La SRG SSR renovescha sia cunvegna cun la branscha audiovisuala da la Svizra

Communicaziuns a las medias 09.09.2022

La SRG SSR e las associaziuns da la branscha audiovisuala svizra han suttascrit oz venderdi a Berna lur nova cunvegna da collavuraziun. Quella reglescha la collavuraziun da la SRG SSR, da sias unitads d'interpresa e da las associaziuns da la branscha audiovisuala enfin la fin dal 2026.

Foto: Adrian Moser

A Berna è oz venderdi vegnida suttascritta la nova cunvegna da collavuraziun da la SRG SSR cun la branscha audiovisuala da la Svizra. Ils partenaris da contract da la SRG SSR èn las associaziuns da las producentas e dals producents da film, da la producziun per incumbensa sco da servetschs tecnics d'audio e video (camera, tun, glisch e grip, tagl, postproducziun maletg e tun, locaziun d'indrizs, euv.). En la cunvegna valaivla enfin la fin dal 2026 conferma la SRG SSR e la branscha audiovisuala lur intenziun da s'engaschar er en il futur per ina producziun audiovisuala d'auta qualitad en Svizra.

Da nov garanteschan las partidas dal contract ina meglra transparenza regiunala areguard las incumbensas, il volumen d'incumbensas ed il process da surdada. La cunvegna accentuescha en pli cleramain la «swissness» e garantescha uschia che vegnan promovidas en spezial producziuns naziunalas sco er purschiders da servetsch svizzers. Plinavant demussan la SRG SSR e sias unitads d'interpresa detagliadamain il volumen da surdada, defineschan las dimensiuns per ils proxims trais onns e discuteschan quellas cun las associaziuns signataras. Ins ha era pudì fixar il tema da la digitalisaziun che prevesa discurs sin nivel regiunal per promover la digitalisaziun da process tant en secturs administrativs sco era da la producziun tecnica. 

Partenaris activs durant blers onns

Ils partenaris da contract èn la SRG SSR, l'Associaziun svizra da l'industria tecnica dal maletg e dal tun (FTB/ASITIS), la Swissfilm Association (SFA), Il sindicat svizzer film e video (ssfv), la Gruppa auturAs, regissurAs, producentAs (GARP), la Swiss Film Producers' Association (SFP), l'Association romande de l'industrie audiovisuelle (ARIA) e la Cuminanza d'interess da producents da film independents (IG).

La SRG SSR è ina partenaria activa da la branscha audiovisuala – e quai gia dapi blers onns. Ultra da l'Uffizi federal da cultura è ella ina da las promoturas las pli impurtantas dal film svizzer ed ella sa participescha en il rom dal Pacte de l'audiovisuel mintg'onn a la producziun da films e da serias. En pli promova ella numerusas atgnas producziuns e coproducziuns e s'engascha sco partenaria da medias per festivals dal film.

Contact

Post da medias da la SRG SSR
Edi Estermann e Lauranne Peman
058 136 21 21
medienstelle.srg@srgssr.ch