La procedura da consultaziun è terminada – la dimensiun da la reducziun da plazzas resta nunmidada

Durant la procedura da consultaziun previsa da la lescha han tut las collavuraturas e tut ils collavuraturs pudì inoltrar dals 25 da november fin ils 14 da december propostas co ch'ins pudess evitar relaschadas u mitigiar lur consequenzas. Suenter in'examinaziun premurusa da las propostas inoltradas davart ils pli differents champs tematics n'èsi betg stà pussaivel da reducir il dumber total da plazzas che ston vegnir stritgadas. Igl è sa mussà tranter auter che bleras propostas èn congruentas cun la strategia previsa dal project da transfurmaziun Enavant.  

Ils detagls da la reducziun da plazzas vegnan concretisads las proximas emnas ed ils mais suandants,  e quai a basa dal plan social da la SRG SSR. In terz da las plazzas che ston vegnir stritgadas, damai var 300 da las totalmain 900 plazzas a temp cumplain, vegn reducì en il rom dal program da spargn actual. Questa reducziun da plazzas è gia stada en consultaziun e vegn realisada da preschent. Fin il 2029 sto la SRG SSR damai reducir ulteriuras 600 plazzas. Relaschadas èn inevitablas. Ina part da las 600 plazzas vegn reducida via fluctuaziuns e pensiunaments. 

La SRG SSR spetgan grondas sfidas. Ella sto spargnar fin l'onn 2029 var 270 milliuns francs, tranter auter perquai ch'il Cussegl federal ha decidì da reducir la taxa da medias. L'emprim pass da questa reducziun succeda il schaner 2027. Perquai sto la SRG SSR spargnar gia fin lura 125 milliuns francs.

A partir dal 1. d'avrigl lavuran ulteriurs secturs tenor il nov model d'organisaziun 

Il zercladur da l'onn passà ha la direcziun generala da la SRG SSR infurmà co ch'ella vul proceder per realisar la transfurmaziun Enavant (vesair la communicaziun a las medias Die SRG stellt sich neu auf und rückt näher zusammen). Il november 2025 ha la SRG SSR fatg in emprim pass impurtant per concretisar quests plans: Ella ha tranter auter creà novas structuras e process per rinforzar la collavuraziun futura sur tut las regiuns or e ha redimensiunà la direcziun generala. (vesair la communicaziun a las medias SRG konkretisiert Transformationspläne und den geplanten Stellenabbau). 

A partir dal 1. d'avrigl lavuran ulteriurs secturs da la SRG SSR tenor il nov model d'organisaziun annunzià la stad, che sa basa sin il project da transfurmaziun Enavant. Suenter la partiziun da persunal e da finanzas, ch'èn organisadas gia dapi il schaner 2026 tenor quest model, vegnan restructurads tenor ils medems criteris en il futur er ils secturs purschida, operaziuns, stab e communicaziun ed affars publics. Las collavuraturas ed ils collavuraturs da quests secturs restan vinavant en lur regiuns, lavuran dentant sco part da la gruppa SRG SSR e gidan uschia da promover la coerenza e las sinergias tranter ils lieus.