Play Suisse, la plattafurma da streaming da la SSR, va online
Damaun sonda va online Play Suisse, la nova plattafurma da streaming da la SSR. Saja quai via televisiun, smartphone u computer: las meglras atgnas producziuns e coproducziuns da la Svizra stattan a disposiziun da nov da tuttas uras , dapertut, gratuitamain ed en pliras linguas. En pli èsi pussaivel da midar senza interrupziun d'in apparat a l'auter.
La purschida è gia uss immensa: puncts culminants sco las serias «Wilder», «Helvetica», «Quartier des banques», documentaris premiads sco «La Forteresse» e «43, il ponte spezzato» ubain films sco «Blue My Mind», «Der letzte Weynfeldt» e la cumedia d'amur rumantscha «Amur senza fin» èn disponibels sin Play Suisse. Ed era da la nova seria da suenterguerra «Frieden» vegnan a star a disposiziun sis episodas. En pli offra la plattafurma perlas or da l'archiv, registraziuns da concerts, festivals da musica, serias da viadi ed emissiuns che laschan scuvrir da nov la Svizra: tut quai è Play Suisse.
Serias, films, documentaziuns e registraziuns da concerts
Las emprimas emnas suenter la lantschada èn disponiblas var 1000 contribuziuns en lingua originala cun suttitels elegibels en tudestg, franzos e talian, per part er en rumantsch. La purschida vegn cumplettada mintga di. Play Suisse offra las meglras atgnas producziuns e coproducziuns da las unitads d'interpresa da la SSR-SRF, RTS, RSI e RTR – per l'emprima giada insumma senza barrieras linguisticas. Play Suisse recumonda tut tenor utilisadra u utilisader differents cuntegns da tut las regiuns linguisticas. La navigaziun è simpla grazia a las categorias tematicas: maletgs da prevista, trailers e resumaziuns simplifitgeschan il viadi d'exploraziun enturn il mund creativ dal film svizzer.
«Play Suisse è la nova idée suisse», declera il directur general da la SSR Gilles Marchand. «Cun la nova purschida avischinain nus la Svizra e sias regiuns linguisticas ina a l'autra, suttastritgain il medem mument la multifariadad da quest pajais e permettain al public svizzer in eveniment da streaming individual.»
Partenadis interessants ed enritgints
La plattafurma da streaming Play Suisse è entretschada gia a partir da l'emprim di en plirs partenadis interessants ed enritgints cun festivals ed eveniments culturals – tranter auter cun il Festival International du Film Alpin (FIFAD), cun il Geneva International Film Festival (GIFF) u cun l'emettur da cultura europeic Arte.
Play Suisse stat a disposiziun per la televisiun (Apple TV, Android TV, pli tard era blue TV da Swisscom e Chromecast), per il smartphone (iOS, Android) e sa chapescha era per il computer. L'access è gratuit, cunquai ch'el è gia cuntegnì en la taxa da recepziun. Actualmain vegnan fatg discurs cun ulteriurs purschiders da telecommunicaziun e d'internet sco era cun partenaris da plattafurmas culturalas.
Bakel Walden, directur dal sectur svilup ed offerta e manader dal Digital Board da la SSR: «Play Suisse represchenta la singularitad culturala da la Svizra e quai sin ina plattafurma adattada al diever da medias actual. Ensemen cun noss partenaris da producziun purschain nus, en il senn dal service public, in dachasa modern per istorgias svizras.»
Manader da project Pierre-Adrian Irlé: «Nus avain sviluppà la plattafurma en in barat permanent cun utilisadras ed utilisaders da test e la vegnin a cumplettar cuntinuadamain. Uss ans legrain nus però zunt fitg da metter a disposiziun la plattafurma a l'entira Svizra.»
Ulteriuras infurmaziuns chattais Vus qua.
Post da medias SSR
Edi Estermann
medienstelle.srg(at)srgssr.ch / tel. 058 136 21 21
