Co tractar l'intelligenza artifiziala
L'IA è ina tecnologia che sa sviluppa vinavant a moda rasanta e che influenzescha gia oz fermamain il mintgadi da lavur. Dapi la primavaira 2023 datti ina taskforce d'IA cun represchentant:as da tut las unitads d'interpresa ch'examineschan il potenzial da questa tecnologia per la SRG SSR. En in emprim pass ha la taskforce elavurà princips co tractar l'intelligenza artifiziala che suttastritgan trais puncts essenzials.
Primo: la responsabladad co duvrar l'IA ha adina l'uman. Secundo: cuntegns creads essenzialmain cun IA ston vegnir marcads a moda correspundenta e transparenta. E terzo: datas protegidas na dastgan betg vegnir elavuradas cun utensils d'IA per pudair garantir la confidenzialitad.
Princips naziunals areguard l'IA da la SRG SSR
Preambel
La SRG SSR persequitescha cun grond interess ils svilups en il sectur da l'intelligenza artifiziala (AI). Surtut l'IA generativa chaschuna midadas considerablas en il sectur da las medias e permetta numerusas pussaivladads d'applicaziun novas.
La SRG SSR nizzegia il potenzial da l'IA per exempel per augmentar l'effizienza ed a medem temp per minimar las ristgas. Il diever da l'IA sa basa sin cleras reglas, transparenza e responsabladad umana. La responsabladad per quel diever han las collavuraturas ed ils collavuraturs da la SRG che nizzegian l'IA sco instrument da lavur.
Schurnalissem d'auta qualitad è la pli gronda valur da la SRG SSR. Ella na dovra mai l'IA ed autras tecnologias per l'agen interess, mabain adina per mantegnair u augmentar la qualitad.
Nua che la SRG SSR profita dals avantatgs da l'IA respecta ella prescripziuns legalas (per exempel il dretg d'autur u la protecziun da datas) e las normas etic-professiunalas che furman la basa dal mandat da prestaziun da la chasa da medias publica. Quai è necessari per mantegnair e rinforzar l'impurtanta relaziun da confidenza cun il public.
Responsabladad
La responsabladad co duvrar l'IA ha adina l'uman. L'IA na remplazza betg l'expertisa umana. Ella serva sulettamain sco instrument da lavur. Tgi che nizzegia l'IA sto controllar la correctadad dals resultats generads e la qualitad dals process.
Transparenza
La SRG SSR è transparenta areguard il diever d'IA. Cuntegns creads essenzialmain cun IA vegnan adina marcads a moda correspundenta en la publicaziun. Ils detagls respectivs regleschan las directivas publicisticas da las unitads d'interpresa da la SRG SSR.
Confidenzialitad
Il diever d'IA pretenda confidenzialitad. Surtut cun utensils d'IA betg examinads e betg autorisads na dastgan vegnir elavuradas naginas datas persunalas, nagins cuntegns protegids cun il dretg d'autur ubain secrets da fatschenta da la SRG SSR e da ses partenaris da contract.
