nus essan ina patruna attractiva per tut ils umans, independentamain da lur realitads da viver. Respect, stima vicendaivla e confidenza considerain nus sco pitga principala da nossa collavuraziun. Nus promovain activamain il barat intern, la transparenza e la chapientscha vicendaivla da collavuraturas e collavuraturs sur tut ils stgalims d'ierarchia.

Nus procurain per diversitad, inclusiun ed egualitad da las schanzas. Nus dain paisa ad ina represchentanza equilibrada da tut ils genders en las differentas posiziuns. Nus essan creativs ed averts per novs models da lavur e sustegnain la cumpatibilitad da professiun e d'obligaziuns privatas tenor pussaivladad cun agid da temps da lavur flexibels.

Nus augmentain nossa agilitad da business, meglierain nossa effizienza ed economisain noss meds.

 

Nus collavurain sin plaun interregiunal per crear sinergias raschunaivlas ord vista da l'entira interpresa. Entant che cuntegns publicistics vegnan producids regiunalmain, investin nus communablamain en novas tecnologias e novs process – che vegnan manads sin plaun naziunal, sche quai fa senn.

Nus stgaffin communablamain las premissas tecnologicas ed organisatoricas per ch'il public possia profitar il pli fitg pussaivel da datas gia existentas e datas novas.
Da cuminanza sviluppain nus novas metodas da producziun, examinain ils standards da nossas investiziuns en il sectur da l'infrastructura ed ans concentrain sin models da lavur moderns. Nus concepin noss process da lavur a moda simpla, flexibla e profitabla.

Nus mantegnain ina flexibilitad finanziala. Noss cashflow pussibilitescha da finanziar nossas investiziuns. Grazia a noss agen chapital essan nus preparads per eventualas ristgas.

Nus surpigliain nossa responsabladad ecologica, sociala ed economica.

 

En nossa rolla sco patruna, producenta da cuntegns medials ed interpresa che procura per bains/servetschs ans drizzain nus tenor ils princips d'ina gestiun responsabla («Corporate Social Responsibility»). En il center stat la persistenza ecologica, sociala ed economica. Nus valitain conscienziusamain ristgas da persistenza e minimain consequenzas negativas sin l'ambient e sin stakeholders socials.