20 onns Mx3 – la tribuna digitala per musica svizra

Il settember 2026 festivescha mx3.ch ses 20avel anniversari. La plattafurma gestiunada da la SRG SSR è vegnida stgaffida cun la finamira da far pli visibla la musica svizra e per promover il barat tranter creatur:as da musica, sco er organisatur:as, labels, medias ed il public. Oz fa mx3.ch part d'ina purschida naziunala, a la quala appartegnan era volksmusik.mx3.ch e neo.mx3.ch per musica experimentala e musica classica. Las plattafurmas s'adresseschan a creatur:as da musica, amatur:as da la musica ed organisatur:as da concerts en Svizra ed a l'exteriur.

Punt tranter las regiuns linguisticas

Ina finamira centrala da Mx3 è dapi l'entschatta da colliar la scena da musica svizra era sur ils cunfins linguistics e regiunals. La SRG SSR tgira redacziunalmain las plattafurmas e rinforza il barat tranter las regiuns linguisticas cun iniziativas sco «Mx3 – all for one». Mintga mais vegn preschentada qua il medem mument ina nova chanzun da Mx3 sin plirs emetturs da radio da la SRG SSR ed uschia fatg accessibel ad in auditori pli vast en l'entir pajais.  

Dapi il 2019 è la banca da datas musicala era libra per emetturs da radio privats en Svizra. Els pon telechargiar gratuitamain titels ch'als interesseschan, sco er infurmaziuns supplementaras davart las musicistas ed ils musicists. Uschia vegn augmentada supplementarmain la visibilitad da la musica indigena.  

Bun punct da partenza per giuvens talents

Grazia a partenadis cun festivals, concurrenzas da musica ed instituziuns culturalas è Mx3 daventà in post da contact impurtant per la branscha da musica svizra. Persunas activas en il champ musical pon preschentar lur ovras, participar a concurrenzas ed entrar en contact cun organisatur:as, labels u redacziuns da radio. A medem temp survegnan medias ed organisatur:as d'events in access simpel a la musica svizra actuala. En questa moda ha Mx3 promovì ils ultims dus decennis numerusas carrieras extraordinarias, tranter auter quellas da Heidi Happy, Danitsa u era da Valeska dal duo da pop Boy.  

Model da success cun avegnir

La muntada da Mx3 s'augmenta cuntinuadamain: La purschida cumpiglia entant radund 220'000 audios e 20'000 videos da 40'000 musicist:as sviz:ras. Il 2025 han passa in milliun visitad:ras da la plattafurma laschà ir en total passa otg milliuns chanzuns. Er en l'avegnir vul Mx3 porscher ad artist:as da tut las regiuns da la Svizra ina plattafurma e far pli udibla e visibla la multifariadad da la producziun musicala svizra.