La SSR sustegna il festival da litteratura «Lettere dalla Svizzera alla Valposchiavo»

Communicaziuns a las medias 28.09.2021

La Societad svizra da radio e televisiun SSR è la partenaria da medias uffiziala da l'emprima ediziun dal festival da litteratura «Lettere dalla Svizzera alla Valposchiavo» (Brevs da la Svizra al Puschlav). Dal 1. fin ils 3 d'october stattan en il center a Poschiavo la litteratura svizra, il barat cun e tranter las auturas ed ils auturs e la plurilinguitad da la Svizra.

La plurilinguitad è senza dubi in dals pli gronds bains culturals da la Svizra. Questa varietad linguistica stat en il center dal festival da litteratura «Lettere dalla Svizzera alla Valposchiavo» dal 1. fin ils 3 d'october a Poschiavo. Diversas scripturas e divers scripturs translinguals prelegian da lur ovras e partan las experientschas che collian els cun quellas. Il festival fa la punt d'ina lingua a l'autra e pussibilitescha in barat cultural tranter il public e las auturas ed ils auturs da las quatter regiuns linguisticas. 

Ultra da la represchentaziun d'avertura cun l'artista vocala Federica Gennai il 1. d'october cumpiglia il program var diesch inscunters cun auturas ed auturs svizzers da renum: tranter auter las victuras ed ils victurs dal Premi svizzer da litteratura Doris Femminis, Dumenic Andry, Dragica Rajcic Holzner e Noëlle Revaz. Il festival inizià da Begoña Feijoo Fariña, coordinatura dal project, vegn realisà d'in comité da program. Quel sa cumpona da Walter Rosselli, scriptur e translatur dal rumantsch e franzos, Fabiano Alborghetti, poet, promotur cultural e president da la chasa da litteratura da la Svizra taliana sco era da la poetessa e promotura culturala Begoña Feijoo Fariña. 

Poschiavo sco lieu dal festival

Sin fundament da las grondas undas da migraziun vers la fin dal 19avel tschientaner e las remigraziuns suandantas è la plurilinguitad enragischada profundamain en la Val Puschlav. En intginas variantas dal dialect puschlavin chatt'ins surtut pleds che derivan da l'englais e dal spagnol. Ultra da quai discurr'ins en la val era tudestg. La vischnanca multilinguala da Poschiavo è perquai il lieu ideal per realisar il festival «Lettere dalla Svizzera alla Valposchiavo». 

Contact

Post da medias da la SSR
Edi Estermann
058 136 21 21
medienstelle.srg@srgssr.ch