«Die Anderen – Les autres – Gli altri – Ils auters» – ina contribuziun da las unitads d'interpresa da la SSR contribuescha a la coesiun

Ils presidents dals cussegls dal public constateschan ch'ins chatta en las emissiuns da novitads dals quatter emetturs linguistic-regiunals adina puspè contribuziuns che tematiseschan las autras regiuns linguisticas. Plinavant collavuran las quatter unitads d'interpresa en il rom d'emissiuns spezialas (accents tematics naziunals, emissiun dal 1. d'avust). Sin SRF 4 News «Die Woche in Tessin und Romandie» datti ina collavuraziun explicita cun las autras regiuns linguisticas. Ils cussegls dal public considereschan las contribuziuns da radio «Ils auters» examinadas communablamain sco avischinaziun preziusa da las parts dal pajais. Questas emissiuns duran mintgamai var tschintg minutas e vegnan emessas emnilamain sin RTR, SRF 1, RTS la 1ère e RST Rete Uno. Ellas pussibiliteschan ina viva invista en las autras regiuns linguisticas ed intermedieschan tratgs da la cultura differents e cuminaivels.

Ina truvaglia cun «perlas» ord las regiuns

Cuntrari a SRF 4 News – che accentuescha infurmaziuns politicas ed economicas actualas da las autras regiuns linguisticas – apprezieschan ils cussegls dal public ils vasts champs tematics da l'emissiun «Ils auters». Ins duai sa fatschentar anc pli fitg cun las autras regiuns linguisticas e tschertgar «perlas» or da quellas (temas regiunals tipics, damain curiusitads) che influenzeschan ed occupeschan ils umans, che provocheschan debattas e ch'èn era d'interess surregiunal. Sco plivalur particulara considereschan ils cussegls dal public cumparegliaziuns regiunalas davart temas communabels. Quai è in'avischinaziun ch'è natiralmain colliada cun dapli lavur da retschertga. Er ils tuns en l'off en las autras linguas naziunalas stim'ins fitg. Quels dattan a la rubrica in colorit autentic e laschan parair natirala la plurilinguitad.

Dapli preschientscha – on air ed online

Gist perquai che l'emissiun «Ils auters» basegna dapli lavur da retschertga che auters formats, proponan ils cussegls dal public da nizzegiar dapli sinergias tranter ils correspundents. Pertge betg preschentar il medem tema d'ina regiun en tut las autras regiuns linguisticas? Ils cussegls dal public valiteschan il temp d'emissiun on air sco nunattractiv ed els deploreschan che las contribuziuns da radio dad «Ils auters» èn memia pauc visiblas sin las websites e che la rubrica na cumpara betg sin las plattafurmas da las medias socialas. En vista a l'impurtanza dal format «Ils auters» per la coesiun naziunala intimeschan ils cussegls dal public da repeter en l'avegnir las contribuziuns d'auters temps d'emissiun e da las derasar via ulteriurs chanals. L'emissiun na duess betg esser in product da nischa, mabain daventar ina chaussa evidenta.

Contact:
Gruppa da lavur dals presidents dals cussegls dal public SSR Susanne Hasler, parsura, presidenta dal cussegl dal public SRG.D, tel. 076 498 20 22