La SRG SSR fa danovamain ina turnea tras la Svizra

La digitalisaziun e l'intelligenza artifiziala han manà l'ultim temp a profundas transfurmaziuns en la societad. Quai ha midà era l'access a las infurmaziuns, la cuntrada da medias svizra e la lavur schurnalistica. Cun il tema «La SRG SSR digitala» metta la turnea da quest onn sut il motto «Lain discurrer» en il center ils svilups ils pli recents ed envida era la giuventetgna da sa participar a la discussiun. Co vegnan ils cuntegns medials consumads en l'avegnir? E tge spetgas ha il public envers il service public dal futur? 

Gia l'entschatta d'avust ha la SRG SSR lantschà ina retschertga online davart il tema «La SRG SSR digitala» cun la finamira d'eruir las spetgas e las tenutas dal public. Ils resultats da la retschertga servan tranter auter sco basa da discussiun per las singulas occurrenzas. 

Fermadas en tut las regiuns linguisticas

«Gist en il temp dad IA e da la digitalisaziun accelerada na basti betg pli da mo far in bun schurnalissem», di la directura generala da la SRG SSR Susanne Wille. «Nus stuain declerar nossa lavur e restar en in dialog permanent cun la populaziun, era per chapir tge ch’ils umans spetgan da la SRG SSR.»

Sin la turnea «Lain discurrer» sa ferma la SRG SSR en tut las regiuns linguisticas. Planisadas èn diesch occurrenzas en la Svizra tudestga, quatter en la Svizra franzosa e mintgamai in'occurrenza en il Tessin ed en la Svizra rumantscha. A las occurrenzas survegn il public in'invista en la lavur schurnalistica da la SRG SSR ed ha l'occasiun da sa barattar cun persunalitads enconuschentas da SRF, RTS, RSI e RTR. L’emprima staziun è ils 8 d’october a Henniez, nua che Viviane Gabriel e Stéphane Gabioud da RTS cumenzan la tura.

En il center da las occurrenzas stat mintgamai il barat tranter il public e las collavuraturas ed ils collavuraturs da medias. En in'atmosfera lucca po il public far dumondas, exprimer critica, formular spetgas e propostas. Ils resuns da la populaziun dattan impuls impurtants per sviluppar vinavant la SRG SSR e sias purschidas digitalas. 

Il barat fa part da l'incumbensa 

La seria d'occurrenzas «Lain discurrer» va a pèr cun ils formats da dialog che la SRG SSR realisescha regularmain sco part da sia incumbensa publica. La finamira è da promover il barat cun la populaziun. Suenter ils dialogs davart las spetgas da las giuvenilas e dals giuvenils (2022/23), davart la cultura (2023/24) e davart la coesiun (2025) stat quest onn la digitalisaziun en il focus. Las occurrenzas da la turnea da quest onn sut il motto «Lain discurrer» vegnan organisadas en collavuraziun cun l'uniun SRG SSR e sias quatter societads regiunalas. 

La survista da tut las occurrenzas planisadas chattais Vus qua: La seria da dialog davart il tema «digitalisaziun» - SRG
 
Las represchentantas ed ils represchentants da las medias èn cordialmain bainvegnids a las occurrenzas. Per plaschair s'annunziar via e-mail: media(at)srgssr.ch.