Realisaziun da la strategia
La strategia d'interpresa e da purschida da la SSR definescha las finamiras strategicas da l'interpresa. Mintga dus onns lascha la SSR examinar in post spezialisà extern quant enavant che las unitads d'interpresa RSI, RTR, RTS e SRF han realisà lur finamiras.
La SSR evaluescha regularmain, schebain ella cuntanscha las finamiras da sia strategia d'interpresa e da purschida. Per quel intent incumbensescha ella in post spezialisà extern. Per il ciclus 2021–2022 ha la SSR incumbensà l'European Broadcast Union (EBU) cun l'evaluaziun.
L'EBU examinescha la realisaziun da la strategia d'interpresa e da purschida 2021–2022
En il rom d'ina uschenumnada peer-to-peer-review han expertas ed experts da l'EBU examinà quant enavant che las unitads d'interpresa da la SSR RSI, RTR, RTS e SRF han realisà las finamiras da la strategia d'interpresa e da purschida 2021–2022. En il focus èn stadas las offertas medialas per il public giuven sco era la purschida culturala. Il resultat da l'examinaziun èn quatter rapports d'evaluaziun (vesair documents). L'unitad d'interpresa SWI swissinfo.ch na fa betg part da l'evaluaziun, perquai che SWI swissinfo.ch dispona d'ina atgna incumbensa da prestaziun.
La societad regiunala da l'unitad d'interpresa correspundenta ed il sectur da Public Value da la SRG SSR han silsuenter discutà ils resultats dals rapports cun la populaziun.
Metoda da peer-to-peer-review: examinaziun en plirs pass
- Sa basond sin las finamiras da la strategia d'interpresa e da purschida han expert:as da l'EBU (peers) elavurà in catalog da dumondas che las unitads d'interpresa da la SRG SSR - RSI, RTR, RTS e SRF - han emplenì per valitar sasezzas.
- Expert:as da l'EBU han evaluà il catalog da dumondas ed ulteriur material da datas. Ultra da quai han els manà discurs cun var 100 collavuratur:as da RSI, RTR, RTS e SRF.
- Tut las expertas ed ils experts da l'EBU han valità en detagl mintga finamira da la strategia. La valitaziun da las expertas e dals experts è vegnida consolidada en in rapport. Da mintga regiun linguistica hai dà in rapport.
Resultats dals rapports da la peer-review
La valitaziun generala da las expertas e dals experts è fitg buna. Las unitads d'interpresa adempleschan lur incumbensa e cuntanschan er il public giuven. Surtut en il sectur da la transfurmaziun digitala ha la SRG SSR fatg progress. Las unitads d'interpresa realiseschan las finamiras strategicas da la SRG SSR er en connex cun la purschida culturala.
Sin fundament dals differents peers n'èsi betg pussaivel da cumparegliar ina cun l'autra las unitads d'interpresa.
