La SRG SSR sut l'ensaina da la musica svizra

Da Nativ sur Pablo Nouvelle fin a Marco Zappa: al Di da la musica svizra vegn la diversitad da la creaziun musicala helvetica festivada cun tut ses stils da musica. Durant 24 uras emettan ils chanals da radio da la SRG SSR exclusivamain musica svizra. Il program vegn cumplettà cun intervistas, concerts en directa da musicistas e musicists svizzers ed emissiuns spezialas. Er en la televisiun, sin ils chanals digitals – en spezial la plattafurma da musica mx3.ch da la SRG SSR – sco era sin Play Suisse vegn la musica svizra ad esser en il focus. 

Ils puncts culminants dal program tar RTR

RTR beneventa il chantadur da pop Baschi sco era Benedetto Vigne, in'instituziun da la musica rumantscha, en il studio da radio. Dapi ils onns 80 nua ch’el ha segnà per l'emprim videoclip da musica rumantsch ha Benni Vigne creà bain inqual mument istoric per la musica rumantscha moderna. Tar RTR guardan ils dus giasts sin lur istorgia musicala, tradeschan dapli davart muments musicals impurtants da la Svizra e scuvran forsa perfin insatge nov? In ulteriur highlight sin RTR è la transmissiun da la Festa federala da la musica populara a Bellinzona – en purtret e tun, al radio ed on demand.

Ils puncts culminants dal program tar RTS, RSI e SRF datti en las communicaziuns a las medias da las autras linguas. Vus pudais adattar cun in clic la lingua sin la pagina-web.

Il Di da la musica svizra sin Mx3 e Play Suisse

Durant il Di da la musica svizra pon ins filtrar e scuvrir musica da tut ils geners sin la plattafurma Mx3. Quai funcziunescha a moda simpla e ludica tenor regiuns ed emetturs da radio. L'eveniment pudais Vus giudair sin musiktag.mx3.ch.

La plattafurma da streaming da la SRG SSR porscha en la collecziun «Di da la musica svizra» ina maschaida particulara da concerts e documentaziuns da musicistas e musicists svizzers. In pèr puncts culminantas: «Gotthard», «Bâloise Session – Lo & Leduc», «Jazz-in Concert – Franco Ambrosetti» e «Concert Label Suisse Festival – Arthur Hnatek & Yilian Cañizares».

Musica populara live da Bellinzona cun il «Pavillon Suisse»

Dals 21 fin ils 24 da settember ha lieu a Bellinzona la Festa federala da la musica populara. In punct culminant è il «Pavillon Suisse» sin la Piazza del Sole cun concerts da musicistas e musicists respectivamain da gruppas da musica da differentas parts da la Svizra. Divertiment musical porschan il Tessinais Marco Zappa cun ses program «Profumi ticinesi» che mussa la tradiziun viva da la musica populara en il Tessin, la famiglia musicala La-Fa-Mi-Tille da Château d'Oex, ils giuvens da Schiers e Seewis cun il num Prättigauer Power ed il trio da famiglia Rusch-Büeblä dal Wägital en il chantun da Sviz. Tras il program accumpogna il quartet da moderaziun Patricia Moreno (SRF), Davide Fersini (RSI), Francesco Biamonte (RTS) e Hugo Schär (RTR). Il Di da la musica svizra vegn il «Pavillon Suisse» emess a partir da las 20.00 live sin SRF 2 Kultur, Rete Due, Espace 2 e RTR. Il program cumplet da radio e televisiun da la SRG SSR da la Festa federala da musica populara chattais Vus en la communicaziun a las medias . «La SRG SSR è partenaria da medias da la Festa federala da la musica populara a Bellinzona».

Il project da la SRG SSR «Jeunes Talents Suisses» al Festival Alpentöne

A chaschun dal Festival Alpentöne 2023 è sa preschentà l'orchester da project da la SRG SSR che consista dad otg talents musicals da las quatter regiuns linguisticas da la Svizra. Innovaziun sin basa da tradiziun è stada la finamira dals giuvenils che han elavurà aposta per questa festa in nov repertori da musica populara. Al Di da la musica svizra tematisescha l'emissiun «Künste im Gespräch» sin SRF 2 Kultur quest project e discutescha las suandantas dumondas: Tge pussaivladads datti per la promoziun e la scolaziun da la musica populara svizra? Pon ins studegiar e sunar musica populara svizra senza esser part da l'ambient folcloristic? Ultra da quai vegn la documentaziun da concert dals Jeunes Talents Suisse dal Festival Alpentöne publitgada sin Play RTR ed ins po guardar il concert cun il titel «Jeunes Talents in Concert» en la televisiun sin SRF Dus.

La SRG SSR e la musica svizra

La SRG SSR porscha ina gronda tribuna a la musica svizra, e quai betg mo il Di da la musica svizra. Tuttina sche pop, rock, musica populara, jazz, opera u classica: ils emetturs da radio da la SSR promovan musica svizra da tut las direcziuns da stil. En la «Charta da la musica svizra», la cunvegna cun la branscha da musica svizra, s'oblighescha la SSR d'emetter en ses programs da radio ina quota commensurada da producziuns da musica svizras. Sin tut ils chanals da radio è la quota da musica svizra auta. Tar ils emetturs tematics sco Radio Swiss Pop, Swiss Jazz u Swiss Classic importa ella var 50 pertschient. Il medem vala per Radio SRF Virus, Radio SRF Musikwelle e Radio RTR. Ultra da quai porscha la SRG SSR ina plattafurma a persunas giuvnas activas sin il champ musical ed ella promova uschia talents giuvens.

Plinavant mussan ils chanals da televisiun da la SRG SSR da tut las regiuns linguisticas mintg'onn passa tschient uras registraziuns da concert da bands svizras. Sin Play Suisse, la plattafurma da streaming, stattan a disposiziun differentas registraziuns da concerts. La SRG SSR surdat premis per promover la musica, premis da promoziun a novas bands ed ella envida regularmain bands svizras a sa preschentar en directa al radio. Ultra da quai offra ella era trais portals da musica naziunals – mx3.ch, neo.mx3.ch e volksmusik.mx3.ch – via ils quals èn vegnids scuverts gia numerus talents giuvens sco Valeska, Pascal Gamboni, Kings Elliot, Marius Bear u Danista.