Play Suisse – In dachasa per istorgias svizras

Play Suisse è la nova plattafurma da streaming da la SRG SSR. Qua chattais Vus serias, films e documentaziuns da tut las regiuns linguisticas da la Svizra, en Vossa lingua, e quai cura e nua che Vus vulais.

Play Suisse As porscha il meglier da las atgnas producziuns e da las coproducziuns da RTR, RSI, RTS e SRF, per l'emprima giada insumma senza barrieras linguisticas. Qua chattais Vus numnadamain films, serias e documentaziuns, reportaschas e perlas or da l'archiv en lingua originala cun suttitels tudestgs, franzos e talians. Ina selecziun da contribuziuns è disponibla er cun suttitels rumantschs.

Play Suisse accentuescha la persunalisaziun e las recumandaziuns: grazia ad in login emprenda Play Suisse d'enconuscher Vossas preferientschas ed As porscha cuntegns ch'èn interessants per Vus. Cun in catalog structurà tenor temas e sistems da recumandaziun persunalisads As envida Play Suisse da scuvrir purschidas dad autras regiuns linguisticas - fin ussa nunenconuschentas. Nus desistin d'ina logica commerziala e promovain enstagl ina purschida da programs plurilingua e multifara. 

Play Suisse è la resposta a las disas d’utilisaziun da medias da noss public. La plattafurma porscha in access senza barrieras als programs da la SRG SSR da tut las regiuns linguisticas. Ed ella inscenescha las pli diversas fassettas da tut las regiuns dal pajais. Uschia cumplettescha la plattafurma la purschida actuala da la SRG SSR. Ils players da RTR, SRF, RSI, RTS e SWI restan vinavant accessibels en la furma usitada. Play Suisse fa punts e collia quai che tutga ensemen.

Play Suisse vegn lantschà ils 7 da november 2020.