La SRG SSR sa tschenta si da nov e nizzegia sinergias internas

L’utilisaziun da medias da la glieud sa mida rasantamain. Gia oz vegnan consumads dapli che la mesadad dals cuntegns medials sin chanals digitals – e questa tendenza crescha fermamain. La SRG SSR stat en concurrenza cun numerus purschiders digitals internaziunals. Las entradas da reclama regredeschan pli e pli. Ils ultims diesch onns ha la SRG SSR pers passa 160 milliuns francs da sias entradas commerzialas. 

Ina clera incumbensa da spargnar – ma sulettamain spargnar na basta betg 

Il Cussegl federal ha decidì da reducir la taxa da medias per chasadas a partir dal 2027 fin il 2029 en dus pass da 335 sin 300 francs e da deliberar ulteriuras interpresas da la taxa. La reducziun da la taxa da medias, la diminuziun da las entradas commerzialas sco er la chareschia currenta han per consequenza che la SRG SSR sto – tenor las calculaziuns actualas – spargnar fin l’onn 2029 circa 17 pertschient u 270 milliuns francs da ses preventiv en cumparegliaziun cun l’onn 2024. Quai signifitga concretamain che la SRG SSR sto spargnar 215 milliuns francs gia sin l’entschatta dal 2027. Quai è in grond import entaifer curt temp che na po betg vegnir repartì, sco fatg fin qua, sin las unitads regiunalas SRF, RTR, RTS e RSI. 

«La SRG SSR sto realisar l’incumbensa politica da spargnar. Mo sulettamain cun spargnar na dumogna la SRG SSR betg las sfidas che spetgan. Ella sto sa tschentar si da nov da fund ensi, per ch’ella possia porscher a las persunas en Svizra er vinavant in program ferm en tut las quatter linguas naziunalas», di Jean-Michel Cina, president dal cussegl d'administraziun da la SRG SSR.

Concentrar las forzas 

Il cussegl administrativ ed il comité directiv da la SRG SSR han decidì da pensar da nov la SRG SSR sco organisaziun e da crear novas structuras, per che l’entira gruppa da la SRG SSR possia en l’avegnir collavurar meglier sur tut las regiuns or e concentrar las forzas (vesair infobox). Quai pertutga p.ex. ils secturs da funcziun resursas umanas, finanzas e tecnologia/IT. La directura generala da la SRG SSR Susanne Wille: «La SRG SSR resta francada en tut la Svizra. La preschientscha en las regiuns e la vischinanza al public restan centralas. Ma nus nizzegiain sinergias internas per far vinavant in ferm program cun damain daners. Nus spargnain tar las structuras ed ils process per proteger il schurnalissem uschè bain sco pussaivel. Cler è dentant er che nus na pudain betg spargnar questa summa senza effects sin la purschida.» 

La nova structura da la SRG SSR è in emprim resultat dal project da transfurmaziun «Enavant SRG SSR» da tut l’interpresa ch’il cussegl d’administraziun e la directura generala han lantschà l’atun passà. En la proxima fasa vai per elavurar en detagl la nova structura d’organisaziun ed ils novs process. La realisaziun da la nova organisaziun succeda pass per pass e cumenza l’entschatta dal 2026. Las mesiras da spargn previsas vegnan er ad avair consequenzas per las collavuraturas ed ils collavuraturs. La SRG SSR sa stenta da realisar quellas a moda uschè responsabla e sociala sco pussaivel. Ina valitaziun exacta dal dumber da collavuraturas e collavuraturs pertutgads vegn examinada actualmain. 

Nizzegiar las fermezzas cumprovadas  

La basa per questa decisiun è stada in’analisa cumplessiva. Ella mussa: la SRG SSR è cun sias marcas regiunalas damanaivel dal public. Otg da diesch persunas en Svizra nizzegian almain emnilmain la purschida da las unitads d’interpresa RSI, RTR, RTS e SRF ed èn fitg cuntentas cun ils cuntegns. Las collavuraturas ed ils collavuraturs da la SRG SSR disponan d’autas cumpetenzas dal fatg en divers secturs. La SRG SSR porscha cun success cuntegns schurnalistics sin tut ils chanals. La spierta plurilingua è unica entaifer la Svizra. Questas fermezzas vul la SRG SSR mantegnair. 

L’analisa ha però er mussà: Quai ch’ha fatg ferma la SRG SSR en il passà – il focus sin ils chanals linears radio e televisiun, la ferma differenziaziun linguistic-regiunala e las unitads d’interpresa decentralas – ha manà a structuras creschidas istoricamain. Quellas èn per part cumplexas e difficulteschan la coordinaziun. En vista a la transfurmaziun tecnologica, a la midada accelerada quai che reguarda l’utilisaziun da las medias e pervi d’in rom finanzial pli bass ston questas structuras vegnir simplifitgadas. 

Daventar pli digitala, pli effizienta, pli movibla  

Uschia ha mintga regiun linguistica ses agens secturs da funcziun sco finanzas, resursas umanas e tecnologia/IT. I manca ina mesiraziun da success unifitgada sco era standards che valan en l’entira interpresa per la planisaziun e la direcziun da la producziun. Ultra da quai vegnan utilisads mo trais fin tschintg pertschient dals cuntegns da la SRG SSR da dapli ch’ina unitad d’interpresa. En l’avegnir vul la SRG SSR collavurar pli ferm sur tut las regiuns per sviluppar da cuminanza ils cuntegns e per derasar quels en tut las quatter regiuns linguisticas ed intschess culturals da la Svizra. 

La nova organisaziun permetta da spargnar custs er a lunga vista, d’orientar consequentamain la purschida als basegns ed a las disas dal public e da coordinar meglier ils cuntegns sur las regiuns ora. Ils process ed ils standards vegnan unifitgads. Uschia po l’interpresa vegnir manada meglier. La SRG SSR daventa pli digitala, pli effizienta e pli movibla – e resta francada fermamain en las regiuns.  

Avis: Independentamain dad «Enavant SRG SSR» èn necessarias gia per il 2026 mesiras da spargn a curta vista, perquai che las entradas commerzialas èn sa diminuidas e perquai che la chareschia na vegn betg pli gulivada cumplettamain. Damaun, il 1. da fanadur, infurmeschan las unitads d’interpresa da la SRG SSR pertutgadas separadamain en chaussa.