Luigi Pedrazzini nov vicepresident dal cussegl d'administraziun da la SSR

Communicaziuns a las medias 17.12.2019

A chaschun da la sesida dals 13 da december è il cussegl d'administraziun da la SSR sa constituì da nov per la perioda d'uffizi 2020 fin 2023. Luigi Pedrazzini da Locarno è vegnì elegì sco nov vicepresident dal cussegl d'administraziun e quai sco successur da Jean-François Roth che demissiunescha.

Luigi Pedrazzini

Luigi Pedrazzini è dapi il 2012 president da la Società cooperativa per la Radiotelevisione svizzera di lingua italiana (Corsi) ed uschia commember dal cussegl d'administraziun da la SSR. A chaschun da la sesida dals 13 da december ha il cussegl d'administraziun elegì ussa Pedrazzini sco nov vicepresident. El daventa successur da Jean-François Roth che abditgescha sin la fin da l'onn sco president da Radio Télévision Suisse Romande (RTSR) e che sorta damai dal cussegl d'administraziun da la SSR, e quai suenter 12 onns. Ses successur sco president da RTSR e sco commember dal cussegl d'administraziun daventa – sco gia communitgà – Mario Annoni, anteriur cusseglier guvernativ da Berna.

La radunanza da delegadas e delegads (RD) da la SSR dals 22 da november ha gia confermà en il cussegl d'administraziun il president dal cussegl d'administraziun Jean-Michel Cina e las duas ulteriuras represchentantas tschernidas da la RD sco commembras dal cussegl d'administraziun, Sabine Süsstrunk ed Alice Šáchová-Kleisli.

Jean-Michel Cina davart la midada en il cussegl d'administraziun: «Jean-François Roth ha represchentà la Svizra romanda en il cussegl d'administraziun da la SSR cun vastas enconuschientschas professiunalas e cun fitg bler engaschi. Jau engraziel ad el per quest engaschament prezius en favur dal service public e benevent cordialmain Mario Annoni en noss gremi.»

Post da medias SRG SSR
Edi Estermann
medienstelle.srg@srgssr.ch / tel. 031 350 95 95