Coesiun
La SSR represchenta la realitad da la vita da tut ils umans en Svizra e promova cun sia purschida la coesiun. Perquai ha ella ina structura federalistica ed agescha a moda solidarica.
Nus essan la suletta interpresa da medias da la Svizra che producescha en tut ils quatter territoris linguistics ed en tut las linguas naziunalas cuntegns auditivs ed audiovisuals. La purschida per l'entira populaziun sa drizza tenor ils basegns dals umans cun differentas pretensiuns.
Nus ans differenziain da purschiders commerzials, perquai che nus
- resguardain tut las regiuns linguisticas sco era maioritads e minoritads
- purschain ina varietad da temas, cuntegns e furmas da concepziun
- na represchentain betg sulettamain, mabain stgaffin era cultura
- aspirain a qualitad, vardaivladad e relevanza
- essan politicamain ed economicamain independents
- rendain accessibla nossa purschida per umans cun impediments dals senns
La tgira da la coesiun è pli actuala che mai. Da diesch persunas en Svizra han bunamain quatter in'istorgia da migraziun, in quart da la populaziun na posseda betg la naziunalitad svizra. Differents backgrounds da furmaziun, numerusas regiuns, il svilup demografic e diversas linguas e provegnientschas culturalas èn tant schanzas sco era sfidas per la convivenza en Svizra.
Nossa purschida mussa questa diversitad socioculturala, promova l'emprender d'enconuscher in l'auter e meglierescha uschia la chapientscha in per l'auter. Grazia a la gulivaziun da finanzas regiunala pudain nus porscher en tut las regiuns in program cumplet. Nossa purschida collia ils umans sur ils cunfins da linguas, regiuns, gruppas e generaziuns.