Pli datiers sco commemb:ra da la SRG SSR

Cun ina commembranza en l'uniun SRG SSR èn ins pli datiers da la chasa da medias e da la lavur da las realisaturas e dals realisaturs dal program. Commemb:ras mettan in accent per ina Svizra democratica, multifara ed averta, rinforzan la SRG SSR e s'engaschan per ina purschida da medias economicamain e politicamain independenta. El:las portan lur interess en l'uniun SRG SSR e gidan a concepir ella. L'uniun SRG SSR infurmescha detagliadamain davart temas medials actuals ed en il rom da numerusas occurrenzas e guidas survegnan las commembras ed ils commembers invista davos las culissas da la SRG SSR ed en la lavur da medias.

Quai presta l'uniun

Var 23'700 persunas en Svizra èn commembras da l'uniun SRG SSR. Ellas francheschan la SRG SSR e ses programs en la populaziun. Las commembras ed ils commembers da l'uniun promovan il dialog public davart l'avegnir audiovisual da la Svizra e s'engaschan per in service public medial independent. Ina da las incumbensas da l'uniun SRG SSR è era da mussar a la populaziun la valur sociala dal service public medial.

L'uniun SRG SSR è partida en quatter societads regiunalas en las differentas parts linguisticas da la Svizra. Mintgina da quellas ha in cussegl dal public che creescha il dialog tranter la populaziun e las realisaturas ed ils realisaturs dal program da la SRG SSR. Plinavant maina mintga societad regiunala in post da mediaziun. Sco post independent examinescha quel reclamaziuns dal public en connex cun il program ed intermediescha tranter las partidas.