Ils emetturs da Swiss Satellite Radio midan maun
Suenter ina procedura da tscherna averta e realisada cun premura ha la SRG SSR chattà duas novas possessuras per ils emetturs da Swiss Satellite Radio: CH Media surpiglia Radio Swiss Pop e la Digris AG maina vinavant Radio Swiss Classic e Radio Swiss Jazz. Tuttas duas cumpradras èn s'obligadas da mantegnair per almain dus onns l'orientaziun musicala e tematica dals emetturs.
Illustraziun: SRG SSR
La SRG SSR realisescha actualmain il project da transfurmaziun Enavant per daventar pli digitala, flexibla ed effizienta. Il medem mument sa reorganisescha ella sut las novas circumstanzas finanzialas e reagescha tranter auter sin la decisiun dal Cussegl federal da sbassar la taxa da medias (vesair la Communicaziun a las medias dals 14 da settember 2026). En connex cun questa nova orientaziun examinescha la SRG SSR era sia strategia da purschidas. En vista a questas midadas ha ella decidì da vender ils emetturs da Swiss Satellite Radio. Ils emetturs pon era vegnir gestiunads d'interpresas da medias privatas e cunquai ch'els emettan sulettamain musica na fan els tenor la concessiun betg part da l'incumbensa da la SRG SSR.
Suenter ina procedura da tscherna averta e realisada cun premura ha la SRG SSR chattà duas cumpradras adattadas per ils emetturs da Swiss Satellite Radio: CH Media surpiglia Radio Swiss Pop a partir dal schaner 2027, la Digris AG gestiunescha ils emetturs Radio Swiss Classic e Swiss Jazz a partir dal fanadur 2027. Il cussegl d'administraziun da la SRG SSR ha consentì la vendita ils 16 da settember 2026. Areguard il pretsch da vendita èn ins sa cunvegnids da mantegnair la discreziun.
La cuntinuitad per il public è garantida
En il process da vendita è la SRG SSR s'engaschada per il mantegniment dal caracter odiern dals emetturs da musica cumprovads ed appreziads dal public: Ils emetturs mantegnan lur orientaziun musicala d'enfin qua e cuntinueschan lur manaschi senza moderaziun e cun reclama decenta. La cumpart da musica svizra importa vinavant almain 50 pertschient. Plinavant è segirada la diffusiun via DAB+, plattafurmas da streaming e terzas plattafurmas sco era via gestiunaris da raits da cabels.
Las cundiziuns da vendita che la SRG SSR ha definì valan per dus onns. Suenter la scadenza da quest termin decidan las novas possessuras individualmain davart la concepziun dal program sco era davart la diffusiun e commerzialisaziun da lur programs.
La SRG SRR promova vinavant la musica svizra
Che la SRG SSR venda ils emetturs da musica na mida nagut vi da ses engaschi per la musica svizra. Cun la «Charta da la musica svizra» resta la SRG SSR obligada da promover musicistas e musicists da la Svizra e musica da noss pajais en ses program e d'emetter ina tscherta quota da producziuns da musica svizras.
Davart las cumpradras
CH Media
CH Media è ina da las pli grondas chasas da medias privatas da la Svizra ed unescha purschidas cun vasta derasaziun en ils secturs radio, televisiun, print e digital. Sco gruppa da radio privata la pli gronda dal pajais dispona l'interpresa d'ina experientscha da blers onns sco era da structuras etablidas per il manaschi e la diffusiun da programs da musica.
Contact: kommunikation(at)chmedia.ch, +41 58 200 50 10
Digris AG
Digris gestiunescha raits da DAB+ en Svizra, en Frantscha ed en la Gronda Britannia. Ella è responsabla per la diffusiun da passa 50 pertschient da tut ils emetturs da radio da DAB svizzers. Dapi il 2011 maina digris er il radio open broadcast.
Contact: Thomas Gilgen (thomas.gilgen(at)digris.ch), +41 44 552 48 56
Contact
Post da medias SRG SSR
Gianna Blum
058 136 21 21
media@srgssr.ch
