La SRG SSR concretisescha ils plans per la transfurmaziun e la reducziun da plazzas da lavur planisada

La SRG SSR spetgan grondas sfidas. Fin l'onn 2029 sto ella spargnar var 270 milliuns francs, tranter auter perquai ch'il Cussegl federal ha decidì da reducir la taxa da medias. L'emprim pass da la reducziun da la taxa da medias succeda il schaner 2027. Perquai sto la SRG SSR spargnar gia fin lura 125 milliuns francs. Il medem mument sa mida il conturn a moda rasanta. Ils umans nizzegian las medias adina pli savens mo en furma digitala e la cuntrada mediala da la Svizra sco er a l'exteriur sa mida a moda radicala. 

La SRG SSR vul era vinavant porscher in program d'auta qualitad che cuntanscha tut las gruppas da la populaziun, sto dentant il medem mument reagir sin la reducziun dals meds finanzials. Per che quai gartegia, sa posiziunescha ella da fund ensi da nov e sa transfurmescha. Il zercladur da quest onn ha la direcziun da la SRG SSR communitgà co ch'ella vul prender a mauns questa transfurmaziun fundamentala (La SRG SSR sa posiziunescha da nov e nizzegia sinergias). En il rom dal project da transfurmaziun «Enavant SRG SSR» ha la SRG SSR en il fratemp gia fatg in emprim pass impurtant per concretisar quests plans: Ella ha definì la structura d'organisaziun futura, adattà la structura da direcziun e concretisà la reducziun da plazzas da lavur planisada.

Structuras adattadas per rinforzar la collavuraziun sur las regiuns ora

La SRG SSR concentrescha sias forzas, daventa pli digitala, pli efficazia e flexibla e collavura en l'avegnir pli ferm sur tut las regiuns ora. En vista a questas midadas adattescha ella sias structuras e ses process er en la direcziun. Per il 1. d'avrigl 2026 sminuescha la SRG SSR la direcziun. Da nov ha la direcziun dasper la directura set empè dad otg commembras e commembers – quai malgrà che la filiala tecnologica odierna SWISS TXT vegn integrada cumplainamain en la SRG SSR. Il dumber da la direcziun schlargiada resta sco oz tar trais commembras e commembers supplementars. La nova direcziun «purschida» unescha ils champs da la purschida e la distribuziun (vesair organigram sutvart). A medem temp sa mida la dimensiun da la direcziun «operaziuns» che unescha da nov la tecnologia e la producziun. «Jau cumbat vinavant per ina ferma SRG SSR. Perquai avanzain nus consequentamain la transfurmaziun. Sco ulteriur pass reducin e concepin nus da nov la direcziun.», di la directura generala Susanne Wille. 

Per che la SRG SSR possia vegnir manada a moda segira tras la transfurmaziun, vegnan la directura ed ils directurs actuals da SRF, RTS, RSI e RTR confermads. Era las manadras ed ils manaders da secturs e las directuras ed ils directurs ch'ins ha gia recrutà en vista a la nova organisaziun e ch'il cussegl administrativ ha affirmà, vegnan confermads en lur posts. Ils posts anc vacants da las novas direcziuns «operaziuns» e «purschidas» vegnan publitgads proximamain – dasper la plazza gia publitgada per la direcziun da SRF. A medem temp sa midan las structuras da direcziun en las regiuns. Quellas vegnan da nov unifitgadas per pussibilitar ina collavuraziun pli stretga tranter las regiuns. L'occupaziun definitiva dals teams da direcziun regiunals succeda fin la mesadad dal 2026 tras la directura u ils directurs da las unitads regiunalas.

Concretisà la reducziun da plazzas da lavur – la procedura da consultaziun vegn averta

Las finamiras da spargn actualas han – sco gia communitgà la stad – sfurzadamain era consequenzas per las collavuraturas ed ils collavuraturs. Cun resalva da la procedura da consultaziun vegn la SRG SSR a stritgar fin il 2029 totalmain 900 plazzas a temp cumplain en las regiuns. La directura generala Susanne Wille davart quest svilup: «Nus deplorain la reducziun da plazzas da lavur. Las decisiuns politicas ed il conturn, en il qual nus ans chattain sco interpresa da medias, n'ans laschan però nagin'autra letga. La SRG SSR realisescha questa reducziun da las plazzas a moda uschè responsabla e raschunaivla sco pussaivel ord vista sociala.»

In terz – circa 300 – da las en total 900 plazzas a temp cumplain vegn stritgà en il rom dal program da spargn current. Questa reducziun da plazzas è gia consultada ed en process. Fin il 2029 ston vegnir stritgadas ulteriuras 600 plazzas. Relaschadas èn inevitablas. Ina part da las 600 plazzas vegn reducida via la fluctuaziun e pensiunaments. La sminuziun da las plazzas da lavur vala cun resalva dal resultat da la procedura da consultaziun. En connex cun la reducziun da plazzas da lavur vegn applitgà il plan social da la SRG SSR.

Proxima fasa e realisaziun concreta

En la proxima fasa dal project «Enavant» vegn la SRG SSR a preparar la realisaziun da las decisiuns prendidas. Ils emprims secturs che vegnan a lavurar tenor il nov model èn las partiziuns dal persunal e da las finanzas. A partir dal schaner 2026 vegnan quests secturs manads communablamain sur l'entira SRG SSR. Las collavuraturas ed ils collavuraturs da questas partiziuns vegnan a lavurar vinavant en lur regiuns, dentant ad agir sco part da la gruppa SRG SSR ed uschia a procurar per dapli coerenza e sinergias tranter ils differents lieus.