La SRG SSR e Movetia promovan il barat tranter las regiuns linguisticas

Gia per la quarta giada organisescha Movetia, l'agentura naziunala per promover il barat e la mobilitad, in'emna da barat en l'entira Svizra. Ella ha lieu quest onn dals 16 - 20 da november e creescha in spazi da temp per inscunters tranter las regiuns linguisticas svizras. En la furmaziun scolastica facilitescha ella la tschertga da classas partenarias, en la furmaziun professiunala pussibilitescha ella visitas curtas tranter emprendistas ed emprendists. Cumplettada vegn l'emna cun differentas occurrenzas ed iniziativas en l'entira Svizra. Ils 17 da november ha plinavant lieu a Berna in evenimaint da focus davart la furmaziun professiunala cun la surdada dal Premi naziunal da barat. La SRG SSR fa sco partenaria da medias era part da l'emna da barat. Moderaturas e moderaturs da tut las unitads regiunalas midan lur lieu da lavur usità e modereschan in'emissiun d'ina autra regiun linguistica.

Barat da moderatur:as tar SRF, RTS, RSI e RTR

La SRG SSR collia mintga di las regiuns linguisticas cun sia purschida. A chaschun da l'emna da barat naziunala ha lieu er quest onn in barat da moderaziun che reflectescha la diversitad linguistica da la SRG SSR e da la Svizra. Mardi, ils 17 da november moderescha per exempel Toni Poltera da RTR «Info3» tar Radio SRF. Ils 18 da november barattan Alessia Caldelari e Monika Schönenberger lur plazza da lavur: Caldelari preschenta a las 19.30 la «Tagesschau» da SRF per tudestg a Turitg, Schönenberger moderescha il «Telegiornale» da RSI per talian a Comano. En pli vegn Claudio Spescha (SRF) a moderar il magazin «Telesguard» da RTR. Sandro Derungs (SRF) vegn a manar tras il program da la damaun da Radio RTR e la finala vegn Marco Koller (SRF) a preschentar il magazin RTR-Info da mezdi e la saira. Ils 19 da november cuntinuescha il barat: SRF producescha «Schweiz aktuell» per franzos per l'emissiun da RTS «Couleurs locals». Viceversa segna l'emissiun da RTS «Couleurs locales» per tudestg per l'emissiun tar SRF. 

«Fauxpas linguistic»: Plurilinguitad cun umor

La quadrilinguitad da la Svizra confrunta nus tuttas e tuts adina puspè cun sfidas ed i dovra savens era improvisaziun per communitgar cun ses visavi. Ils teams da comedy da SRF 3, RTS Couleur 3, Rete Tre e RTR rimnan tals fauxpass linguistics da cumediants svizzers che han procurà per malchapientschas cun discurrer in'autra lingua naziunala. Las contribuziuns vegnan barattadas tranter las regiuns linguisticas ed integradas en ils programs da radio dals 16 fin ils 20 da november. Per social media datti in best-of naziunal sco era cumpilaziuns regiunalas.

Quatter programs da radio scuvran la Svizra

Il project da radio interregiunal «Die Anderen. Les Autres. Gli Altri. Ils Auters – Le tour de Suisse» terminescha ses viadi tematic tras las quatter regiuns linguisticas a chaschun da l'emna da barat naziunala. Inspirads dal tema annual «Transiziuns» scuvran Radio SRF 1, Rete Uno, RTS Première e RTR communablamain durant quatter dis tematics las atgnadads da la Svizra. Suenter ch'il project è stà la primavaira «al cunfin» en il Tessin, lura «sin punts» en la Rumantschia, il settember «a l'aua» en la Svizra franzosa, va uss la quarta ed ultima etappa en ina «aglomeraziun» da la Svizra tudestga, ad Emmen. Ils 18 da november emettan Radio SRF 1, Rete Uno, RTS Première e RTR en moda plurilingua or dal «Tramhüsli» plain simbolica ed illustreschan las particularitads d'aglomeraziuns svizras or da differentas perspectivas. Da las 20 fin las 21 emettan ils quatter programs communablamain in'emissiun da la saira quadrilingua che vegn ad esser d'udir live sin ils emetturs respectivs dals radios da la SRG SSR.