Strategia d'interpresa e da purschida 2019–20

Purschida

Nus accentuain nossa particularitad, nossa plivalur.


Nus purschain cuntegns schurnalistics d'auta qualitad en las quatter linguas naziunalas. Il service public gida la publicitad a furmar libramain in'opiniun, da preferenza cun in'egliada cumplessiva, reciproca sin las realitads regiunalas en Svizra. L'independenza e la diversitad d'opiniuns èn valurs centralas. Ultra da quai mussan noss cuntegns schurnalistics perspectivas.

Nus sviluppain purschidas da cultura e da furmaziun, surtut sin plattafurmas digitalas ed en collavuraziun cun ils acturs relevants. Nus preferin purschidas europeicas quai che reguarda ils films da ficziun e las serias.

Nus ans focussain en la purschida da novitads online surtut sin video ed audio.

Nus avain quità da mantegnair in’irradiaziun internaziunala da noss programs.

Noss programs promovan l'engaschi e l'identificaziun.

 

 

Nus vulain cuntanscher en tschintg onns in equiliber tranter las purschidas digitalas ed il broadcast.

En vista a l'extensiun da la purschida digitala sviluppain nus constantamain novas furmas da raquintar, novs formats e novas furmas da distribuziun e promovain la participaziun dal public e l'interacziun.

Nus sviluppain formats e codes narrativs che correspundan a las spetgas dals giuvenils e da la glieud che consumescha medias online sin viadi, en ils differents secturs dal service public, cun agid da furmas da distribuziun digitalas adattadas. Nus sviluppain nossas purschidas ensemen cun la glieud giuvna e betg enstagl da quella.

L'identitad da la SSR è uschè preschenta en la purschida digitala sco en quella lineara.

 

 

En nossa purschida dain nus dapli paisa a la «swissness».

Nus investin dapli en atgnas producziuns svizras, surtut en il sectur dals films da televisiun. Nus mantegnain en la producziun da musica il nivel actual, intensivain dentant il barat interregiunal, oravant tut tar la musica classica e la musica populara.

Nus ans concentrain uschè fitg sco pussaivel sin la «swissness», pertge che «swissness» signifitga per nus enragischaziun. Per quest intent sviluppain nus en nossa purschida la collavuraziun interregiunala.

 

 

Relaziun

Nossa purschida da program cuntanscha ed animescha tut las gruppas en mira.

Nus reunin la societad svizra – a chaschun d'occurrenzas grondas da cultura, sport e politica en l'entira Svizra, e quai uschè savens sco pussaivel cun transmissiuns en directa.

Noss differents programs sin noss divers vecturs chattan er accoglientscha tar las minoritads. Els èn adattads surtut per persunas cun impediments dals senns. En quest senn promovan nossas purschidas la diversitad e l'integraziun.

 

 

Nus rinforzain la relaziun averta e transparenta cun la societad svizra.

Nossa tenuta professiunala e las valurs dal service public represchentadas da nus èn cleras e sa fan valair en tut las regiuns.

Nus creain ina pli ferma vischinanza a la societad svizra entras in meglier barat davart tge che nus purschain e contribuin. Quai faschain nus cun resguardar en nossa lavur ils resuns da la populaziun en collavuraziun cun nossa societad purtadra.

Nus sviluppain ina «Data Policy» per reglamentar la registraziun da datas, cun la finamira da chapir meglier noss public e porscher a quel megliers servetschs.

Nus gidain a mantegnair la memoria audio ed audiovisuala dal pajais. Nus digitalisain noss'ierta, la reutilisain en differentas furmas en la producziun currenta, la rendain accessibla tant sco pussaivel a la publicitad ed encuraschain il public da sa participar ad in narrativ istoric cuminaivel (co-creaziun).

 

 

Nus cuntribuin nossa cumpart a l’ecosistem medial svizzer.

Nus sviluppain ina collavuraziun nizziaivla cun tut ils acturs en la cuntrada mediala svizra privata: emetturs privats da radio e televisiun, gruppas da pressa e plattafurmas digitalas independentas («Pure Player»). Nus mettain a disposiziun tscherts cuntegns, dals quals nus possedain ils dretgs.

Nus intensivain la collavuraziun cun ils producents independents. Nus resguardain ils acturs privats per il svilup da novas purschidas.

Nus intensivain nossa collavuraziun cun las universitads e las scolas autas en il champ da l'innovaziun mediala. Nus contribuin a la transfurmaziun digitala da la societad.

 

 

Resursas

Nus simplifitgain l'organisaziun sin tut ils stgalims e promovain in management flexibel ed agil. Nossa nova cultura da manar accelerescha la transfurmaziun da l'interpresa.

Nus essan ina patruna attractiva, era per ils «digital natives». Nus promovain il perfecziunament intern, la successiun interna e la tschertga da talents sin tut ils stgalims.

Nus sustegnain il svilup e la mobilitad professiunala da nossas collavuraturas e noss collavuraturs.

Nus dain gronda paisa a la diversitad ed a la represchentaziun da dunnas en posiziuns responsablas.

 

 

L'infrastructura, il support e la tecnica servan a la purschida da program. Nus ans stentain anc pli fitg d'esser effizients en tut ils secturs, surtut quai che reguarda ils custs per l'infrastructura, l'administraziun e la tecnica. Nus analisain a moda cumplessiva e profunda, senza tabus, noss process e las metodas da producziun (en vista a la tecnica sco er als programs) cun la clera perspectiva da reducir ils custs.

Nus controllain ils standards da noss indrizs e da nossas investiziuns en il sectur da l'infrastructura (surtut edifizis), da nossas colliaziuns ed en la distribuziun ed adattain els a las pussaivladads finanzialas (sin il stgalim da la gruppa sco era da l'unitad d'interpresa).

Nus reducin tant sco pussaivel il basegn da spazi e nizzegiain ils locals a moda uschè effizienta sco pussaivel. Imports spargnads periodicamain vegnan reinvestids en la purschida da program.

 

 

 

La SSR è responsabla per ils meds publics ch'ella impunda a moda premurusa e transparenta per garantir sia independenza.

La SSR vul cuntanscher in equiliber finanzial sur la media da sia planisaziun finanziala (quatter onns). Ses cash-flow pussibilitescha da finanziar sias investiziuns. Grazia a ses agen chapital è ella preparada per eventuals ristgs.

La SSR contribuescha a la debatta davart il svilup dal model dal service public.