A partir da mez november emetta la SRG SSR puspè programs da radio sin via analoga sur undas ultracurtas

La SRG SSR ha dumandà da survegnir sias anteriuras frequenzas dad undas ultracurtas e cumenza puspè a derasar analogamain ses cuntegns. L'Uffizi federal da communicaziun (UFCOM) ha dà a la SRG SSR la concessiun da func correspundenta che ha ussa vigur legala, suenter ch'il termin da recurs è scadì. Ils emprims emetturs vegnan puspè mess en funcziun mez november. Cun quest emprim pass han radund 80 pertschient da la populaziun puspè access al provediment via undas ultracurtas. La SRG SSR s'orientescha als basegns dal public e vegn ad examinar cuntinuadamain il svilup. Ils custs supplementars che resultan cun reactivar las undas ultracurtas ston vegnir accordads cun il program da spargn current ch'il Cussegl federal ha ordinà e muntan actualmain a radund 6,5 miu. francs ad onn.  Ina cuvrida cumplessiva ha custà en il passà var 15 miu. ad onn. Ulteriurs pass d'extensiun decida la SRG SSR a maun da l'utilisaziun da vart da las audituras e dals auditurs sco era d'ina examinaziun minuziusa da las cundiziuns generalas dal manaschi e da las finanzas.

Suenter che la SRG SSR aveva mess ord funcziun las undas ultracurtas per la fin da l'onn 2024 èsi ussa damai puspè pussaivel da recepir analogamain ses emetturs, e quai a chasa u sin via ed en tut las regiuns linguisticas. Emess vegnan ils programs principals respectivs, tranter auter er ils emetturs da cultura da SRF, RTS e RSI, e plinavant en la Svizra tudestga ils schurnals regiunals populars.

Novas cundiziuns generalas

Il public taidla gugent radio e dovra per quest intent adina pli savens apparats da recepziun digitals. Oz vegnan consumadas bunamain nov da diesch minutas radio via DAB+ ed internet. Cuntegns auditivs vegnan plinavant savens tadlads da tuttas uras sco streaming e podcast. Il radio s'adatta cuntinuadamain a questas novas disas da consum. Las autoritads decreteschan las cundiziuns generalas necessarias, a basa da las qualas la SRG SSR aveva concludì ensemen cun la branscha da metter ord funcziun las undas ultracurtas. Questas cundiziuns generalas èn sa midadas: Suenter ch'il parlament ha gì approvà la fin da l'onn 2025 ina prolungaziun da las undas ultracurtas, ha l'UFCOM danovamain scrit ora las frequenzas. La SRG SSR chapescha quai sco incumbensa da la populaziun. Ella è s'annunziada per la concessiun da func e vegn puspè a derasar ses programs da radio sin via analoga.

Las undas ultracurtas sco punt a l'avegnir digital

Per il public che ha midà ils ultims onns a la recepziun digitala na sa mida nagut cun la represa da las undas ultracurtas. En l'entir pajais èsi vinavant pussaivel da tadlar radio via DAB+ e da consumar cuntegns auditivs via internet, per exempel cun las apps Play da la SRG SSR. Las undas ultracurtas servan sco punt, per che l'auditori da radio survegnia dapli temp per midar a las modas da recepziun digitalas. La SRG SSR observa cuntinuadamain il svilup. Dapi il 2020 n'è la derasaziun via undas ultracurtas betg pli obligatorica.

«En il center stat noss public. La decisiun dal parlament da pussibilitar vinavant la derasaziun via undas ultracurtas ha la SRG SSR chapì sco incumbensa. Nus avain perquai agì svelt ed emettain noss programs en tut las regiuns linguisticas cumplementarmain als chanals digitals danovamain via undas ultracurtas. Decisiv per la SRG SSR è che noss cuntegns cuntanschan ils umans – a moda simpla e fidada» punctuescha Susanne Wille, directura generala da la SRG SSR.