La SRG SSR realisescha mesiras da transfurmaziun e da spargn per il 2027

En il rom dal project da transfurmaziun Enavant sa posiziunescha la SRG SSR fundamentalmain da nov per segirar la persistenza da l’interpresa. Ella nizzegia sinergias, daventa pli digitala, pli flexibla e pli effizienta. Uschia procura ella per las premissas per pudair reagir sin las profundas midadas en la tecnologia ed en l’utilisaziun da las medias. Il medem mument sto la SRG SSR spargnar, tranter auter sin fundament da la reducziun da la taxa da medias decidida dal Cussegl federal, var 270 milliuns francs fin il 2029 – 80 milliuns gia fin il 2027. Sco communitgà il zercladur cuntansch’ins circa 95 pertschient da quests respargns sur structuras, process e modas da producziun per proteger il meglier pussaivel il program en l’interess dal public (communicaziun a las medias zercladur 2026). 

La SRG SSR cumenza cun Enavant l’emprim tar sias atgnas structuras d’organisaziun. Dapi il schaner passà vegn realisà pass per pass il nov model d’organisaziun (communicaziun a las medias november 2025). Secturs sco Finanzas, Human Ressources, Operaziuns e Purschida vegnan da nov manads sur tut la SRG SSR cun teams dal fatg francads regiunalmain. En il sectur Purschida vegnan tranter auter concentrads e manads sur tut la SRG SSR il sport e la ficziun sco era la plattafurma da streaming Play+. En il sectur Operaziuns han ins reunì ils secturs da producziun e da tecnologia. Uschia han ins reducì gia ils ultims mais parallelissems ed extendì la collavuraziun da las regiuns linguisticas. 

Realisaziun da las mesiras da spargn per il 2027: focus sin proteger il program 

Las mesiras da spargn per il 2027 han ins entant precisà ed ellas èn ussa prontas per la realisaziun. La gronda part dals respargns en l’autezza dad 80 milliuns francs cuntansch’ins cun adattar las structuras, ils process e las modas da producziun. Sco gia communitgà il zercladur èn, considerond la dimensiun da las summas da spargn, inevitablas midadas en la purschida da program. Nua ch’igl è pussaivel fan ins respargns a l’intern da formats existents empè da stritgar entirs programs. En pli sa concentrescha la SRG SSR era quai che reguarda il program anc pli fitg sin la collavuraziun da las regiuns linguisticas. 

Quests princips valan era per ils secturs manads sur tut la SRG SSR Purschida ed Operaziuns. En il sectur Purschida nizzegian ins pli fitg en spezial en connex cun sport e ficziun pussaivladads da collavuraziun che surpassan las regiuns linguisticas. En il sectur Operaziuns èn en il focus dals respargns las prestaziuns dal manaschi e da la tecnica. Plinavant realiseschan ils secturs da support a l’intern da la SRG SSR – Finanzas, HR, Stab e Communicaziun – incumbensas da spargn surproporziunalas, per ch’il program restia protegì uschè bain sco pussaivel en il senn dal public. 

«Ils respargns necessaris pretendan grondas midadas da tut la SRG SSR. Decisiv è che nus realiseschian ussa quellas cun responsabladad. Per quai rinforzain nus la collavuraziun da las regiuns linguisticas. Il medem mument resta centrala per nus l’enragischaziun regiunala. Er en il futur restain nus cun noss studios en tut las regiuns linguisticas datiers da noss public», di il president dal cussegl d’administraziun da la SRG SSR Jean-Michel Cina. 

La SRG SSR reducescha posiziuns directivas sin ils pli auts nivels  

Il medem mument fa la SRG SSR avanzar la realisaziun dal nov model d’organisaziun. Ils trais nivels directivs ils pli auts èn entant occupads prest cumplettamain. Sin quels nivels reducescha la SRG SSR en cumparegliaziun cun il 2024 passa 20 pertschient da las posiziuns directivas. La cumpart da dunnas importa passa 40 pertschient. Uschia è la relaziun tranter las schlattainas sin quels nivels prest congruenta cun la relaziun da las schlattainas da tut la SRG SSR. Las cifras-clav definitivas davart la cumposiziun da la nova organisaziun directiva èn dadas suenter ch’il process d’occupar las plazzas è terminà. 

Cun occupar las novas funcziuns directivas procura la SRG SSR per las premissas per cuntinuar a realisar la transfurmaziun. Ils novs teams da direcziun fan avanzar la transfurmaziun en lur secturs e garanteschan la realisaziun da las mesiras da spargn e da persunal necessarias. Las mesiras da spargn vegnan er ad avair consequenzas per il persunal. Ina part da la reducziun da plazzas vegn a succeder cun fluctuaziun e pensiunaments. En connex cun la reducziun da plazzas vegn applitgà il plan social da la SRG SSR. 

«Nus essan obligads a noss public. Perquai realisain nus l’incumbensa da spargn politica uschia che cula uschè bler sco pussaivel da mintga franc da la taxa da medias en il program. Per quai mettain nus er en dumonda consequentamain nossas atgnas structuras: Sin ils nivels directivs ils pli auts reducin nus passa 20 pertschient da las posiziuns directivas. Il medem mument protegin nus il program il meglier pussaivel», di la directura generala da la SRG SSR Susanne Wille e constatescha: «Questas midadas èn pretensiusas per l’interpresa ed en spezial per las collavuraturas ed ils collavuraturs pertutgads. Ellas èn però necessarias, per che la SRG SSR daventia pli digitala, pli effizienta e pli flexibla e per ch’ella possia prestar er en l’avegnir in ferm service public per la Svizra.» 

Concretisaziun en las regiuns linguisticas 

La communicaziun da las mesiras da spargn per il 2027 ha lieu ils proxims dis en las quatter regiuns linguisticas. Las regiuns infurmeschan davart las consequenzas concretas per lur program e per lur collavuraturas e collavuraturs. 

•  14-09-2026 – SRF / Deutschschweiz 
• 15-09-2026 – RTS / Suisse romande 
• 16-09-2026 – RSI / Svizzera italiana 
• 17-09-2026 – RTR / Svizra rumantscha 

Ulteriurs respargns fin il 2029 

Cun las mesiras per il 2027 n’è la transfurmaziun da la SRG SSR betg terminada. Fin il 2029 sto la SRG SSR spargnar totalmain var 270 milliuns francs. Las ulteriuras mesiras da transfurmaziun e da spargn per ils onns 2028 e 2029 vegnan concretisadas pass per pass en il rom da la planisaziun da las finanzas en ils secturs ed en las regiuns. 

Er ils proxims onns vegn la SRG SSR ad adattar, a sviluppar ed a renovar cuntinuadamain sia purschida da program.