La transfurmaziun avanza, las mesiras da spargn per il 2027 èn concretisadas – focus sin las structuras ed ils process per proteger il program

Per incumbensa dal cussegl d’administraziun SRG SSR ed en il rom da ses project da transfurmaziun «Enavant» sa posiziunescha la SRG SSR da nov per garantir la persistenza futura da l'interpresa. Uschia tegna ella quint da las grondas transfurmaziuns en la cuntrada mediala. Cun Enavant daventa la SRG SSR pli digitala, pli flexibla e pli effizienta. A medem temp sto ella spargnar 270 milliuns francs fin il 2029, tranter auter pervi da la decisiun dal Cussegl federal da sbassar la taxa da medias. Per quest intent ha la SRG SSR concretisà ils ultims mais las mesiras da spargn necessarias per l'onn 2027 en il rom da ses project da transfurmaziun «Enavant». Quai ha ella fatg sco annunzià la stad passada (vesair la communicaziun a las medias La SRG SSR sa tschenta si da nov e nizzegia sinergias internas) cun la finamira da spargnar en las structuras ed ils process per proteger il meglier pussaivel il program – en l'interess dal public.

Uschia realisescha la SRG SSR las mesiras da spargn

La SRG SSR vul cuntanscher ils respargns fin il 2029 surtut cun adattar las structuras, ils process, las modas da producziun ed ils partenadis. A basa da quai realisescha la SRG SSR las mesiras da spargn per l'onn 2027 concretamain sco suonda:

• Tranter auter simplifitgescha la SRG SSR las structuras da direcziun, reducescha duplicitads grazia ad in nov model d'organisaziun cun secturs che vegnan manads a moda centrala e cun teams spezialiads en las regiuns (vesair la communicaziun a las medias La SRG SSR concretisescha ils plans per la transfurmaziun e la reducziun da plazzas da lavur planisada) ed optimescha las surfatschas d'immobiglias per la producziun e l'administraziun. Uschia spargna la SRG SSR fin il 2027 en total 35,2 milliuns francs. Tar l'optimaziun da las surfatschas d'immmobiglias tutga era la dischlocaziun da la sedia a Berna. Il medem mument resta l'enragischaziun regiunala part da la DNA da la SRG SSR. La SRG SSR s'engascha en favur da sias sedias regiunalas.
• Las mesiras planisadas per render pli effizients ils process, reducir il dumber dals gremis, concentrar la planisaziun e la gestiun da la producziun e nizzegiar a moda consequenta ils cuntegns cuminaivels sur tut las regiuns ora permettan da spargnar 9,1 milliuns francs fin il 2027.
• Modas adattadas e pli effizientas da producir il program cun in resultat uschè cumparegliabel sco pussaivel gidan da spargnar 13,2 milliuns francs.
• L'examinaziun e l'adattaziun dals partenadis permettan a la SRG SSR da spargnar supplementarmain 2,7 milliuns francs fin il 2027 – igl è per exempel previs da reorganisar il Premi dal film svizzer en collavuraziun cun ils partenaris.
• Ulteriurs respargns da var 3,7 milliuns francs fin il 2027 cuntanscha la SRG SSR cun adattaziuns en la purschida da program: per exempel cun la focussaziun communitgada gia il 2025 en la producziun dal sport (Eishockey National League ed UEFA Club Competitions, vesair la communicaziun a las medias Fokussierung bei der Sportproduktion), la decisiun conscienta da betg pli candidar per ils dretgs da transmissiun da la UEFA Champions League a partir da la stagiun 2027/28, cun in focus pli ferm sin la primetime tar ils segunds chanals da televisiun u cun dar ina paisa pli gronda a las emnas da radio effizientas, augmentond il medem mument las repetiziuns da las emissiuns emnilas.

La differenza visavi la finamira da spargn dad 80 milliuns francs fin il 2027 è d'attribuir a las mesiras supplementaras sin stgalim da la SRG SSR ed ad effects unics.

«Cun reorganisar cumplettamain la SRG SSR spargna ella 95 pertschient en las structuras ed ils process» 

La directura generala Susanne Wille constatescha: «Per che la SRG SSR restia ferma e cuntanschia ils umans en Svizra er en l'avegnir, reorganisain nus noss'interpresa da funs ensi. Nus promovain consequentamain la transfurmaziun e creain las premissas per ina SRG SSR moderna, flexibla e digitala. Mesiras da spargn èn dentant indispensablas sin fundament da las directivas politicas. Nus avain ditg gia la stad passada: L'emprim spargnain nus en las structuras ed ils process per proteger noss program il meglier pussaivel, en l'interess dal public. Nus avain in'obligaziun envers noss public», conferma Wille.

En connex cun l'impurtanza da la transfurmaziun da l'interpresa Enavant accentuescha ella: «Cun Enavant creain nus las premissas per ina SRG SSR moderna, ferma e digitala. Grazia a las mesiras da simplifitgar las structuras, unir las forzas e collavurar pli stretgamain, creain nus il spazi d'agir necessari per cuntanscher 95 pertschient dals respargns sur structuras, process e modas da producziun. Cun las structuras decentralas da pli baud fissan las consequenzas per il program stadas considerablamain pli grondas. A medem temp sviluppain nus vinavant la SRG SSR – ed ins vegn er a remartgar midadas en il program.»

Las mesiras da spargn vegnan concretisadas vinavant ils proxims mais e la realisaziun da quellas vegn preparada en las unitads regiunalas ed en ils secturs da la SRG SSR. A medem temp determinescha la SRG SSR ils ulteriurs respargns per ils onns 2028 e 2029.

La SRG SSR sto spargnar var 270 milliuns francs fin il 2029

La SRG SSR sto spargnar var 270 milliuns francs fin il 2029, tranter auter sin fundament da la reducziun da la taxa da medias decidida dal Cussegl federal. L'emprima reducziun entra en vigur il schaner 2027. Consequentamain sto la SRG SSR realisar respargns substanzials fin a quel termin.

Thomas Egger, directur Finanzas SRG SSR, constatescha: «Las calculaziuns actualas conferman l'effect dals programs da spargn actuals, suenter che nus avain intensivà quels en vista a l'incumbensa da spargnar 270 milliuns francs. Da quai fa per exempel era part la reoccupaziun restrictiva da las plazzas libras.

A medem temp èn sa meglieradas tschertas previsiuns – per exempel davart ils retgavs commerzials. Quels èn sa stabilisads in zichel il davos temp, tranter auter pervi d'occurrenzas grondas. Tut en tut sa reduceschan ellas dentant vinavant. Era l'augment dals custs è sa franà a curta vista, senza ch'il squitsch a media ed a lunga vista sa reduceschia. Ultra da quai resguardain nus en nossa planisaziun era novas tendenzas opppostas. En tut ans permetta quai da reparter ils respargns a moda pli equilibrada sur ils onns – vi da la finamira da spargnar 270 milliuns francs fin il 2029 na sa mida actualmain nagut.» En vista a questa situaziun pon ils respargns necessaris da totalmain 270 milliuns francs vegnir repartids a moda pli eguala sur il temp. L'import da respargn necessari per l'onn 2027 sa reducescha uschia sin radund 80 milliuns francs visavi ils 125 milliuns francs communitgads fin ussa.