Sin memobase.ch survegn la Svizra access a sia memoria audiovisuala

Emissiuns istoricas da radio e televisiun da la SRG SSR pon ins da nov retschertgar a moda uschè simpla sco anc mai. Via memobase.ch, il portal naziunal da Memoriav, han persunas interessadas access ad 1,5 milliuns emissiuns da televisiun e radio or dals archivs da RTR e SRF. Passa 650'000 documents pon ins tadlar u guardar directamain online. Per persunas che lavuran en la perscrutaziun u per las medias sco era per la publicitad interessada è quest pass ina clera plivalur: ellas survegnan access ad in vast spectrum da cuntegns istorics, tranter auter per exempel ad emissiuns da novitads, emissiuns da sport e contribuziuns culturalas che tanschan enavos fin en ils onns 1930. A lunga vista duain er ils inventaris dals archivs da RSI e da RTS vegnir integrads sin Memobase. 

Sco portal naziunal reunescha Memobase cuntegns audiovisuals – pia emissiuns da radio e televisiun, fotografias, films e documents sonors – sco era metadatas da radund 160 instituziuns svizras. Grazia a la tschertga plurilingua che cumpiglia tut las medias e tut las instituziuns èsi pussaivel da scuvrir funtaunas audiovisualas da differentas collecziuns e da metter quellas en ina relaziun. Cun l'amplificaziun actuala cumpiglia Memobase bainbaud dapli che dus milliuns documents audiovisuals d'instituziuns svizras. 

L'avertura dals archivs da la SRG SSR è il resultat da la collavuraziun intensiva tranter la SRG SSR e Memoriav. Las duas organisaziuns han la finamira communabla da render pli accessibel il patrimoni audiovisual da la Svizra cun agid da la plattafurma Memobase ch'è vegnida renovada cumplettamain l'onn 2021. Uschia ademplescha la SRG SSR sia incumbensa legala d'avrir ses inventaris d'archiv per la publicitad. Las emissiuns da televisiun e da radio da la SRG SSR documenteschan numnadamain dapi l'entschatta dal 20avel tschientaner a moda incumparabla il svilup social, cultural e politic dal pajais.