Novs films sin Play Suisse a chaschun dal Premi dal film svizzer

Il Premi dal film svizzer vegn surdà quest onn venderdi, ils 26 da mars a Genevra, però betg sco per il solit en il BFM (Bâtiment des Forces Motrices) davant aspectaturas ed aspectaturs, mabain en il studio 4 da RTS senza public. Las var 60 persunas nominadas definitivamain communitgeschan tuttas davent da chasa cun il studio. Cusseglier federal Alain Berset fa il pled da bainvegni. La moderatura Mireille Jaton accumpogna las aspectaturas ed ils aspectaturs davant ils moniturs tras la saira e beneventa intgins giasts – tranter quels era victuras e victurs dal Premi dal film svizzer da l'onn passà, p.ex. l'actur Sven Schelker e la reschissura Delphine Lehericey, sco era Frédéric Maire, il directur da la Cinémathèque a Losanna. Quels surdattan ils premis en las categorias principalas (il meglier film, il meglier film documentar, la meglra actura, il premi spezial da l'academia, il premi d'onur). Il premi d'onur è deditgà quest onn a l'actura svizra Lilo Pulver che ha marcà l'istorgia dal film germanofon e che ha fatg carriera era sin plaun internaziunal. 

La show dad 80 minutas cumenza venderdi, ils 26 da mars a las 19:00.  

 

Programmaziun speziala en tut las regiuns ed in livestream sin differents chanals

L'occurrenza stat a disposiziun sco emissiun en directa sin differents chanals, tant sin las trais paginas-web da SRF, RTS e RSI, sco era sin la website dal Premi dal film svizzer cun numerus features: sequenzas da film, artitgels, reportaschas ed intervistas. 

En il rom da l’emna «Woche der Nominierten» s’ha plinavant la pussaivladad da guardar ils 26 films lungs, curts, documentars, d’animaziun e da finiziun ch’èn nominads en ina da las 12 categorias da «Quartz». Ils films vegnan ad esser accessibels sco purschida da streaming sin las paginas-web filmpodium.ch e cinemas-du-grutli.ch. 

Ultra da quai emetta la SSR a chaschun da l'event e la saira sequenta in program spezial sin ils emetturs da televisiun da la SSR: 

 
SRF zwei (26 da mars) 

• 20:10 «Mario» da Marcel Gisler 
• 23:25 «Le milieu de l'horizon» da Delphine Lehericey 

RTS 2 (26 da mars) 

• 20:05 Dus formats curts da RTS Culture : «Portrait Peter Braker (HEAD)» da Sarah Imsand e «Portrait Stéphanie Chuat et Véronique Reymond (HEAD)» da Megane Brulhart 
• 20:55 «Zwingli, le réformateur» da Stefan Haupt
• 23:00 «Chris The Swiss» dad Anja Kofmel 

RSI LA2 (27 da mars) 

A partir da las 20:40:  

• «A metà dell'orizzonte» da Delphine Lehericey 
• «Average Happiness» da Maja Gehrig 
• «Per sempre» da Fanny Bräuning 
• «Airport» da Michaela Müller 
• «Il Cerchio» da Stefan Haupt 
   

Nominaziuns e coproducziuns da la SRG SSR  

La SSR ha coproducì 18 dals 21 films nominads, tranter quels ils tschintg films lungs («Atlas» da Niccolò Castelli, «Mare» dad Andrea Štaka, «Platzspitzbaby» da Pierre Monnard, «Schwesterlein» da Stéphanie Chuat e Véronique Reymond e «Wanda, mein Wunder» da Bettina Oberli), sco era quatter dals tschintg films documentars («5 nouvelles du cerveau» da Jean-Stéphane Bron, «Das neue Evangelium» da Milo Rau, «Il mio corpo» da Michele Pennetta e «Saudi Runaway» da Susanne Regina Meures), tut ils trais films d'animaziun ch'èn nominads, quatter dals tschintg films curts e dus dals trais films finals. Da las totalmain 42 nominaziuns en tut las categorias (films, acturas ed acturs, tecnicistas e tecnicists) cumpetan damai 37 a la SRG SSR. 

 

Publicaziun da las ovras victuras dals ultims onns sin Play Suisse 

A partir dals 25 da mars stattan a disposiziun sin Play Suisse ils films ch'èn vegnids undrads ils ultims onns cun il Premi dal film svizzer en diversas categorias. Ils films vegnan cumplettads en la collecziun gia existenta e disponibla da las ovras victuras dal Premi dal film svizzer. 

Da las ovras che stattan gia a disposiziun ussa sin la plattafurma fan tranter auter part «Ceux qui travaillent» dad Antoine Russbach (il meglier film lung dal 2019), «Chris The Swiss» dad Anja Kofmel (il meglier film documentar dal 2019), «Ma vie de courgette» da Claude Barras (il meglier film lung dal 2017), «Die göttliche Ordnung» da Petra Volpe (il meglier scenari, la meglra actura e la meglra actura secundara dal 2017) ed «Electroboy» da Marcel Gisler (il meglier film documentar dal 2015). 
 
Da nov èn disponibels sin Play Suisse ils suandants titels: 

• «Le milieu de l’horizon» von Delphine Lehericey (il meglier film lung dal 2020) 
• «Immer und ewig» von Fanny Bräuning (il meglier film documentar dal 2020) 
• «Blue my mind» von Lisa Brühlmann (il meglier film lung dal 2018) 
• «Above and Below» da Nicolas Steiner (il meglier film documentar dal 2016) 
• «All Inclusive» da Corina Schwingruber Ilic (il meglier film curt dal 2019) 
• «Facing Mecca» da Jan-Eric Mack (il meglier film curt dal 2018) 
• «La femme et le TGV» da Timo von Gunten (il meglier film curt ex aequo dal 2017) 
• «Average Happiness» da Maja Gehrig (il meglier film d'animaziun dal 2020) 
• «Selfies» da Claudius Gentinetta (il meglier film d'animaziun dal 2019) 
• «Airport» da Michaela Müller (il meglier film d'animaziun dal 2018) 
• «Au revoir Balthazar» da Rafael Sommerhalder (il meglier film d'animaziun dal 2017) 
• «Timber» da Nils Hedinger (il meglier film d'animaziun dal 2015) 

 

Ils top 10 actuals dals cuntegns guardads il pli savens sin la plattafurma da streaming 

La plattafurma vegn cumplettada cuntinuadamain. Play Suisse è entant accessibla cun passa 1'600 titels sin nov differentas plattafurmas. Il favrer 2021 han ins guardà il pli savens ils suandants diesch films e serias: «Wilder», «Der Bestatter», «Seitentriebe», suandà da «Die göttliche Ordnung», «Das Fräuleinwunder», «Quartier des banques», «Frieden», «La grande histoire du ski», «Handyman» e «Cellule de crise». La grafica agiuntada visualisescha ils top 10.

 

Ils top 10 actuals dals cuntegns guardads il pli savens sin la plattafurma da streaming