Play Suisse festivescha ses giubileum dad in onn

Ils 7 da november 2020 ha la SSR lantschà la plattafurma da streaming Play Suisse cun la finamira da daventar il nov dachasa per istorgias svizras cun reunir en in lieu films, serias e documentaziuns. Dapi lura è capità bler: producziuns d'auta qualitad, partenadis interessants, novas funcziuns, dapli cuntegns ed ina gronda creschientscha. Play Suisse po guardar enavos sin in onn reussì. Entant dumbra la plattafurma da streaming da la SSR 340'000 contos d'utilisadras e d'utilisaders. Cun en media mintga mais 690'000 aspectaturas ed aspectaturs è ella, tenor in studi da Digimonitor, sin il segund plaz da las plattafurmas da streaming (SVOD) svizras nizzegiadas il pli savens. Il pli gugent consumeschan las utilisadras ed ils utilisaders ils cuntegns via laptop (48%), smartphone (33%) e televisiun (18%). La durada d'utilisaziun a la televisiun importa il dubel da quella al smartphone. 

Bakel Walden, directur svilup e purschida da la SRG SSR: «Cordiala gratulaziun a Play Suisse, ch’è s'etablì grazia ad ina lavur engaschada en tut las regiuns gia suenter curt temp ad in lieu d’inscunter da streaming per istorgias svizras. E nus avain anc bleras ideas, perquai che Play Suisse n’è betg l’ultim era in impurtant project da transfurmaziun per la SSR. Grazia a questa plattafurma ans sviluppain nus vinavant sin differents champs – da la collavuraziun interregiunala, la persunalisaziun fin a l’innovaziun tecnica.

In quart dals cuntegns vegn nizzegià interregiunalmain. Maratonistas e maratonists da serias pon guardar ils 2'700 titels che cuntegna il catalog senza interrupziun e da l'entschatta enfin la fin entaifer 2072 Stunden (90 dis). U tuttina pli gugent cumenzar mintgamai cun ils tschintg megliers da las spartas films, serias e documentaziuns? Ils films guardads il pli savens sin Play Suisse èn: 1. «Die göttliche Ordnung», 2. «Gotthard», 3. «Schellen-Ursli», 4. «La demoiselle miracle» e 5. «Titeuf, der Film». Las serias las pli popularas èn: 1. «Wilder», 2. «Der Bestatter», 3. «Frieden», 4. «Neumatt» e 5. «Seitentriebe». Ed en il rom d'ina saira documentara captivanta han ins guardà il pli savens 1. «La Suisse de nuit», 2. «Beyond boobs», 3. «Bye bye la Suisse », 4. « La grande histoire du ski» e 5. «Haute route d'hiver». 

Gilles Marchand, directur general da la SRG SSR: «Play Suisse è in dals pli interessants ed innovativs projects che la SSR ha lantschà ils ultims onns. La plattafurma collià la Svizra, fa punts tranter ils cunfins linguistics e metta il svilup tecnic en servetsch da la publicitad. Play Suisse è in bun exempel per in service public dal 21avel tschientaner. Perquai ma legrel jau dal svilup marcant da la plattafurma e da pudair engraziar al team che ha lavurà ils ultims 12 mais per quest project, ma era a nossas partenarias e noss partenaris da la branscha da producziun independenta svizra. Cordiala gratulaziun, Play Suisse!»

Ils diesch films da kino svizzers cun il pli grond success ed ulteriurs highlights da serias

Per festivar il giubileum dad in onn pon ins guardar sin Play Suisse a partir d'immediat e per l'emprima giada a moda unida sin ina plattafurma da streaming ils diesch films da kino svizzers cun il pli grond success. Ils suandants diesch highlights dal film svizzer èn disponibels en il sectur separà «Ils diesch films da kino svizzers cun il pli grond success insumma»: 

• «Die Schweizermacher» da Rolf Lyssy, 1978
• «Die Herbstzeitlosen» da Bettina Oberli, 2006
• «Mein Name ist Eugen» da Michael Steiner, 2005
• «Achtung! Fertig, Charlie!» da Mike Eschmann, 2003
• «Heidi» dad Alain Gsponer, 2015
• «Schellen-Ursli» da Xavier Koller, 2015
• «Les Petites Fugues» dad Yves Yersin, 1979
• «Grounding- Die letzten Tage der Swissair» da Michael Steiner e Tobias Fueter, 2006
• «Die göttliche Ordnung» da Petra Volpe, 2017
• «Ein Schweizer namens Nötzli» da Gustav Ehmck, 1988

A partir da la fin da november 2021 è disponibla l'emprima stagiun da la nova cumedia da polizia «Tschugger». La quarta stagiun da la seria criminala «Wilder» suonda la fin da schaner, l'emprima stagiun da la soap «Lüthi&Blanc» la fin da favrer e la nova seria da thriller «Hors saison» la fin da mars 2022. 

Sin la plattafurma da streaming Play Suisse pon ins sa registrar gratuitamain sin playsuisse.ch per acceder als cuntegns da la SSR ed a coproducziuns (films, serias, documentaziuns, material d'archiv) en las linguas rumantsch, tudestg, talian e franzos.