Nova seria sin Play Suisse: «La chance de ta vie»

Gudagnar ina giada il jackpot dal lotto e posseder d'in di a l'auter 160 milliuns francs: en la nova seria da comedy «La chance de ta vie» n'è quai betg mo in siemi, mabain la situaziun da partenza. La saga da famiglia sturna e divertenta raquinta il dilemma d'ina famiglia tut normala che vegn tuttenina en contact cun il mund da luxus e divertescha aspectaturas ed aspectaturs da tut las vegliadetgnas. Cun bler umor vegnan tractads era temas serius sco l'inegualitad sociala e la dumonda da l'orientaziun sexuala. 

Il reschissur da films svizzer Chris Niemeyer ha occupà las rollas en la seria exclusivamain cun acturas svizras ed acturs svizzers. Las rollas principalas giogan Karim Barras, Zoé Schellenberg, Joan Mompart, Roland Vouilloz e Claude-Inga Barbey. La seria è vegnida filmada dals 14 da settember fin ils 4 da december 2020 en la citad ed il conturn da Genevra. 

La producenta Izabela Rieben: «Era sche comedy resta adina ina ristga, è ella ina schanza per nossas acturas e noss acturs talentads da la Svizra romanda. Cun ses caracters fantastics ed extravagants porscha ‹La chance de ta vie› ad els in terren fritgaivel per demonstrar l'entira paletta da lur cumpetenzas.»

Tut las episodas da la seria pon ins guardar a partir da questa saira a las 21.00 exclusivamain sin Play Suisse, la plattafurma da streaming da la SSR. La seria è per franzos, tudestgs e talians. A partir dals 9 da settember vegnan emessas la gievgia a las 21.10 duas episodas sin RTS. Sin SRF zwei pon ins guardar la seria ils 15, 16 e 23 da settember a las 20.10. 

Ulteriurs highlights da serias suondan 

«La chance de ta vie» dat l'entschatta a l'atun da serias sin la plattafurma da streaming Play Suisse. I suondan ulteriurs highlights, sco per exempel il drama da famiglia «Neumatt» che cumenza il settember e che tracta l'ierta d'in bain puril. L'october suonda la segunda stagiun dal thriller cun l'assassin en seria «Arthur». Il november èn lura disponiblas sin Play Suisse l'emprima stagiun dal psicothriller «Sacha» e la cumedia da polizia «Tschugger». 

Per avair access a cuntegns da la SSR ed a coproducziuns (films, serias, documentaziuns, material d'archiv) en tudestg, franzos, talian e rumantsch sin la plattafurma da streaming Play Suisse pon ins sa registrar gratuitamain sin playsuisse.ch.