Musica

La musica è in stgazi cultural e la lingua dals sentiments. La musica e tradiziun vivida ed unescha generaziuns. Musica signifitgescha libertad, s'inventa adina puspè da nov e n'enconuscha nagins cunfins. La musica è service public.

Nus transmettain concerts al radio ed operas en la televisiun e purtain uschia eveniments emoziunals dapertut enturn. Nossas emissiuns reflecteschan la diversitad musicala en Svizra e noss partenadis da medias cun festivals da musica rinforzan lur derasaziun. Sin noss emetturs aud'ins musica da tut ils stils e geners sco musica da pop e rock, musica populara, jazz, operas e musica classica. 

Nus purschain era trais portals da musica naziunals – mx3.ch, volksmusik.mx3.ch e neo.mx3.ch – che sa drizzan a musicist:as, amatur:as da la musica, student:as ed organisatur:as da concerts en Svizra ed a l'exteriur. La finamira da mx3.ch, volksmusik.mx3.ch e neo.mx3.ch è da promover il barat tranter musicist:as ed organisatur:as. Nus tgirain la redacziun da questas plattafurmas e garantin che musica da tut las regiuns linguisticas chattia regularmain la via en noss program da radio.

Nus promovain musica «made in Switzerland»

Tar nus udis Vus l'entira varietad da musica svizra sin tut ils emetturs. Plinavant mussain nus mintg'onn passa tschient uras registraziuns da concerts da bands svizras. Nus surdain premis da promoziun per musica e per giuvnas bands svizras ed envidain regularmain bands svizras a sa preschentar en directa al radio. Sin SRF Virus ed online scuvra il public giuven songs da talents cun adina dapli success e l'entir mund da la musica dasper il mainstream.