La cultura è ina part centrala da la purschida da la SRG SSR

La SRG SSR ha laschà analisar sistematicamain sia purschida redacziunala. Per l'emprima giada è stada en il center la cultura. Il studi da l'institut Mileva a Toffen/BE sa basa sin in'analisa dal cuntegn standardisada da 4890 contribuziuns redacziunalas da televisiun, audio/podcasts, artitgels online e cuntegns da social media. El ha examinà in'emna construida, vul dir cumpilada tenor il princip da la casualitad, durant l'onn 2025. Uss èn avant maun ils resultats davart las prestaziuns culturalas en la purschida redacziunala.

Tenor il studi «Zwischen Jodeln, Jazz und Jugendliteratur» han sur tut ils chanals da la SRG SSR 28,1 pertschient da las contribuziuns redacziunalas analisadas in connex cun la cultura. La cultura è represchentada particularmain en la televisiun (36,6 pertschient) ed en il sectur audio/podcast (32,0 pertschient). Tar las purschidas digitalas è la quota pli bassa (online: 11,1 pertschient, social media: 15,0 pertschient). En las medias socialas vegnan cuntegns culturals dentant publitgads surproporziunalmain savens sco video (51,4 pertschient vs. 29,3 pertschient tar auters cuntegns). Sin social media vegn la cultura pia preschentada intenziunadamain en formats che attiran blera attenziun.

Sch'ins resguarda la dimensiun da las contribuziuns, daventa l'impurtanza da la prestaziun culturala da la SRG SSR anc pli evidenta: En il sectur audio/podcast è passa la mesadad da l'entir temp d'emissiun da contribuziuns redacziunalas betg ficziunalas (51,5 pertschient) deditgà a cuntegns culturals.

La SRG SSR porscha ina gronda varietad tematica

La retschertga mussa in vast spectrum da temas culturals. Spezialmain savens rapporta la SRG SSR davart isanzas (14,2 pertschient), la musica populara (11,8 pertschient), il film (10,9 pertschient) e la musica classica (10,2 pertschient). Plinavant vegnan era resguardadas regularmain furmas d'expressiun culturalas main enconuschentas: la pli gronda diversitad tematica sa mussa en la televisiun, ina pli ferma concentraziun sin la musica percunter al radio.

Ina constataziun centrala pertutga la rolla da la SRG SSR sco actura en il sectur cultural: Eveniments inscenads medialmain represchentan cun 40,8 pertschient la pli gronda cumpart da la rapportaziun culturala. Uschia na sa preschenta la SRG SSR betg mo sco intermediatura, mabain era sco producenta da cuntegns culturals. En pli rapporta ella davart eveniments culturals che han lieu ordaifer las medias (36,6 pertschient) e fa recensiuns da cudeschs u films e purtrets (22,6 pertschient). 

Enragischaziun regiunala e sguard sur ils cunfins naziunals 

La rapportaziun culturala da la SSR è enragischada fermamain en las regiuns linguisticas respectivas: Tar SRF sa referescha la maioritad da las contribuziuns a la Svizra tudestga (57,1 pertschient), tar RTS a la Svizra romanda (58,4 pertschient), tar RSI a la Svizra italofona (50,1 pertschient) e tar RTR a la Svizra rumantscha (78,6 pertschient) – tut tenor unitad regiunala vegn mess in focus supplementar sin l'exteriur da medema lingua. La SRG SSR rapporta era da la cultura internaziunala, en spezial da pajais vischins.  

Auta visibilitad d'acturas e d'acturs da la cultura

En passa trais quarts da las contribuziuns culturalas renda la SRG SSR visib:las actur:as da la cultura concret:as sco individis, gruppas, instituziuns u uniuns. Questas contribuziuns s'orienteschan fermamain a persunas: en 85,2 pertschient dals cas èn las acturas ed ils acturs persunas activas sin il champ cultural, en ils ulteriurs 14,8 pertschient actur:as instituziunal:as. Ultra da quai mussan ils resultats potenzials da svilup areguard la repartiziun da las schlattainas: radund dus terzs da las acturas e dals acturs visib:las èn umens, strusch in terz dunnas. 

Tut en tut conferman ils resultats che la SRG SSR adempleschia sia incumbensa legala: Tenor la Lescha da radio e televisiun e la concessiun contribuescha ella cun sia purschida a la diversitad culturala, a la promoziun da l'identitad svizra sco er al barat cultural entaifer il pajais. Il studi furnescha per l'emprima giada ina basa cumplessiva e cumparegliabla che sa funda sin datas per render visiblas e sviluppar vinavant questas prestaziuns. 

Il studi cumplet è disponibel sut: Bericht zu den Kulturleistungen der SRG