Il na a No Billag: ina conferma che oblighescha

Communicaziuns a las medias 04.03.2018

Las votantas ed ils votants han refusà cleramain oz l'iniziativa No Billag. Per la SSR è il resultat legraivel cunzunt perquai ch'el è vegnì confermà en tut las regiuns linguisticas. En vista a la debatta cuntraversa munta il di dad oz per la SSR ina nov'entschatta ch'è era colliada cun cleras spetgas: la chasa da medias publica da la Svizra vegn a s'adattar a novas cundiziuns da basa finanzialas ed a novs basegns da la societad.

«Natiralmain èsi in bun di per la SSR, pertge las votantas ed ils votants han consolidà oz la legitimaziun dal service public medial», ha ditg Jean-Michel Cina, il president dal cussegl d'administraziun da la SSR a chaschun d'ina orientaziun da las medias dumengia a Berna. «Tuttina legraivel è il resultat per las 34 staziuns da radio e televisiun privatas che retschaivan ina part da las taxas. Ma surtut èsi in bun di per tut quellas e quels che vesan l'impurtanza d'ina purschida d'infurmaziun independenta ed equilibrada en tut las quatter regiuns linguisticas, che vesan l'impurtanza da pudair producir en atgna reschia films svizzers, da sustegnair la musica indigena e da purtar eveniments da sport svizzers en las stivas», cuntinuescha Cina. «Tge che la maioritad ha sustegnì oz, è l'idea d'ina Svizra solidarica e multifara.» Il president dal cussegl d'administraziun da la SSR ha engrazià a tut quellas e quels che han impundì lur forzas en favur da questas valurs e dal service public.

Refurmas, mesiras che augmentan l'effizienza, focus sin infurmaziun, producziun culturala e purschidas digitalas

Gilles Marchand, il directur general da la SSR, ha declerà: «Quest resultat n'è betg simplamain ina conferma per nus sco chasa da medias publica che serva a la publicitad en general – igl è ina nova entschatta per la SSR. Uss essan nus dumandads dad adattar nossa interpresa a novas cundiziuns da basa finanzialas ed a novs basegns socials. Nus vulain integrar ils resuns da la societad – tant ils encuraschants sco er ils critics.» La SSR vegn en in emprim pass a prender per mauns la realisaziun da trais pachets da refurmas ed a medem temp ad elavurar ulteriuras refurmas.

Pachet d’effizienza e refurmas da 100 milliuns

L’emprim pachet cumpiglia la dimensiun finanziala: sin fundament da la reducziun da taxas, dal plafonament da las entradas decis dal Cussegl federal e da las entradas da reclama adina pli bassas vegn la SSR a realisar in pachet d’effizienza e refurmas en in'autezza da 100 milliuns francs. Ella vegn a spargnar e daventar pli effizienta en ils secturs infrastructura, administraziun, tecnica, immobiglias, process da producziun e distribuziun.

Quest plan permetta a la SSR da reducir ils custs e da metter prioritads en ses champs d'activitads:

  • La SSR considerescha sco coc da sia incumbensa da garantir in'infurmaziun equilibrada ed independenta en las quatter regiuns linguisticas: 50 pertschient da las entradas da taxas vegnan impundidas en il program per infurmaziun.
  • La SSR vuless raquintar la Svizra en sia diversitad. Per quest motiv vegn promovì anc pli fitg l'engaschament en il senn d'ina producziun da cultura indigena plain fassettas –cunzunt en las spartas film e serias.
  • Sco chasa da medias publica sto la SSR s'adattar er a svilups en la societad. Perquai dat ella paisa a l'optimaziun da la purschida digitala. Ella vul installar ina plattafurma plurilingua che lubescha da render accessiblas al public sche pussaivel tut las producziuns da la SSR da tut las regiuns linguisticas en la translaziun correspundenta. 

La SSR sa concentrescha sin ses mandat da basa

Sco segund tema da refurma ha Marchand explitgà la concentraziun sin ils tratgs caracteristics da la chasa da medias publica e la cunfinaziun explicita quai che resguarda las purschidas da medias privatas. La debatta da las ultimas emnas ha mussà ch'il public stima la pussaivladad da distinguer cler e net tranter las purschidas da televisiun da purschiders privats e publics. Per quest motiv na vegn la SSR en l'avegnir betg ad interrumper cun reclama ils films lungs da la saira. Per rinforzar la distinguibladad er en il sectur digital desista la SSR en il futur da publitgar texts senza colliaziun cun ina contribuziun audio u video sin las purschidas d'infurmaziun online da SRF, RTS e RSI.

Intensivar la collavuraziun cun medias privatas

La SSR è da l'avis ch'i saja impurtant oz pli che mai da dar communablamain furma e forza a la plazza da medias Svizra per far frunt a la concurrenza internaziunala. En il sectur commerzial respecta la SSR ch'ella na dastga per in temp previsibel betg pli far reclama online. La SSR renunzia a la reclama che sa drizza a gruppas en mira specificas en las regiuns, era sche quai fiss regulatoricamain pussibel pli tard; ina decisiun per betg agravar la concurrenza cun las medias regiunalas. Quai che pertutga la firma da commerzialisaziun Admeira è la SSR averta per novas soluziuns constructivas. Per exempel è ella pronta da sustegnair l'admissiun da novs partenaris d'acziunariat.

Ultra da quai metta la SSR a disposiziun ses cuntegns archivads a purschiders da medias privats da la Svizra. Las modalitads s'orienteschan al model da shared-content, ina furma gia etablida che permetta a chasas da medias privatas da surpigliar gratuitamain videos da novitads da la SSR. En pli sa declera la SSR pronta dad installar ensemen cun autras staziuns da radio svizras in radio-player naziunal. La SSR è er averta per cooperaziuns che pertutgan il manaschi dals emetturs da musica Swiss Pop, Swiss Jazz e Swiss Classic.

Per sustegnair la SDA en la fasa da transfurmaziun, in temp difficil gist ussa, vegn la SSR a prolungar ses contract cun la SDA fin il 2019 tenor las cundiziuns actualas.

Cumenzament d'in process da midada durant ils proxims tschintg onns

Tut las unitads d'interpresa da la SSR mettan il proxim temp en il center da lur lavur las prioritads menziunadas. Quest plan d’effizienza e da refurmas vegn preschentà en il decurs da la stad 2018 en ina versiun detagliada. La realisaziun cumenza il 2019 e dura 5 onns. Gilles Marchand: «Quest 4 da mars vegn a marcar in punct da midada en l'istorgia da la SSR. Nus ans legrain dal resultat. Nus essan però conscients da l'obligaziun ch'el munta. In'obligaziun da tschertgar anc pli fitg il contact cun nossas gruppas d'interess e da midar nus sezs. Nus l'acceptain gugent – adina cun la societad, las burgaisas ed ils burgais e la Svizra en il center da nossa lavur.»

 

Post da medias SSR

Edi Estermann, manader dal post da medias
medienstelle.SRG(at)srgssr.ch / + 79 635 69 79