Novs highlights da sport per l'enviern – «La grande histoire du ski» ed ulteriurs films documentars èn ussa disponibels sin Play Suisse

L'istorgia dal sport da skis è fascinanta, variada e plain tensiun. Ella è gia adina vegnida influenzada da persunalitads extraordinarias ed avantgardisticas che han manà la disciplina dal sport da skis en novas dimensiuns e che l'han dà la tempra en il decurs da l'istorgia. Pierre-Antoine Hiroz, il cineast e reschissur vallesan che ha realisà numerusas ovras, tranter auter bleras reportaschas da l'emissiun da RTS «Passe-moi les jumelles», lavura sez sco guid da muntogna. Ses film documentar «La grande histoire du ski» preschenta ed explorescha las numerusas fassettas dal sport da skis.

Gilles Marchand, directur general da la SSR: «Las muntognas èn il coc da l'identitad svizra. E l'ir cun skis gioga ina rolla impurtanta en quest connex. En quel senn suttastritga ‹La grande histoire du ski› insatge che bleras Svizras e blers Svizzers partan. Quai correspunda precis a la finamira da Play Suisse: accentuar quai che collia nus, respectond nossa diversitad culturala.»

Da la preistorgia fin en l'avegnir

«La grande histoire du ski» sfundra en l'istorgia dal sport da skis e maina l'aspectatura e l'aspectatur tras las numerusas etappas cumplexas da la disciplina legendara ch'è daventada sin tut il mund in simbol da la Svizra. Ella sa cunfa damai perfetgamain cun la purschida da Play Suisse. Il film documentar unescha ina retrospectiva cun in sguard en il futur: Da la fabricaziun dals emprims skis avant plirs millis onns fin als puncts culminants sportivs da noss temp e la dumonda inevitabla co ch'il stgaudament dal clima s'effectuescha sin il futur dal sport da skis.

Ulteriuras documentaziuns da sport per l'enviern

Parallelamain èn a partir dad ussa er autras novitads disponiblas sin Play Suisse – tranter quellas il film documentar da RTS «L'épopée des héros – Crans-Montana 87» da Pierre Morath e Florian Müller che mussa ils campiunadis mundials da skis dal 1987 a Crans-Montana, nua che l'equipa svizra ha collià l'entira naziun grazia a sia prestaziun da vaglia nunemblidaivla cun bleras medaglias. Per tut quellas e quels che pensan ad in saun cumenzament da l'onn nov datti plinavant il film da kino documentar «Free to Run», medemamain da Pierre Morath, che sa deditgescha a milliuns curridras e curriders sin l'entir mund e che fa enconuschenta l'istorgia da questa disciplina universala a l'aspectatura ed a l'aspectatur.