Renfatschas da mulesta: ils rapports da las examinaziuns externas èn sin maisa – la SSR realisescha mesiras

Ils 31 d'october 2020 aveva ina gasetta da la Svizra franzosa rapportà davart cas da mulesta presumabels tar RTS. Il cussegl administrativ da la SSR ha agì immediat ed instradà ils 4 da november 2020 (vesair la communicaziun a las medias) – tenor cunvegnientscha cun il directur general da la SSR ed il directur da RTS ed en collavuraziun cun il partenari social, il Sindicat svizzer dals meds da massa (SSM) – examinaziuns externas independentas. 

Quellas han duì examinar l'efficacitad dals instruments existents en l'entira interpresa per annunziar ed evitar cumportament sbaglià e per proteger l'integritad persunala da las collavuraturas e dals collavuraturs e far propostas da meglieraziun (examinaziun 1), sclerir las responsabladads dal persunal directiv e da tut ils posts spezialisads involvids sur tut ils plauns da direcziun ora (examinaziun 2) ed intercurir ils trais cas ch'èn stads l'october 2020 en las medias (examinaziun 3).

Organs d'examinaziun externs independents 

La Revisiun interna da la SSR, che sustegna il cussegl administrativ da survegliar l'interpresa, è vegnida incumbensada cun l'examinaziun 1. Las lavurs da scleriment èn vegnidas fatgas sut la direcziun da dr. Ursula Gut-Winterberger, commembra dal cussegl administrativ da la SSR, ed en collavuraziun cun dr. Claudia Kaufmann, anteriura mediatura publica da la citad da Turitg.

L'examinaziun 2 è vegnida fatga da Muriel Epard, anteriura presidenta da la Dretgira chantunala dal Vad, e da Stanislas Zuin, anteriur president da la Curt dals quints da Genevra.

La chanzlia d'advocatas genevrina «Troillet Meier Raetzo» è spezialisada sin dretg da lavur ed è s'occupada da l'examinaziun 3. Quest mandat è vegnì surdà da la direcziun da RTS per incumbensa da la direcziun generala da la SSR ed en cunvegnientscha cun il SSM ed approvada da la cumissiun dal persunal dal cussegl administrativ da la SSR.

Meglierar ils instruments e mesiras persunalas

Il rapport d'examinaziun 1 suttastritga la nulla toleranza visavi tut las furmas da mulesta u violaziun da l'integritad e dignitad persunala da collavuraturas e collavuraturs da la SSR. Ils instruments per proteger las collavuraturas ed ils collavuraturs (annunzia a la superiura/al superiur, a las Resursas umanas, il post d'annunzia extern da whistleblowing, access a l'interpresa da cussegliaziun sociala Movis) che stattan oz gia a disposiziun en l'interpresa han mussà mancos. Quels stuess ins curreger e cumplettar cun mesiras supplementaras e mecanissems da controlla. 

Il cussegl administrativ ha perquai decidì las suandantas miras e mesiras: 

• etablir ina tenuta clera d'ina politica da nulla toleranza 
• introducir la posiziun da «persunas da confidenza» internas che stattan a disposiziun a las collavuraturas ed als collavuraturs en las unitads d'interpresa; plinavant crear la posiziun d'ina persuna mediatura externa
• La responsabladad suprema per quest tema surpiglian las persunas cun responsabladad da manar. Questa responsabladad na po betg vegnir delegada. Las collavuraturas ed ils collavuraturs en posiziuns directivas ston perquai absolver in program da scolaziun obligatoric che sensibilisescha sistematicamain per il tema mulestas e las intervenziuns correspundentas. 

Tgi che n'observa betg las novas disposiziuns duai vegnir punì cun sancziuns specificas. 

Il cussegl administrativ ha incumbensà la Revisiun interna e la direcziun da la SSR da realisar las mesiras decididas. Il process da realisaziun duai vegnir concepì a moda participativa. Il cussegl administrativ dat gronda prioritad a las meglieraziuns e vegn ad accumpagnar stretgamain l'introducziun e la controlla dals effects dals novs instruments per che la SSR restia er en il futur ina patruna moderna ed attractiva. Las meglieraziuns duain plinavant era gidar da rinforzar e d'adattar las pretensiuns da la cultura d'interpresa a las prescripziuns dal cussegl administrativ. 

Analisa da las responsabladads

En il rapport d'examinaziun 2 davart las responsabladads dal persunal directiv e da tut ils posts spezialisads involvids sur tut ils plauns da direcziun ora han expertas ed experts externs constatà ch'il management ha agì a moda adequata en dus dals trais cas examinads. En il terz cas han ins constatà mancos da manar en las partiziuns spezialisadas da RTS. Quels deficits vegnan elavurads da la direcziun da RTS che infurmescha bainbaud en quel connex. RTS ha plinavant dà l'incumbensa da far in'examinaziun externa dal management da persunal e dals servetschs da persunal. Ils resultats da quels scleriments spetg'ins proximamain.

Gilles Marchand, directur da RTS dal temp ch'ils cas en succedids, aveva ina responsabladad da surveglianza secundara ch'el ha tenor il giudicat da las expertas e dals experts externs tralaschà en il terz cas. Las expertas ed ils experts na valiteschan quai però betg sco sbagl gravant. Il cussegl administrativ è da l'avis che Gilles Marchand saja la dretga persuna per realisar cun success ensemen cun la direcziun las midadas pretendidas en la cultura d'interpresa da la SSR. Al directur da RTS actual, Pascal Crittin, na pon ins tenor las expertas ed ils experts externs renfatschar nagin cumportament sbaglià. Per il cussegl administrativ na datti perquai era nagin basegn d'agir.

En cunvegnientscha cun il directur è il schefredactur da las novitads da televisiun da RTS sa decidì da bandunar l'interpresa per pussibilitar in nov cumenzament. Il manader da la partiziun dal persunal da RTS vegn a remetter sia funcziun. RTS infurmescha en quel connex cun in'atgna communicaziun a las medias ed in'infurmaziun per il persunal oz, venderdi suentermezdi.

En il rapport d'examinaziun 2 vegnan fatgas ulteriuras recumandaziuns che vegnan examinadas las proximas emnas areguard la realisaziun.

Examinaziun detagliada dals resuns tar RTS

Ils trais cas, dals quals las medias han rapportà en detagl, pertutgan differentas situaziuns. En l'emprim cas che concerna in collavuratur che ha en il fratemp bandunà RTS n'han las expertas ed ils experts independents constatà nagina mulesta sexuala u mobing.

En ils dus auters cas examinads han las expertas ed ils experts dentant constatà acziuns ch'èn vegnidas qualifitgadas sco mulestas en il senn da l'artitgel 328 dal Dretg d'obligaziuns svizzer (responsabladad dal patrun). En connex cun quels dus cas ha RTS prendì mesiras. Per motivs che han da far cun la protecziun da la persunalitad che la SSR respecta na pon vegnir fatgas naginas ulteriuras indicaziuns davart ils singuls cas. 

Parallel a l'examinaziun 3 è stada en funcziun fin mez schaner 2021 ina hotline externa per annunziar incorrectadads en il mintgadi da lavur tar RTS. En tut hai dà ils ultims ventg onns 220 resuns. Tut las annunzias vegnan examinadas mintgina per sai ed en detagl e cas problematics elavura l'interpresa immediat. 

Elavuraziun dals resuns tar RSI 

En consequenza dals scleriments tar RTS ha il partenari social SSM endrizzà ina hotline externa era tar RSI. Silsuenter han RSI e SSM mandatà communablamain in'examinaziun externa. En in'emprima fasa han ins fatg ina triascha da las 38 annunzias. Las renfatschas da mulesta resp. violaziun da l'integritad persunala èn vegnidas surdadas suenter a duas advocatas e dus advocats che examineschan ils cas per incumbensa da RSI. Il rapport final è previs per la fin da zercladur 2021. 

L'ulteriura procedura 

Il president dal cussegl administrativ da la SSR Jean-Michel Cina manegia: «Il cussegl administrativ da la SSR ha reagì fitg spert ed a moda decidida suenter las novas l'atun 2020 ed ha incumbensà – en cunvegnientscha cun il partenari social – expertas ed experts externs da far examinaziuns detagliadas. Sin fundament dals resultats e las recumandaziuns ch'èn ussa sin maisa han ins decidì emprimas mesiras ed incumbensà la direcziun da la SSR cun ulteriuras. Qua tras ha la SSR elavurà conscienziusamain ed a moda accurata il tema. La SSR na tolerescha nagin maldiever da pussanza, naginas mulestas sexualas e sexisticas e nagin mobing al plaz da lavur. En l'avegnir vegnin nus a pudair proteger anc meglier la persunalitad e l'integritad persunala da nossas collavuraturas e noss collavuraturs – ed jau dumond tuts per perdun, tar ils quals quai n'è anc betg reussì a nus en il passà.»

La commembra dal cussegl administrativ Ursula Gut-Winterberger: «I dovra ina midada da paradigma che premetta che las persunas cun responsabladad sa sentian cumpetentas e responsablas per il tema, vivian la cultura giavischada dal cumportament respectus e dal clima da lavur senza tema. Il cussegl administrativ pretenda ch'i vegnia etablida ina tenuta clera e visibla d'ina politica da nulla toleranza.»

Il directur general da la SSR Gilles Marchand: «La situaziun difficila, en la quala nus ans chattain, mussa che las mesiras d'enfin qua per scuvrir abus e proteger las collavuraturas ed ils collavuraturs na tanschan betg. Jau deploresch quai e sun fermamain decis da realisar ensemen cun l'entira direcziun uschè spert sco pussaivel las mesiras necessarias.»
 
Il rapport d'examinaziun 2 (anonimisà) è disponibel: Externer Untersuchungsbericht Verantwortungskette (deutsch)