La SRG SSR è partenaria da medias da la Festa federala da la musica populara a Bellinzona

Dals 21 fin ils 24 da settember s'inscuntra il mund da la musica populara a la Festa federala da la musica populara – l'emprima giada a Bellinzona en il chantun Tessin. L'occurrenza che ha lieu mintga quatter onns è la sentupada la pli impurtanta da la scena da musica populara svizra. Las visitadras ed ils visitaders dastgan sa legrar sin furmaziuns da musica populara e represchentaziuns da tut las quatter regiuns linguisticas da la Svizra. 

La SRG SSR è partenaria da medias da la Festa federala da la musica populara e porscha in program da radio en directa tut spezial da la Piazza del Sole sco era in program da televisiun live da la Piazza Collegiata e da Castelgrande. Cun la finamira da mussar la diversitad e tut la dinamica da la musica populara è naschida in’offerta multifara d’emissiuns da musica e d’infurmaziun. Quellas pon vegnir consumadas live al lieu ubain pli tard a chasa cura ch’ins vul sin tut ils emetturs da la SRG SSR. Per l’emprima giada vegnan emessas tantas gruppas e tants stils ta musica durant in’occurrenza musicala al lieu.

Emissiun da televisiun quadrilingua «Bella Musica» live sin SRF, RTS e RSI

En il rom da la Festa federala da la musica populara vegn producida cun «Bella Musica» l'emprima emissiun televisiva quadrilingua da la musica populara da tut las quatter parts da la Svizra. Tut en tut sa preschentan diesch gruppas da musica – tranter auter Chilometro zero, La-Fa-Mi Tille, Ils Engiadinais ed il trio da ländler Täktig. L'emissiun en quatter linguas modereschan Nicolas Senn (tudestg), Jean-Marc Richard (franzos), Carla Norghauer (talian) e Maria Victoria Haas (rumantsch). L’emissiun d’in ura vegn transmessa live la sonda saira dal chastè Castelgrande. A partir da las 18.07 sin RTS 2 ed RSI LA 1 ed a partir da las 18.15 sin SRF 1. 

Play Suisse porta la musica populara en stiva

Jodel, tiba e ländler: La collecziun da Play Suisse «Musica populara svizra» porscha numerusas registraziuns da concerts da diversas festas da musica e da chant. Tranter auter da «The Fränzli Görls», dal «Tessiner Veteranen-Orchester» e dal «Ensemble Cantus Firmus Surselva». Ma era films documentars e reportaschas dal mund da la folclora sco per exempel «Volksmusik mit Herz und Seele» da Jean-Marc Richard, Laurent Pavia e Julian Nicole-Kay chatt'ins sin la plattafurma da streaming da la SRG SSR.  

Per la plattafurma da streaming Play Suisse pon ins sa registrar gratuitamain sin playsuisse.ch ed ha lura access a cuntegns da la SRG SSR ed a coproducziuns (films, serias, documentaziuns, material d'archiv) en tudestg, franzos, talian e rumantsch. 

Il program da radio e televisiun da la SRG SSR a chaschun da la Festa federala da la musica populara 

 

Il program è disponibels suenter la festa sin tut ils players da las unitads d’interpresa da la SRG SSR, numnadamain sin Play SRF, Play RTS, Play RSI e Play RTR.