Il cussegl d'administraziun da la SSR beneventa il transferiment d'ina part da las redacziuns da radio SRF da Berna a Turitg
Il cussegl d'administraziun da la SSR ha approvà en sia seduta dad oz in transferiment parzial da las redacziuns da radio SRF da Berna a Turitg. Las totalmain 170 plazzas da lavur duain – cun resalva da la procedura da consultaziun – vegnir transferidas a partir da la fin dal 2020. La SSR vegn a rinforzar sia preschientscha a Berna cun novs projects ed ad accelerar vinavant la digitalisaziun. A medem temp reducescha ella las surfatschas d'immobiglias.
Per che la SSR possia realisar e sviluppar programs da radio ed autras contribuziuns d'audio d'auta qualitad ed adattads a l'avegnir, ha il cussegl d'administraziun da la SSR decis da transferir a Turitg ina part da las redacziuns da radio ch'èn staziunadas oz a Berna. Gilles Marchand, il directur general da la SSR: «Il service public è en servetsch da la societad. El sto s'adattar permanentamain a las novas cundiziuns da basa ed a medem temp anticipar il svilup da las medias. 15 onns suenter la revoluziun en il champ dal video stattan uss davant porta las proximas midadas en il champ da l'audio. En il dialog cun ils teams èsi impurtant da garantir la preschientscha da nossas emissiuns e da noss programs er en las novas furmas d'utilisaziun da las medias, per che nus possian satisfar a las spetgas da la publicitad ed ademplir noss'incumbensa.»
Cun reorganisar las redacziuns da radio cuntinuescha la SSR cun la digitalisaziun en il sectur da las medias. Questa midada concerna tut las unitads d'interpresa da la SSR en tut las parts dal pajais. Il transferiment parzial da las redacziuns da radio da SRF a Turitg a partir da la fin dal 2020 ha lieu cun resalva da la procedura da consultaziun prescritta legalmain.
Proteger ils programs e las plazzas da lavur
Cun il project d'immobiglias a Berna spargna la SSR mintg'onn 5 milliuns francs, e quai senza reducir plazzas da lavur e senza tangar il program. La proposta sustegnida dal cussegl d'administraziun da la SSR fa part dal program d'augment d'effizienza e da reinvestiziun, definì da la SSR per l'onn 2019, en l'autezza da totalmain 100 milliuns francs. En la Svizra tudestga spargna la SSR (direcziun generala/SRF) 12 milliuns francs cun projects d'immobiglias e d'infrastructura – 5 milliuns da quels a Berna en las sedias da SRF e da la direcziun generala. «Nus spargnain pli gugent en il sectur da las immobiglias ch'en il sectur schurnalistic. E nus vegnin a mantegnair la qualitad da noss programs da radio, independentamain dal lieu, nua ch'els vegnan producids», di Ruedi Matter, directur da SRF.
Las mesiras da spargn previsas concernan surtut l'infrastructura da la SSR. En emprima lingia duain las investiziuns tecnicas vegnir reducidas per 20 pertschient. Igl è previs da sminuir las surfatschas d'immobiglias per 25 pertschient en l'entira interpresa da la SSR e d'organisar da nov las activitads.
Er en la Svizra franzosa vegn adattada ils proxims onns la situaziun da las immobiglias als basegns da la digitalisaziun ed al squitsch economic (las surfatschas vegnan reducidas successivamain). RTS vegn a mantegnair sias duas sedias principalas a Genevra ed a Losanna sco era ses biros regiunals.
La SSR mantegna ina ferma preschientscha a Berna e sviluppa novas activitads
Malgrà il transferiment parzial previs resta la SSR vinavant represchentada bain en la citad da Berna cun 550 collavuraturas e collavuraturs – da quels passa 150 schurnalistas e schurnalists da SRF, RTS, RSI, RTR e SWI. Da questa ferma preschientscha fa part il studio en Chasa federala, dal qual vegn rapportà er en l'avegnir davart la politica federala a Berna.
Ultra da quai vegn SRF ad amplifitgar a Berna sia redacziun per temas naziunals ed ad augmentar sia preschientscha en ils chantuns da lingua tudestga cun intginas correspundentas ed intgins correspundents. Las unitads d'interpresa da la SSR vegnan ultra da quai a correspunder a Berna ad ina pretensiun da la nova concessiun ed a lantschar in project da pilot che duai producir cuntegns davart temas naziunals per tut ils chanals da la SSR en l'entir pajais.
Igl è medemamain previs da tgirar a Berna la nova plattafurma digitala da la SSR che vegn ad offrir las purschidas da la SSR cun suttitels en las linguas naziunalas à la carte, damai tenor ils basegns dal public. «Cun novas activitads vul la SSR sviluppar sia sedia a Berna – en il center politic da la Svizra – ad in center da cumpetenza naziunal per la politica. En quest senn vegn ella a promover vinavant il federalissem e la collavuraziun tranter las regiuns da noss pajais», di Jean-Michel Cina, il president dal cussegl d'administraziun da la SSR.
Cun il program d'augment d'effizienza e da reinvestiziun reagescha la SSR sin il plafonament decis dal Cussegl federal il 2017 da las entradas da taxas, sin la reducziun da las taxas sco era sin la sminuziun da las entradas da reclama che concerna tut las medias svizras. Questa refurma dal service public cuntegna er adattaziuns da la digitalisaziun da las medias ed investiziuns en quella sco era reinvestiziuns en producziuns da cultura svizras. En quest connex ha la SSR definì trais cleras prioritads per ils onns vegnints: la distinguibladad da ses programs, la collavuraziun cun las medias svizras privatas e l'effizienza dals custs.
Post da medias SSR
Edi Estermann
medienstelle.srg(at)srgssr.ch / tel. 031 350 95 95
