Resultat annual equilibrà 2018 da la SRG SSR
La SSR concluda l’onn 2018 cun in resultat annual stabil da 6,8 milliuns francs. Quai malgrà las entradas reducidas da las taxas da recepziun e las entradas commerzialas vinavant regressivas. A medem temp èn creschidas las expensas per il program e la producziun – quai surtut pervi d’occurrenzas grondas da sport. Il 2018 è la SSR stada occupada cumplainamain cun la votaziun «No Billag» e la lantschada d’in program da respargn e da reinvestiziun.
La SSR guarda enavos sin in onn animà. Il 2018 è stada en il focus la votaziun davart l’iniziativa dal pievel «No Billag» che aveva sveglià ordavant ina debatta lunga ed intensiva davart la rolla dal service public. A partir da la primavaira ha la SSR stuì elavurar in program da respargn e da reinvestiziun cumplessiv da totalmain 100 milliuns francs. 80 milliuns francs sa resultan da las entradas sbassadas e plafonadas da las taxas da recepziun, da las entradas da reclama regressivas da la SSR e da las novas incumbensas en il mandat da prestaziun. Ultra da quai vul ella reinvestir 20 milliuns francs en il program (ficziun) ed en il svilup d’ina offerta digitala. L’onn da gestiun 2018 ha la SSR mess d’in maun gia 11,2 milliuns francs per il plan social e 34,1 milliuns francs per ulteriuras expensas da restructuraziun per preparar il plan da refurma che vegn realisà dapi l’entschatta da l’onn.
Las entradas da las taxas da recepziun èn sa reducidas visavi l’onn precedent per 12,1 milliuns francs, quai ch’è d’attribuir als custs per la midada dal sistem. Il retgav commerzial è sa reducì vinavant sco gia ils onns precedents (-11,9 milliuns francs). Quai è d’attribuir als svilups sin il martgà da reclama e surtut ad in spustament da las expensas da reclama sin ils chanals digitals e las plattafurmas da social media.
Ils custs da persunal èn s’augmentads per 20,4 milliuns francs, quai ch’è d’attribuir surtut a las retenziuns en il rom dal program da respargn e da reinvestiziun ed en ina pli pitschna dimensiun als custs per il svilup da las pajas.
Las expensas per il program e la producziun èn creschidas il 2018 per 50 milliuns francs. D’ina vart è quai d’attribuir als custs per ils dretgs da transmissiun e per las producziuns da las occurrenzas grondas da sport sco ils Gieus olimpics d’enviern a Pyeongchang u il Campiunadi mundial da ballape en Russia. Da l’autra vart ha la SSR fatg remessas en il sectur da distribuziun.
Cun vender in bain immobigliar ha la SSR ultra da quai realisà in gudogn da contabilitad da 63,2 milliuns francs (taglias deducidas). Quai ha gì per consequenza che las entradas èn creschidas visavi l’onn precedent per totalmain 54,3 milliuns francs.
Tut en tut concluda la SSR l’onn 2018 cun in resultat equilibrà da 6,8 milliuns francs.
Il plan da refurma 2019 vegn ad occupar la SSR era durant l’onn current. La finamira è dentant da realisar quel cun uschè paucas consequenzas sco pussaivel per l’offerta da program ed il persunal. Quai ha per consequenza che las mesiras per sbassar ils custs dovran temp per vegnir realisadas. La finamira dal plan da refurma da la SSR è da pudair preschentar – suenter in resultat probablamain negativ l’onn current – a partir dal 2020 puspè in resultat equilibrà.
La SSR preschenta il rapport da gestiun 2018 ils 26 d’avrigl 2019 a la radunanza da delegadas e delegads per l’approvaziun. Ils 30 d’avrigl 2019 vegn el publitgà sin www.srgssr.ch.
Post da medias SSR, Edi Estermann
medienstelle.srg(at)srgssr.ch / tel. 031 350 95 95
