Ina nova charta per promover la musica svizra
A chaschun da la sentupada da l’organ da dialog «Musica svizra» 2024 han suttascrit la SRG SSR e las represchentantas ed ils represchentants da diesch organisaziuns da la branscha da musica svizra la nova Charta da la musica svizra. La cunvegna da collavuraziun ha la finamira da promover la musica svizra e novs talents e d’augmentar lur visibilitad. Grazia a la collavuraziun iniziada avant 20 onns è creschida la quota da musica svizra emessa en tut ils programs da radio da la SRG SSR ed importa sin intgins chanals passa 50 pertschient dal temp d’emissiun.
La Charta da la musica svizra è ina cunvegna da collavuraziun da la SRG SSR cun la branscha da musica svizra. Cun quella s’oblighescha la SRG SSR da promover en sia entira purschida da program la musica svizra sco er artistas ed artists da la Svizra, surtut novs talents, d’emetter contribuziuns redacziunalas ed emissiuns spezialas davart la musica svizra e da giugar a maun da partenadis ina rolla activa per promover la musica svizra. En il rom da la sentupada annuala da l’organ da dialog «Musica svizra» han la SRG SSR e las represchentantas ed ils represchentants da diesch organisaziuns da la branscha da musica svizra suttascrit oz, ils 14 da mars 2024, la nova Charta da la musica svizra.
La nova charta cuntinuescha cun las finamiras principalas d’enfin ussa. Ella rinforza il medem mument il barat d’infurmaziuns davart la purschida da programs da la SRG SSR en il sectur da la musica svizra tranter las differentas partenarias ed ils differents partenaris. Da nov vegn fixada la preschientscha da musica svizra en la purschida da program da la SRG SSR independentamain da la moda da derasaziun – linearmain (radio e tv) u digitalmain. La charta suttastritga era l’engaschi da la SRG SSR per la diversitad e las producziuns novas da l’entira scena da musica svizra sur ils cunfins linguistics e regiunals. La charta suttastritga l’impurtanta rolla culturala da las medias publicas e lur contribuziun a la coesiun naziunala.
In engaschi inizià avant 20 onns ch’è sa cumprovà
La charta lantschada il 2004 e surlavurada l’emprima giada l’onn 2016 è ina veritabla istorgia da success: la collavuraziun da 20 onns tranter la SRG SSR e la branscha ha gidà ad augmentar la quota da musica svizra emessa en tut ils programs da radio da la SRG SSR. Tar intgins dad els munta la quota da musica svizra a passa 50 pertschient dal temp d’emissiun. Era la purschida da televisiun e l’offerta digitala fan contribuziuns d’auta qualitad ch’illustreschan la ritgezza da la musica svizra.
Ils ulteriurs partenaris da la charta dasper la SRG SSR:
- IFPI Svizra – l’associaziun professiunala dals labels da musica en Svizra
- Cuminanza d’interess per la cultura populara Svizra e Principadi da Liechtenstein CICP
- Associaziun da labels e producents svizzers independents IndieSuisse
- orchester.ch – l’organisaziun tetgala dals orchesters professiunals svizzers
- Cussegl svizzer da la musica CSM
- Cooperativa svizra dals artists interprets SIG
- Uniun svizra da musicistas e musicists SMV
- Associaziun svizra dals editurs da musica SVMV
- Associaziun svizra da musica SONART
- SUISA, la Societad dals auturs ed editurs da musica
- SWISSPERFORM, la societad per ils dretgs colliads cun il dretg d’autur
La Charta da la musica svizra
Sco en auters secturs culturals ha era la musica svizra ina plazza impurtanta en l’incumbensa da la SRG SSR. Quella na cumpiglia betg mo la promoziun da la producziun musicala (art. 7 da la concessiun), mabain era la collavuraziun cun ils pli impurtants acturs da la branscha da musica svizra (art. 28 da la concessiun).
En la Charta da la musica svizra vegn reglada la collavuraziun tranter la SRG SSR e la branscha da musica svizra. En la cunvegna s’oblighescha la SRG SSR d’emetter en ils programs da radio ina quota commensurada da producziuns da musica svizras. Sco musica svizra valan registraziuns u transmissiuns directas cun cumponistas e cumponists, interpretas ed interprets u producentas e producents da la Svizra, sco era registraziuns cun ina participaziun svizra considerabla. Per il solit surpassa la SRG SSR las valurs directivas per la preschientscha da musica svizra ch’ils partenaris fixeschan mintg’onn.
Contact
Post da medias da la SRG SSR
Edi Estermann
058 136 21 21
medienstelle.srg(at)srgssr.ch
