La SRG SSR va sin turnea svizra cun in nov project da radio interregiunal

«Die Anderen. Les Autres, Gli Altri. Ils Auters  –  Le tour de Suisse» emprova da respunder a la dumonda fundamentala: Tge ans separa e tge ans collia en Svizra? Cun istorgias e discussiuns autenticas envida la SRG SSR il public da radio da scuvrir la ritgezza da la Svizra plurilingua e culturalmain multifara – en quatter etappas ed en quatter linguas.
 
Emissiuns en directa durant l'entir di sin ils emprims chanals da radio da SRF, RTS, RSI e RTR permettan a las audituras ed als auditurs da s'approfundar en ina regiun linguistica ed en ses tema dal di. Ultra da quai furneschan las reportras ed ils reporters contribuziuns tematicas da lur regiun d'origin, uschia ch'i sa sviluppa in maletg naziunal cun numerusas fassettas. La finiziun culminanta furma mintgamai in'emissiun quadrilingua  che vegn preschentada da las 20.00 fin las 21.00 sin tut ils quatter programs. Ella renda udibla e visibla la diversitad culturala e linguistica da la Svizra.

«Die Anderen. Les Autres. Gli Altri. Ils Auters – Le tour de Suisse» cumpiglia quatter dis spezials ch'èn deditgads mintgamai ad ina regiun linguistica ed ad in tema dal di:

• 25 da mars 2026 – Tessin: «Al cunfin» cun l'Italia: tranter la cultura, l'economia ed il mintgadi da las cunfinarias e dals cunfinaris.  
• 27 da matg 2026 – Rumantschia: «Sin punts»: passadis che collian las cuminanzas alpinas. 
• 18 da settember 2026 – Svizra romanda: «Sper l'aua»: lung las vias d'aua istoricas e las sfidas scientificas. Tge consequenzas che la midada climatica ha per l'aua e per nossas vitas sper l'aua. 
• 18 da november 2026 – Svizra tudestga: «En l'aglomeraziun»: la zona suburbana sco lieu da l'inscunter e dal barat tranter la citad e la champagna.

«Le tour de Suisse» cumenza ils 25 da mars en il Tessin

L'emprim di spezial, ils 25 da mars, stat en il focus il Tessin e sia vischinanza geografica e culturala cun l'Italia. Durant l'entir di emettan las emprimas staziuns da radio da la SRG SSR cuntegns da las quatter regiuns linguisticas. Ultra da quai emettan radio SRF 1, Rete Uno, RTS Première (da las 10.00 fin las 11.00) e RTR (da las 11.00 fin las 12.00) mintgamai in'ura en directa dal cunfin a Brusata (CH) / Bizzarone (IT).

Il public emprenda d'enconuscher la vita ed il mintgadi a la duana, po guardar sur las spatlas da las emploiadas e dals emploiads da duana e vegn a savair da las persunas che vivan en la vischinanza dapli davart ils cunfins culturals. Ultra da quai rapportan ils radios da la lavur da mintgadi da las cunfinarias e dals cunfinaris. La saira s'inscuntran las reportras ed ils reporters da las quatter regiuns linguisticas en il studio da RSI a Comano per preschentar ils puncts culminants dal di en in'emissiun da radio naziunala quadrilingua. Quella vegn transmessa en directa da las 20.00 fin las 21.00 sin tut ils quatter emetturs – in novum per la SRG SSR.