Resultat annual 2025: in lev minus en il rom da la transfurmaziun

Il 2025 è stà marcà d'occurrenzas grondas d'impurtanza naziunala, tranter auter dal Eurovision Song Contest (ESC) a Basilea, dal Campiunadi europeic da ballape da las dunnas (UEFA Women's EURO) en Svizra e da la Festa federala da lutga e dals gieus alpesters (ESAF) a Mollis. La SRG SSR ha accumpagnà quellas a moda cumplessiva ed ha procurà per regurdientschas nunemblidaivlas per il public. Quai demussan ils dumbers d'aspectaturas e d'aspectaturs impressiunants: En media han 965'000 persunas persequità las quatter partidas da la squadra naziunala svizra a la UEFA Women's EURO 2025, quai che correspunda ad ina quota da participaziun al martgà da 59,1 pertschient durant il meglier temp d'emissiun. La cursa rapida al Lauberhorn ha attratg en media 1'221'000 persunas ed ha cuntanschì ina participaziun al martgà da 77,5 pertschient. En total cuntanschain nus noss public en tut las linguas ed en tut las regiuns, surtut er ils giuvens creschids. Il diever dals chanals da la SRG SSR resta aut: 81 pertschient da la populaziun da 15 onns ensi nizzegian almain ina giada l'emna las purschidas da la SRG SSR al radio, a la televisiun, sin las paginas-web, via las apps u las medias socialas. 

Gia l'onn 2025 è stà marcà da la transfurmaziun cumplessiva Enavant. En il rom da quella creescha la SRG SSR novas structuras e novs process, promova ina collavuraziun pli stretga tranter las regiuns e s'orientescha per l'avegnir consequentamain als basegns dal public che sa midan. A medem temp ha ella era lantschà mesiras per sbassar ils custs en vista a la reducziun da las taxas per las chasadas a partir dal 2027, decididas dal Cussegl federal. 

Las occurrenzas grondas han minimà la sminuziun dals retgavs commerzials 

La SRG SSR ha generà il 2025 in retgav da gestiun dad 1,56 milliardas francs ed ha concludì l'onn cun ina perdita da 2,9 milliuns francs. Il retgav da la taxa da medias è sa sbassà per 33,4 milliuns francs visavi l'onn precedent. Il retgav da las reclamas è 4,1 milliuns francs pli bass che l'onn precedent. El ha dentant pudì vegnir minimà per part grazia a las entradas da sponsuradis tar eveniments da sport gronds e grazia al ESC. Las entradas dals programs percunter èn s'augmentadas per 7,0 milliuns francs en cumparegl cun l’onn passà – per exempel grazia als dretgs da retransmissiun – ed uschia è il retgav commerzial creschì en total per 3,1 milliuns francs. Era l'ulteriur retgav da gestiun serra cun in plus da 26,8 milliuns francs ch'è d'attribuir tranter auter als servetschs per la transmissiun da l'ESC ed ad in gudogn cun la vendita d'immobiglias. 

Damain custs da las pajas e damain collavuraturas e collavuraturs 

Las expensas da manaschi èn s'augmentadas per 11,4 milliuns francs visavi l'onn precedent, surtut pervi da remessas per la restructuraziun da l'interpresa. Las adattaziuns fatgas mussan effect: Ils custs da las pajas effectivs èn sa reducids per 15,6 milliuns francs, cunquai ch'il dumber da collavuraturas e da collavuraturs è vegnì sminuì per 248 FTE (-4,3 pertschient). Cun far remessas da 49,7 miu. francs en il quint annual 2025 èn ils custs dal plan social per l'ulteriura reducziun dal persunal fin il 2029 gia cuntegnids en la bilantscha e n'engrevgeschan betg ils resultats futurs. Questas remessas èn er il motiv che las expensas dal persunal èn s'augmentadas per var 23,0 miu., malgrà ch'ils custs da las pajas èn sa reducids. Uschia creescha la SRG SSR spazi per mesiras orientadas al futur en il rom da la transfurmaziun instradada. 

Las investiziuns en bains materials ed immaterials han muntà a 105,3 milliuns francs ed èn uschia 5,9 milliuns francs pli autas che l'onn precedent. L'onn da gestiun current ha la SRG SSR fatg amortisaziuns da 74 milliuns francs, quai che correspunda a 0,5 milliuns francs dapli che l'onn precedent. Las novas localitads da RTS sin il campus da l'EPFL ad Ecublens vegnan actualmain prendì en funcziun pass per pass, entant che la renovaziun dal studio da RSI a Comano avanza tenor plan. Cun ina strategia d'immobiglias consequenta optimescha la SRG SSR en il rom da la transfurmaziun ses studios, reducescha las surfatschas e sbassa uschia ils custs. La vendita da l'immobiglia da RSI Lugano-Besso ha ultra da quai generà in gudogn da passa 10 milliuns francs. 

Perspectivas 

Per il 2026 quinta la SRG SSR cun retgavs stabils da la taxa da medias, cunquai che quella vegn reducida sin 312 francs per chasada pir a partir dal 2027 ed 80 pertschient da las interpresas suttamessas a la taglia sin la plivalur vegnan ad esser liberadas da la taxa pir a partir da quel mument. In'ulteriura reducziun da la taxa per las chasadas sin 300 francs è previsa a partir dal 2029. 

L'ambient da medias actual resta vinavant marcà da ristgas. Ina da quellas è per exempel il martgà da reclamas fragil cun in'auta volatilitad e spustaments sin plattafurmas da terzs. Quest onn spetgan dentant cun ils Gieus olimpics d'enviern ed il Campiunadi mundial da ballape da la FIFA duas occurrenzas da sport grondas che pon sustegnair punctualmain il sectur commerzial. 

Cun il project Enavant orientescha la SRG SSR sia strategia als basegns dal public che sa midan, adattescha las structuras al rom finanzial pli bass e realisescha in'offerta da service public d'auta qualitad. Ella sa focussescha il 2026/27 sin la realisaziun consequenta dal project da transfurmaziun cun l'intent da sbassar ils custs e da segirar l'avegnir. 

Quint da gudogn e perdita 2025

 

Il rapport da gestiun da la SRG SSR cumpara la fin d'avrigl 2026.