Strategia d'interpresa e da purschida 2021-2022

Purschida

Nus accentuain nossa particularitad, nossa plivalur.

 

Noss service public persvada cun qualitad e relevanza. Nus investin en in schurnalissem ferm, critic ed independent e rapportain a moda equilibrada. En in mund en transfurmaziun demussain nus plinavant perspectivas cun in schurnalissem constructiv.

Nus sviluppain purschidas da cultura e da furmaziun, en spezial sin plattafurmas digitalas ed en collavuraziun cun ils acturs relevants. En il sectur da films e da serias preferin nus purschidas che na tutgan betg tar il mainstream.

En la purschida da novitads online ans differenziain nus cun ans focusar perceptiblamain sin video ed audio.

Nossas purschidas tegnan pitg ad auts standards quai che reguarda l'originalitad ed il storytelling.

Nus vulain cuntanscher en trais onns in equiliber tranter las purschidas digitalas ed il broadcast.

 

La SSR e sias unitads d'interpresa sa chapeschan sco interpresas transmedialas, nua ch'ils differents vecturs cumpletteschan e stimuleschan in l'auter. Nus interagin cun las communitads ed ans sviluppain communablamain cun ellas.

Nossa finamira è da cuntanscher en trais onns ina percepziun equilibrada tranter las purschidas digitalas ed il broadcast. Nus nizzegian pussaivladads che sa basan sin datas sco per exempel la persunalisaziun per augmentar la visibilitad da noss cuntegns e l'attractivitad da nossas plattafurmas.

Nus sviluppain novs formats, novas furmas narrativas e novas furmas da distribuziun che correspundan a las spetgas da giuvenils e tals che cuvran ils basegns da persunas che consumeschan las medias online en viadi. Nus promovain decisiuns che sa basan sin datas per regular nossa purschida.

En nossa purschida dain nus paisa a l'enragischaziun regiunala.

 

Nus investin dapli en atgnas producziuns svizras, surtut en il sectur da las serias. Quai che reguarda la producziun da musica intensivain nus il barat interregiunal tar tut ils stils da musica.

Grazia a nossa enragischaziun regiunala purschain nus in'invista en ils tratgs cuminaivels sco er en las particularitads regiunalas e promovain uschia l'identitad svizra. Nus faschain attenziun da pledentar e da reunir cun nossas purschidas tut ils umans en Svizra cun lur ambients da viver multifars.

Nossa collavuraziun interregiunala sustegna il barat da purschidas e projects naziunals.

Relaziun

Nossa purschida da program cuntanscha e motivescha tut las gruppas en mira.

 

Nus vulain crear vinavant experientschas cuminaivlas per las differentas parts da la societad svizra – a chaschun d'occurrenzas grondas naziunalas da cultura, da sport, da politica e da divertiment – e quai uschè savens sco pussaivel en directa.

Tut ils umans en Svizra sa sentan pledentads da nossa purschida, independentamain da la schlattaina, da la vegliadetgna, da la derivanza, da la religiun, da l'orientaziun sexuala, d'impediments u da models da viver. Nus extendain la quantitad da la purschida per persunas cun impediments dals senns.

Nus gidain a crear ed a salvar la memoria audiovisuala dal pajais.

Nus rinforzain ina societad svizra averta e transparenta.

 

En dialog regular cun la societad communitgain e declerain nus las valurs dal service public che nus represchentain. En collavuraziun cun l'uniun purtadra ans barattain nus regularmain cun persunas da diversas realitads da viver e promovain nossa savida areguard ils basegns e las spetgas. Uschia vegnin nus pli datiers a la societad svizra e rinforzain sia chapientscha per e la fidanza en la chasa da medias publica da la SSR.

Nus tractain premurusamain las datas d'utilisaziun e las datas d'utilisadras ed utilisaders, infurmain a moda transparenta davart il diever ed elavurain directivas respectivas.

Nus rendain accessibels a la publicitad uschè bain sco pussaivel ils archivs per il diever cuminaivel. Nus surpiglian nossa obligaziun envers las generaziuns dad oz e dal futur e manain l'interpresa a moda persistenta.

Nus contribuin fermamain a l'ecosistem medial svizzer.

 

Nus cuntinuain la collavuraziun raschunaivla cun tut ils acturs da la cuntrada mediala svizra privata: emetturs da radio e televisiun privats, gruppas da pressa e plattafurmas digitalas independentas («pure player»).

Nus tgirain la collavuraziun cun auturas ed auturs independents sco era cun l'industria audiovisuala.

Nus intensivain nossa collavuraziun cun start-ups, universitads e scolas autas en il sectur da l'innovaziun mediala, tecnologica e da communicaziun.

Resursas

Nus rinforzain la forza innovativa da las collavuraturas e dals collavuraturs.


Nus rinforzain la rolla e las abilitads dal cader per garantir in management flexibel e dinamic e per sustegnair la SSR da daventar in'interpresa transmediala. Nus nizzegian il potenzial e la savida da nossas collavuraturas e da noss collavuraturs e sviluppain lur abilitads.

Il respect e l'appreziaziun vicendaivla èn las pitgas da nossa collavuraziun. Nus promovain activamain la chapientscha vicendaivla da las collavuraturas ed dals collavuraturs da differents ambients da viver a l'intern da nossa organisaziun.

Nus essan ina patruna attractiva per persunas da differentas realitads da viver, independentamain da caracteristicas sco schlattaina, vegliadetgna, origin, religiun, orientaziun sexuala, impediments u models da viver.

Cun purschidas da perfecziunament attractivas e specificas promovain nus ina cultura d'emprender e sustegnain la mobilitad professiunala.

Nus procurain per ina diversitad optimala quai che reguarda la cumposiziun da teams e dain paisa a l'egualitad da las schanzas ed ad ina represchentanza equilibrada da tut las schlattainas en posiziuns da gronda responsabladad.

Nus augmentain l'effizienza e la rentabilitad en tut la chadaina da creaziun da valur dals cuntegns da program.


Nus realisain ulteriurs potenzials per reducir ils custs. Per far quai sviluppain nus novas metodas da producziun, verifitgain ils standards da noss indrizs e da nossas investiziuns en il manaschi d'infrastructura e reducin il basegn da spazi, en spezial cun models da lavur flexibels. Ils novs process da lavur duain esser pli simpels, pli flexibels ed orientads sin il resultat.

Imports spargnads periodicamain vegnan reinvestids en la purschida da program ed en la transfurmaziun digitala.

Nus creain las premissas tecnologicas per pudair profitar maximalmain da las datas existentas e novas.

Ils princips da la direcziun responsabla («corporate social responsibility») furman la basa per tut las decisiuns.

Nus impundain ils meds publics a moda premurusa e transparenta.

 

La SSR sa mantegna ina flexibladad finanziala ed ha en mira in equiliber da sia planisaziun da finanzas sur la media (quatter onns). Il cashflow pussibilitescha da finanziar sias investiziuns. Grazia a ses agen chapital è ella preparada per eventuals ristgs.