Jean-Michel Cina sa retira sco president da la SRG SSR

Durant ils diesch onns en uffizi sco parsura dal cussegl d'administraziun e president da l'uniun purtadra ha Jean-Michel Cina manà l'interpresa e l'uniun purtadra cun success tras temps pretensius e per part turbulents. Sut sia batgetta han ins preparà la transfurmaziun strategica da l'interpresa e la fatg avanzar essenzialmain. En ses temp d'uffizi han era gì lieu duas votaziuns federalas dal pievel che han dà a la populaziun svizra la pussaivladad da decider davart l'avegnir da la SRG SSR. L'onn 2018 ha ella refusà cleramain cun var 72 pertschient da las vuschs l'iniziativa No Billag. Cun 62 pertschient ed uschia anc ina giada evidentamain han las votantas ed ils votants danovamain refusà la primavaira 2026 l'uschenumnada iniziativa «200 francs bastan!». A chaschun dad omaduas iniziativas è Jean-Michel Cina s'engaschà fermamain ed ha defendì la SRG SSR cun tutta forza. 

En il rom da la direcziun da l'uniun purtadra è vegnida reorganisada fundamentalmain la strategia da l'uniun. Sin iniziativa da Jean-Michel Cina han ins plinavant sviluppà ed etablì in model d'efficacitad ch'examinescha sistematicamain l'effect da l'uniun en la societad ed en l'interpresa, ch'al renda vesaivel ed al sviluppescha vinavant.

Sco president dal cussegl d'administraziun è Jean-Michel Cina adina s'engaschà fermamain per ina SRG SSR persistenta ed ina ferma plazza da medias svizra. En quel connex è da menziunar en spezial il project strategic «Enavant» che transfurma fundamentalmain la chasa da medias SRG SSR e la prepara per las sfidas dal futur.

Ina cumissiun dal persunal extraordinaria dal cussegl d'administraziun prepara la successiun da Jean-Michel Cina. La finamira è da pudair proponer la primavaira 2027 a la radunanza da delegadas e delegads ina successiun adattada per l'elecziun d'ina nova presidenta u d'in nov president.

Fin a l'entrada en uffizi da la persuna che daventa ses successur u sia successura surpiglia Jean-Michel Cina vinavant cumplainamain sia responsabladad sco president da l'uniun purtadra e parsura dal cussegl d'administraziun ed exequescha sias incumbensas cun tut ils dretgs e tut las obligaziuns. 

Communicaziun ad hoc tenor l’art. 53 KR