Simona Caminada daventa directura da Radiotelevisiun Svizra Rumantscha (RTR)

L’elecziun stat sut l’ensaina da la transfurmaziun currenta da la SRG SSR en direcziun d’ina interpresa da medias pli digitala, pli flexibla e pli efficazia che sa posiziunescha da nov. RTR duai vegnir sviluppà vinavant sco medium principal audiovisual per la Svizra rumantscha e vegnir anc pli datiers al public. 

Il november 2025 ha la SRG SSR communitgà ch’ella sviluppeschia vinavant sias structuras e ses process er sin nivel directiv (vesair communicaziun a las medias La SRG SSR concretisescha ils plans per la transfurmaziun e la reducziun da plazzas da lavur planisada). Cun eleger Simona Caminada sco nova directura da RTR è ussa cumplet il comité directiv da la SRG SSR sut la direcziun da la directura generala Susanne Wille. Uschia è terminà in impurtant pass dal project da transfurmaziun «Enavant SRG SSR» lantschà la fin dal 2024. Cun sias commembras e ses commembers resta il comité directiv da la SRG SSR francà e preschent en las regiuns linguisticas, durant ch’els concentreschan a medem temp lur forzas sur tut la gruppa e las dovra a moda pli intenziunada. 

Ina dunna cun fermas ragischs localas e cun experientscha mediala internaziunala 

Simona Caminada è activa dapi prest 15 onns en differentas funcziuns per la SRG SSR. En sia carriera da plirs onns sco collavuratura da medias e sco experta d’examens ad instituziuns da scolaziun da medias ha ella elavurà ina profunda chapientscha per tut ils geners da medias, da medias digitalas sur radio fin a televisiun. Ella ha blera experientscha sin il sectur da medias digital, en spezial quai che reguarda la cumbinaziun specifica da cuntegns linears e digitals fatgs per ina tscherta gruppa en mira. 

Caminada dat dumogn a l’entir repertori dal schurnalissem local fin a la rapportaziun internaziunala; il davos ha ella rapportà per SRF da Roma. 

Sia carriera ha la dunna grischuna da 39 onns cumenzà tar «La Quotidiana». Suenter ha ella fatg in praticum tar RTR, l’unitad regiunala da la SRG SSR. Il 2012 ha ella terminà ses studi a l’Universitad da Hamburg cun in master en schurnalissem. Quel ha ella fatg suenter il diplom da bachelor a l’Universitad da Turitg en publicistica e scienza da la communicaziun e dal film. Ella è maridada, ha in uffant ed abita cun sia famiglia a partir da la stad 2026 a Cuira. 

Far avanzar la midada digitala da RTR 

Sco nova directura vegn Simona Caminada a nizzegiar pli intensivamain il potenzial publicistic da RTR ed a purtar il program anc pli datiers al public, e quai cun dar attenziun speziala a giuvnas gruppas en mira. Ella sa referescha sapientivamain a la vasta savida ed experientscha dals teams da tut las regiuns en l’intschess da RTR. 

Simona Caminada: «Ensemen cun mes team futur vi jau sviluppar RTR ad in medium principal modern e digital per tut las Rumantschas e tut ils Rumantschs. RTR è la vusch e la fatscha da la SRG SSR en il Grischun, e quai duai era restar uschia per generaziuns futuras. Perquai fullain nus curaschusamain via ed empruvain novs formats digitals per l’entira SRG SSR. Sco la pli pitschna unitad da la SRG SSR è RTR numnadamain in’unitad flexibla e sperta quai che reguarda la realisaziun da novas ideas. Da quai po profitar tut la SRG SSR. Ed jau vegn a profitar da la savida e da l’experientscha dals teams da RTR. Per segirar a lunga vista nossa plazza sco unitad regiunala relevanta faschain nus avanzar RTR en barat direct cun il public, la politica e las instituziuns en il Grischun e sviluppain vinavant las punts tar ils purschiders da medias privats da la regiun.» 

Vincent Augustin, president da la SRG SSR Svizra Rumantscha (SRG.R): «RTR viva dal dialog quotidian cun la populaziun rumantscha, en sia lingua, amez ses mintgadi. Simona Caminada ha qua sias ragischs, ella enconuscha ils umans e las regiuns e sa tadlar tiers e construir punts. Cun ella a la testa resta RTR datiers dal public e rinforza a medem temp la diversitad e la coesiun da nossa regiun linguistica.» 

Susanne Wille, directura generala SRG SSR: «La midada digitala decida, sche nus cuntanschain noss public er anc damaun. Simona Caminada ha ina clera chapientscha per las sfidas strategicas da RTR e da la SRG SSR. Ella sa co che disas medialas sa spostan, ed ella ha il curaschi d’empruvar novas chaussas. Precis questa tenuta duvrain nus per sviluppar RTR vers l’avegnir digital e per dar a medem temp impuls a tut la SRG SSR. Ella è la dretga persuna per gidar a concepir questa midada.» 

Simona Caminada entra en sia nova funcziun il 1. da settember 2026. Fin sia entrada en uffizi maina in team transitoric interimisticamain l’unitad regiunala. 

Infurmaziun per las medias a Cuira 

Collavuraturas e collavuraturs da las medias han la pussaivladad d’emprender d’enconuscher oz Simona Caminada persunalmain en la sedia principala da RTR a Cuira. A partir da las 16.00 stat ella a disposiziun per dumondas ensemen cun Susanne Wille. P.pl. sa preannunziar via communicaziun(at)rtr.ch. 

Occupà ils teams da direcziun da SRF, RTS, RSI e dal sectur surregiunal Purschida 

En il rom dal project da transfurmaziun «Enavant SRG SSR» ha il comité directiv da la SRG SSR communitgà il zercladur da l’onn passà las pitgas da la nova structura d’organisaziun (vesair communicaziun a las medias La SRG SSR sa tschenta si da nov e nizzegia sinergias internas). Uschia nizzegia la SRG SSR sinergias internas e concentrescha sias forzas, durant ch’ella resta vinavant francada e preschenta en las regiuns. 

Dapi lura fa la SRG SSR avanzar sia transfurmaziun en il senn da questa structura d’organisaziun. Per pussibilitar ina collavuraziun pli intensiva sur las regiuns vegnan unifitgadas las structuras da direcziun da las unitads regiunalas SRF, RTS, RSI e RTR (vesair communicaziun a las medias La SRG SSR concretisescha ils plans per la transfurmaziun e la reducziun da plazzas da lavur planisada). Las direcziuns da fin ussa da RTR, SRF, RTS e RSI vegnan remplazzadas da teams da direcziun regiunals. La responsabladad publicistica per infurmaziun, cultura, divertiment, societad e savida resta vinavant en las unitads regiunalas. 

Sco ulteriur pass da questa transfurmaziun cumplessiva han ussa fixà Roger Elsener, directur SRF, Mario Timbal, directur RSI, Pascal Crittin, directur RTS e Nicolas Pernet, directur Purschida lur teams da direcziun definitivs resp. nominà els ensemen cun las societads regiunalas cumpetentas e proponì els al cussegl d’administraziun per l’elecziun. L’occupaziun dal team da direcziun RTR vegn a suandar bainprest, ussa che Simona Caminada è vegnida elegida sco nova directura RTR.  

Ils novs team da direcziun da SRF, RTS, RSI e Purschida cumenzan lur lavur a partir dal 1. da fanadur 2026 ensemen cun ils directurs respectivs. Els cumpiglian las suandantas commembras ed ils suandants commembers: 

SRF  

• Information: Beat Soltermann & Ursula Gabathuler  
• Unterhaltung: Manuela Diethelm  
• Kultur, Gesellschaft & Wissen: Antonia Seifert  
• Distribution: Laura Köppen  

RTS  

• Information: Christophe Chaudet 
• Société & Savoir: Linda Bourget  
• Culture & Divertissement: Luc Mariot  
• Distribution & Public: Tiphaine Artur  

RSI  

• Informazione: Gianreto Ceschi 
• Società & Scienze, Cultura e Intrattenimento: Lorenzo Erroi 
• Distribuzione & Pubblico: Lorenzo Buccella & Danny Masa 

Purschida 

• Sport: Roland Mägerle  
• Play+: Reto Peritz  
• Ficziun: Gabriella De Gara  
• Swissinfo: Larissa Bieler  
• Datas & IA d’interpresa: Thierry Zweifel 
• Public & Portfolio da purschida: Esther Weis & Samuel Epp  
• Servetschs d’accessibladad: Martin Spycher