Play Suisse – in ferm cumenzament e novs puncts culminants per las Festas
Play Suisse, la nova plattafurma da streaming da la SSR, vegn utilisada fermamain gia las emprimas emnas ed extendida cuntinuadamain. A partir d'immediat èsi pussaivel d'acceder a Play Suisse tranter auter era via ulteriuras boxas da Swisscom «blue TV» ed ina nova selecziun da serias, films e documentaziuns è pronta per il streaming.
Dapi la lantschada ils 7 da november registrescha Play Suisse in ferm svilup. Durant las emprimas emnas èn sa registrads gia var 130 000 utilisadras ed utilisaders. Il login pussibilitescha in access simpel via differentas plattafurmas. Questa utilisaziun multipla sa mussa tranter auter en il grond dumber d'apparats da partenza. Fin uss è Play Suisse vegnì activà sin radund 280 000 Unique Devices. Il chanal utilisà il pli savens è actualmain (emna 50) la purschida en il web (50%), suandada dad apps per telefonins (30%) ed apps per televisiuns (20%). Ils hits top 3 dapi la lantschada (mesirà sin basa dals Media Views) èn «Frieden», «Cellule de crise» e «Wilder» .
Gilles Marchand, directur general da la SSR: «Play Suisse ha gì in grondius cumenzament. Jau hai grond plaschair ch'ins fa tant diever da questa punt tranter las regiuns linguisticas gia suenter curt temp. Cun las emprimas experientschas fitg positivas ed ils resuns da las utilisadras e dals utilisaders vegnin nus uss a sviluppar vinavant pass per pass Play Suisse sco nova Idée Suisse digitala.»
Introducziun sin ulteriuras plattafurmas
Entant che la cuminanza d'utilisadras e d'utilisaders crescha, daventa era pli gronda la preschientscha da Play Suisse sin ulteriuras plattafurmas. Sper in svilup signifitgant sin «blue TV» po Play Suisse era vegnir streamà via Chromecast sin la televisiun. Il proxim temp vegnan ulteriuras plattafurmas cumplettadas cun Play Suisse, las tractativas en chaussa progredeschan.
Staflas cumplettas da «Der Bestatter» e l'emprima seria-web rumantscha
A partir dad immediat ed ad uras per ils dis libers che stattan avant porta envida la purschida da Play Suisse cun passa 1000 titels al streaming patgific. Numerus novs puncts culminants stattan gia a disposiziun, tranter auter tut las staflas da la seria da success da SRF «Der Bestatter», la cumedia criminala «Advent, Advent», las serias dramaticas da RTS «Cellule de crise», «Helvetica» e «Quartier des Banques» ed in'emprima selecziun da films animads. Nus recumandain era l'emprima seria-web ficziunala rumantscha, la «Metta da fein» da Carlo Beer ed Urs Berlinger, ch'è vegnida realisada en in vitg idillic en las muntognas grischunas e sa basa sin in'enconuschenta ditga rumantscha – la pel-giaglina è garantida.
Wilder – la terza stafla exclusivamain sin Play Suisse per guardar tut en ina giada
L'onn nov cumenza cun in highlight spezial: la terza stafla da «Wilder», la sensaziun da crimi da SRF. L'istorgia da «Wilder III» (premiera da televisiun sin SRF 1 ils 5 da schaner) vegn raquintada per l'emprima giada en il stil d'in thriller: la stafla survegn tensiun permanenta ed è perfetga per il diever online.
Bakel Walden, directur Svilup e purschida da la SSR: «Cun ‹Wilder III› ans spetga in cumenzament fantastic da l'onn da serias nov. Surtut ma legrel jau che nus pudain porscher insatge dal tuttafatg spezial per ils amaturs dal crimi en Svizra. Suenter la premiera ils 5 da schaner sin SRF 1 pon tuttas e tuts che n'han nagina pazienza da spetgar sin la proxima episoda streamar sin Play Suisse l'entira terza stafla exclusivamain e cun suttitels en pliras linguas.»
Gia uss èn disponiblas las emprimas duas staflas da Wilder en sincronisaziun tudestga, franzosa e taliana e cun suttitels.
Post da medias da la SSR
Edi Estermann
medienstelle.srg(at)srgssr.ch / tel. 058 136 21 21
